وزیراعظم محمد شہباز شریف دا عوامی ریلیف کیتے پٹرول تے ڈیزل دی قیمتاں اچ ڳھٹکی دا اعلان، امن مذاکرات تے آمادگی کیتے ایران تے امریکہ دی قیادت دا تہہ دل توں شکریہ

اسلام آباد۔ 11 اپریل (اے پی پی) وزیراعظم محمد شہباز شریف عوامی ریلیف کیتے پٹرول دی قیمت اچ 12 روپے تے ڈیزل دی قیمت اچ 135 روپے فی لیٹر ڳھٹکی دا اعلان کریندیں ہوئیں آکھیا جو پٹرول ہݨ 378 روپے توں ڳھٹ تھی تے 366 روپے تے ڈیزل 520 روپے توں ڳھٹ تھی تے 385 روپے تے دستیاب ہوسی ، موٹر سائیکل، پبلک ٹرانسپورٹ تے مال بردار گاݙیاں کیتے سبسڈی بدستور جاری رہسی۔ اللہ دے فضل و کرم نال خلیج اچ جنگ دی کائنی ہݨ امن دی ڳالھیں تھیندی پئن، ایران تے امریکہ دی قیادت اساݙی پرخلوص دعوت تے مذاکراتی عمل کیتے اسلام آباد آندی پئی اے۔ پاکستانی قیادت انھاں مذاکرات کوں کامیاب کراوݨ کیتے جتنی تھی سڳیا کوشش کریسی ، اے صرف پاکستان کیتے ای نئی بلکہ عالمِ اسلام کیتے قابلِ فخر لمحہ اے۔ عارضی جنگ بندی تھی ڳئی اے، مستقل امن دا کٹھن مرحلہ ڳالھ مہاڑ نال طے تھیسی۔ امن عمل دی کامیابی نال ان ڳݨت معصوم زندگیاں بچ ویسن ۔ قیامِ امن کیتے نائب وزیراعظم تے وزیرِ خارجہ اسحاق ڈار تے فیلڈ مارشل سید عاصم منیر تے انھاں دی ٹیم دی انتھک کوشِشاں قابلِ تحسین ہن، فیلڈ مارشل سید عاصم منیر دے شاندار کردار کوں سنہرے حروف اچ یاد رکھیا ویسی۔ اے ڳالھیں انہاں جمعہ دی رات قوم نال خطاب کریندیں ہوئیں کیتا۔ وزیراعظم آکھیا جو اڄ قوم نال ہک تاریخ ساز موقع تے مخاطب ہاں اے جݙاں اللہ تعالیٰ دے فضل و کرم نال خلیج اچ ہݨ جنگ کائنی بلکہ امن دی ڳالھیں تھیندی پئن اتے او فریقین جیڑھے کل تائیں جنگ اچ آمݨے سامݨے ہن اتے خطے اچ تباہی دا منظر ہئی ، اڄ الحمدللہ ݙوہیں فریقین ڳالھ مہاڑ دے ذریعے معاملات کوں طے کرݨ تے راضی تھی ڳئن۔ وزیراعظم آکھیا جو او ایں انتہائی اہم پیش رفت تے برادر ملک ایران تے امریکہ دی قیادت دا تہہ دل توں شکریہ ادا کریندن جنھاں انھاں دی تجویز قبول کریندیں ہوئیں نہ صرف عارضی جنگ بندی تے اتفاق کیتا بلکہ انھاں دی پرخلوص دعوت تے ݙوہیں ملکاں دی قیادت اسلام آباد آندی پئی اے۔ جتھاں امن دے قیام کیتے مذاکرات تھیسن۔ پاکستان کوں اللہ تعالیٰ میزبانی دا شرف عطا فرمائے، اے صرف پاکستان کیتے ای نئی بلکہ عالمِ اسلام کیتے لمحہٴ فخریہ اے۔ جیندے کیتے اساں ربِ ذوالجلال دا جتنا وی شکر ادا کروں ڳھٹ اے۔ وزیراعظم آکھیا جو انھاں نازک ترین لمحات اچ پاکستان دی قیادت انتہا محتاط انداز اچ وݙے اعتماد دے نال ݙوہیں فریقین کوں عارضی جنگ بندی تے نہ صرف راضی کیتا بلکہ اسلام آباد آوݨ کیتے پرخلوص دعوت ݙتی، ایں کیتے او نائب وزیراعظم تے وزیرِ خارجہ محمد اسحاق ڈار تے انھاں دی ٹیم تے بالخصوص فیلڈ مارشل سید عاصم منیر تے انھاں دی ٹیم کوں دل دی گہرائیاں توں خراجِ تحسین پیش کریندن جنھاں انتھک محنت دے ذریعے جنگ دے شعلے وسماوݨ تے فریقین کوں مذاکرات تے راضی کرݨ کیتے کلیدی تے تاریخ ساز کردار ادا کیتا اے۔ ایں حوالے نال فیلڈ مارشل سید عاصم منیر دی خدمات کوں تاریخ اچ ہمیشہ سنہرے الفاظ اچ یاد رکھیا ویسی۔  وزیراعظم آکھیا جو عارضی جنگ بندی دا اعلان تھی ڳئے ہݨ ایندے توں وی ودھ کٹھن مرحلہ دیرپا جنگ بندی دا اے، مذاکرات دے ذریعے الجھے ہوئے مسائل کوں حل کرݨے۔ وزیراعظم قوم توں اپیل کیتی جو او مذاکرات دی کامیابی کیتے دعا کرے۔ وزیراعظم آکھیا جو جݙاں توں اے قیامت خیز مہنگائی دا طوفان آئے، میں قوم نال اے وعدہ کیتا ہئی جو جیویں ای عالمی منڈی اچ تیل دی قیمتاں ڈھسن انشاء اللہ او فائدہ فوری طور تے عوام تائیں پڄیساں۔ اڄ عالمی منڈی اچ تیل دی قیمتاں اچ کجھ ڳھٹکی تھئی اے۔ میکوں اے مشورہ ݙتا ڳیا ہئی جو پچھلے چند ہفتیاں اچ عوام تائیں ایں قیامت خیز مہنگائی کوں روکݨ کیتے حکومتِ پاکستان آپݨے وسائل توں 129 ارب روپے خرچ کیتن، انھاں اخراجات کوں گھٹ کرݨ کیتے ہݨ تیل دی قیمتاں اچ جیڑھی کجھ ڳھٹکی تھئی اے، اوندا کجھ حصہ عوام کوں پڄایا ونڃے تے کجھ حصہ روک تے 129 ارب روپے دے اخراجات اچ گھٹاوݨ کیتے استعمال کیتا ونڃے۔ وزیراعظم آکھیا جو انھاں ہک لمحے دی تاخیر کیتے بغیر اے تجویز مسترد کر ݙتی اے کیونکہ جݙاں قیمتاں اسمان نال ڳالھیں کریندی پئن تے مہنگائی دا بوجھ عوام دے سر تے آ پیا ہئی اے، تاں عوام صبر و تحمل تے برداشت دے نال او مہنگائی دا بوجھ برداشت کیتا، تے اڄ جݙاں قیمتاں اچ کجھ ڳھٹکی تھئی اے تاں اینکوں آپݨی اخلاقی سیاسی ذمہ واری سمجھدا ہاں جو ایں ڳھٹکی دا ہک ہک روپیہ عوام دے قدماں اچ نچھاور کیتا ونڃے ۔  کݨک دی کٹائی شروع تھی ڳئی اے، آپݨے محنتی کسان کیتے لاگت ڳھٹ کرݨ ٻہوں ضروری اے۔ اگر اے نہ تھیا تاں نہ صرف کسان دی محنت ضائع تھی ویسی بلکہ عام شہری کیتے وی کھاوݨ پیوݨ دی چیزاں مہانگی تھی ویسن۔ ایں کیتے ڈیزل دی قیمت اچ طور تے 135 روپے فی لیٹر دی ڳھٹکی دا اعلان کرینداں، ڈیزل دی قیمت جیڑھی ایں وقت 520 روپے فی لیٹر اے، او اڄ رات 12 بجے ڳھٹ تھی تے 385 روپے فی لیٹر اچ دستیاب ہوسی ۔ جیندے نال نہ صرف زرعی شعبے اچ آسانی پیدا تھیسی بلکہ عام آدمی کیتے پبلک ٹرانسپورٹ دے خرچے اچ وی خاطر خواہ کمی ھیسی۔ ایویں ای پٹرول دی قیمت اچ پچھلے ہفتے 80 روپے فی لیٹر ڳھٹکی دا اعلان کیتا ڳیا ہئی، ایندے اچ اڄ ٻئے12 روپے فی لیٹر ڳھٹکی دا اعلان کرینداں اتے ایں طرح پٹرول دی قیمت اڄ رات 12 وڄے توں 378 روپے توں ڳھٹ تھی تے 366 روپے فی لیٹر تھی ویسی ۔ وزیراعظم آکھیا جو پچھلے جمعہ کوں انھاں چاریں صوبیاں، گلگت بلتستان تے آزاد کشمیر دے بھراواں تے ٻھیݨیں کیتے صوبائی حکومتاں دے مشورے تے انھاں دے بھرپور تعاون نال جیڑھی ٹارگٹڈ سبسڈی دا اعلان کیتا ہئی، چاہے او موٹر سائیکل، پبلک ٹرانسپورٹ یا مال بردار گاݙیاں ہوون، انھاں کیتے او سبسڈی بدستور جاری رہسی ۔ وزیراعظم آکھیا جو اساݙی حکومت صوبائی حکومتاں دے نال رل تے مشکل ترین حالات اچ عوام کوں کݙاہیں کلہا نئی چھوڑیا، عوام دا مفاد حکومت دی اولین ترجیح اے، انھاں کوں ایندے توں ودھ کوئی چیز عزیز کائنی ۔ قوماں صرف حکومتی فیصلیاں نال نئی بلکہ عوام دے اتحاد تے نظم و ضبط نال ترقی کریندن۔ لہٰذا اساں سب ہک پاسے تھی تے ایثار دے اجتماعی جذبے نال محنت تے دیانت دے نال اللہ تعالیٰ کوں گواہ بݨا تے اگر اڳوں ودھسوں اتے رات ݙینہہ محنت کریسوںتاں انشاء اللہ دنیا دی کوئی طاقت اساکوں آپݨا عظیم مقام حاصل کرݨ توں نئی روک سڳدی ۔ اللہ تعالیٰ کوں منظور تھیا تاں اساں ہک باوقار، مضبوط تے ترقی دی طرف تیزی نال منزلاں طے کریندا ہویا پاکستان آوݨ آلی نسلاں دے حوالے کریسوں۔