وزیراعظم خصوصی ریلیف سکیم دا پورے پاکستان اچ کامیاب اجراء

لندن۔19 ستمبر (اے پی پی) وزیراعظم خصوصی ریلیف سکیم دے تحت پاکستان اچ 100 روپے فی لیٹر رعایتی نرخاں تے پٹرول دی ݙیوݨ کامیابی نال جاری اے۔ وزیراعظم محمد شہباز شریف ملک توں سکیم بارے اچ ملݨ آلی صلاح دے روشنی اچ ھک ٻیا فیصلہ کیتے، وزیراعظم دی ہدایت تے پنج لیٹر توں گھٹ پٹرول پواوݨ آلے موٹرسائیکل، چنگ چی تے رکشیں کوں وی ھک ٹوکن تے ھک ہفتے اچ پنج سو روپے دی رعایت ملسی۔ وزیراعظم دفتر میڈیا ونگ توں جاری بیان موجب ہفتہ وار ھک ٹوکن جاری کیتا ویسے تے ھک مہینے اچ مجموعی طور تے 4 ٹوکن جاری کیتے ویسن۔ سکیم اچ 800cc تئیں گاݙی استعمال کرݨ آلے پہلے وانڳوں ہر ݙاہ ݙینھ اچ 10 لیٹر پٹرول تے 100 روپے فی لیٹر دی رعایت حاصل کریسن۔ ایویں ھک مہینے اچ 10 لیٹر دے 3 ٹوکن جاری کرݨ دا سلسلہ وی چلدا رہسی۔ وزیراعظم شہباز شریف ایں توں پہلے سکیم توں ریلیف حاصل کرݨ دے اہل لوکاں کیتے رجسٹریشن میسج کوں بالکل مفت کرݨ دا اعلان کیتا ہئی۔ وزیراعظم فیول ریلیف سکیم اچ 20 سال پراݨی موٹر سائیکلاں، رکشیں تے چنگ چی رکشیں کوں شامل کرݨ دی ہدایت کیتی ہئی، جیندے تے عملدرآمد شروع کر ݙتا ڳئے۔ یکم جنوری 2006ء دے بعد رجسٹرڈ ساری موٹر سائیکلاں، رکشے، چنگ چی وزیراعظم فیول ریلیف سکیم اچ رجسٹریشن کیتے اہل تھی ڳئن۔ وزیراعظم محمد شہباز شریف ریلیف سکیم دی ہر پہلو توں نگرانی خود کریندے پئن۔ وزیراعظم سکیم توں فیدہ چاوݨ آلیں دا دائرہ کار وسیع تے پٹرول تے رعایت دی باعزت تے سوکھ تے بلا رکاوٹ فراہمی یقینی بݨاوݨ دی ہدایت کیتی اے۔