شزہ فاطمہ خواجہ دا وزیراعظم فیول ریلیف سکیم اچ ترائے تبدیلیاں دا اعلان

اسلام آباد۔19ستمبر(اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ نے وزیراعظم فیول ریلیف سکیم وچ ترائے وݙیاں تبدیلیاں دا اعلان کیتے جیندے تحت موٹر سائیکل، رکشہ تے چنگ چی استعمال کرݨ آلیں کیتے اہلیت دا دائرہ کار وݙا کرتے یکم جنوری 2006 توں رجسٹرڈ سواریاں کوں وی شامل کرڳھدا ڳئے جݙاں جو ایں توں پہلے 2011 دی حد مقرر ہئی۔ نویں طریقہ کار دے تحت 5 لیٹر دی سابقہ حد ختم کر ݙتی ڳئی اے تے ݙو یا ترائے پھیتے آلی سواریاں دے اہل صارفین مہینے وچ 500 روپے دی رعایت آلے 4 ٹوکن حاصل کر سڳسن، مثال دے طور تے 780 روپے دے ݙو لیٹر پیٹرول تے 500 روپے دا ٹوکن استعمال کرݨ نال صارف کوں صرف 280 روپے ادا کرݨے پوسن۔ ایں توں علاوہ ایں سکیم دے تحت 9771 تے ایس ایم ایس سہولت ساریں کیتے بالکل مفت کر ݙتی ڳئی اے۔وفاقی وزیر ڈسایا جو ہفتے دی تریجھے پہر تئیں سکیم دے تحت 17 لکھ 50 ہزار توں ودھ رجسٹریشنز تھی چکئن جݙاں جو پیٹرول پمپاں تے 6 لکھ 80 ہزار توں ودھ ٹوکن استعمال وی کیتے ونڄ چکئن۔ انہاں واضح کیتا جو رجسٹریشن، ایس ایم ایس یا ٹوکن کیتے حکومت کوئی فیس مقرر کائنی کیتی ایں کیتے شہری دھوکے بازاں توں ہوشیار رہن۔ موٹر سائیکل یا رکشے دی ذاتی ملکیت ہووݨ لازمی کائنی، صرف گاݙی دی کاپی تے قبضہ ہووݨ کافی اے۔ سکیم وچ رجسٹر تھیوݨ کیتے 9771 تے بغیر سپیس دے شناختی کارڈ نمبر، گاݙی دا رجسٹریشن نمبر، صوبے دا کوڈ تے رجسٹریشن دی تاریخ بھیڄݨی ہوسی، جݙاں جو ہر ہفتے ریلیف ٹوکن کیتے “TOK” بھیجݨا ہوسی۔ کہیں وی شکایت یا مسئلے دی صورت وچ مستحقین 9771 ہیلپ لائن تے رابطہ کرسڳدن۔