چیئرمین سینیٹ سید یوسف رضا گیلانی دا شمالی بحیرۂ عرب اچ کامیاب ریسکیو آپریشن تے پاک بحریہ کوں خراجِ تحسین

اسلام آباد۔ 11 اپریل (اے پی پی) چیئرمین سینیٹ سید یوسف رضا گیلانی شمالی بحیرۂ عرب اچ پاک بحریہ دے کامیاب ریسکیو آپریشن تے اطمینان دا اظہار کریندیں ہوئیں پاک بحریہ دے افسراں تے جواناں کوں شاندار الفاظ اچ خراجِ تحسین پیش کیتے۔ سینیٹ سیکریٹریٹ توں جاری تھئیے بیان اچ چیئرمین سینیٹ آکھیا جو پاک بحریہ دی بروقت تے مؤثر کارروائی دے نتیجے اچ 18 غیر ملکی افراد دی قیمتی جاناں محفوظ بݨائی ڳئن۔ جیڑھا پاکستان دے مثبت تے ذمہ وارانہ کردار دی عکاسی اے۔ انھاں آکھیا جو پاک بحریہ دی پیشہ ورانہ مہارت، فرض شناسی تے جذبہٴ خدمت قابلِ ستائش اے۔ سید یوسف رضا گیلانی آکھیا جو ہنگامی حالات اچ پاک بحریہ دا فوری تے منظم ردِعمل ایندی اعلیٰ تربیت تے مضبوط پیشہ ورانہ صلاحیتاں دا واضح ثبوت اے۔ انھاں ٻیا آکھیا جو کامیاب ریسکیو آپریشن نہ صرف پاکستان دے عالمی تشخص کوں ٻیا مضبوط کیتے بلکہ انسانیت دے تحفظ کیتے پاکستان دے عزم کوں وی نمایاں کیتے۔ چیئرمین سینیٹ آکھیا جو ریسکیو کیتے ڳئے افراد کوں فوری طبی امداد دی فراہمی انسان دوستی تے انسانی اقدار دی روشن مثال اے۔ انھاں ایں امر تے زور ݙتا جو پاکستان دی مسلح افواج ہر مشکل گھڑی اچ انسانیت دے مونڈھے نال مونڈھا رَلا تے کھڑی اے اتے ملک تے قوم دا وقار بلند کرݨ اچ اڳوں اڳوں اے۔