امریکہ۔ایران مذاکرات دے دوران وزارتِ اطلاعات دا ٻݨایا ڳئیا میڈیا سینٹر صحافیاں دی بھرپور داد ڳھنݨ اچ کامیاب

اسلام آباد۔ 11 اپریل (اے پی پی) پاکستان تے بیرونِ ملک توں آئے صحافیاں وزارتِ اطلاعات تے نشریات ولوں جناح کنونشن سینٹر اچ قائم جدید میڈیا فسیلیٹیشن سینٹر کوں سراہندے ہوئیں اینکوں عالمی معیار دا حامل قرار ݙتے۔ اے مرکز امریکہ تے ایران دے درمیان جاری اعلیٰ سطحی جنگ بندی مذاکرات دے موقع تے قائم کیتا ڳئے جتھاں میڈیا نمائندیاں کیتے جامع تے مؤثر سہولیات فراہم کیتی ڳئن۔ ہفتہ کوں صحافیاں تے حکام دے مطابق اے مرکز نہ صرف پیشہ ورانہ تقاضیاں نال ہم آہنگ اے بلکہ حساس نوعیت دے سفارتی مذاکرات دے دوران معلومات دی ترسیل کوں منظم تے مؤثر بݨاوݨ اچ وی اہم کردار ادا کریندا پئے۔ شرکاء ایں ڳالھ تے زور ݙتا جو ایجھے اعلیٰ سطحی بین الاقوامی مذاکرات دے دوران میڈیا کیتے سازگار ماحول دی فراہمی ٻہوں اہمیت دی حامل ہوندی اے، جینکوں حکومتِ پاکستان احسن انداز اچ یقینی بݨائے۔ وفاقی سیکرٹری اطلاعات تے نشریات اشفاق احمد خلیل ݙسایا جو اے مرکز وفاقی وزیرِ اطلاعات عطاء اللہ تارڑ دی ہدایات تے ہنگامی بنیاداں تے قائم کیتا ڳئے۔ انھاں آکھیا جو ہک جامع حکمتِ عملی دے تحت میڈیا نمائندیاں کوں ہر ممکن سہولت فراہم کیتی ڳئی جیندے اچ شٹل سروس، ورک اسپیس، تیز رفتار انٹرنیٹ تے تکنیکی معاونت شامل ہن۔ انھاں دا آکھݨ ہئی جو مرکز دے قیام دا بنیادی مقصد ملکی تے غیر ملکی میڈیا کوں ہک ایجھا ماحول فراہم کرݨا ہئی جتھاں او بلا تعطل آپݨی پیشہ ورانہ ذمہ واریاں انجام ݙے سڳن ۔ انھاں ٻیا آکھیا جو صحافیاں توں موصول تھیوݨ آلا فیڈ بیک ٻہوں مثبت اے جیڑھا ایں ڳالھ دا ثبوت اے جو سارے انتظامات کامیابی نال مکمل کیتے ڳئن۔ دفاعی تجزیہ کار ماریہ سلطان ایں اقدام کوں ہک اہم کامیابی قرار ݙیندیں ہوئیں آکھیا جو مرکز اچ میڈیا، دفاعی ماہرین تے ٻئے متعلقہ اسٹیک ہولڈرز کیتے ہک جامع تے شفاف ماحول فراہم کیتا ڳئے۔ انھاں آکھیا جو اتھوں دا ماحول کہیں بین الاقوامی سربراہی اجلاس جیہا محسوس تھیندے جتھاں ہر چیز منظم تے مربوط انداز اچ دستیاب اے۔ انھاں ایں ڳالھ تے وی زور ݙتا جو حساس مذاکرات دے دوران معلومات دے وہاء کوں محتاط انداز اچ سنبھالݨ ٻہوں ضروری ہوندے اتے ایں مرکز ایں ذمہ واری کوں ٻہوں چنڳے طریقے نال نبھائے۔ غیر ملکی صحافیاں وی ایں مرکز دے انتظامات کوں سراہے۔ ترک صحافی دنیز کلیسلی اوغلو آکھیا جو اے انھاں دا پاکستان دا پہلا دورہ اے اتے اتھوں دا تجربہ ٻہوں مثبت رہیے۔ انھاں مرکز کوں منظم قرار ݙیندیں ہوئیں آکھیا جو اتھاں اسٹوڈیوز، ورک اسپیسز تے پریس بریفنگ ہالز سویں جدید سہولیات دستیاب ہن، جیڑھے پیشہ ورانہ ضرورتاں کوں مکمل طور تے پورا کریندن۔ پاکستانی سینئر صحافی غریدہ فاروقی آکھیا جو ایجھے اہم بین الاقوامی مذاکرات دی میزبانی خود پاکستان دے مثبت تشخص دی عکاسی کریندی اے۔ انھاں آکھیا جو میڈیا فسیلیٹیشن سینٹر دی ڈیزائننگ، فعالیت تے سہولیات عالمی معیار دے مطابق ہن، جتھاں تیز رفتار انٹرنیٹ، بروقت معلومات دی فراہمی تے مناسب ورک اسپیس جہیے عناصر مؤثر کوریج کیتے ٻہوں اہم ہن۔ سینئر صحافی شہباز رانا آکھیا جو ایں قسم دے انتظامات عالمی سطح تے پاکستان دا مثبت تاثر اجاگر کرݨ اچ مددگار ثابت تھیندن، خصوصاً جݙاں غیر ملکی میڈیا ادارے بغیر کہیں مشکل دے آپݨے فرائض انجام ݙے سڳن۔ ٻئے صحافیاں حسن ایوب تے عامر الیاس رانا وی ڈیجیٹل انفراسٹرکچر، ٹرانسپورٹ سہولیات تے تکنیکی معاونت کوں سراہندے ہوئیں آکھیا جو انھاں عوامل رپورٹنگ دے عمل کوں ٻہوں مؤثر تے ہموار بݨا ݙتے۔ شرکاء دا مجموعی طور تے آکھݨ ہئی جو فوری پریس ریلیزز دی دستیابی، جدید ٹیکنالوجی، پیشہ ورانہ ماحول تے مؤثر انتظامات میڈیا کوریج کوں سہل بݨاوݨ اچ کلیدی کردار ادا کیتے۔ انھاں ایں اقدام کوں پاکستان دی ایں صلاحیت دا مظہر قرار ݙتا جو او پیچیدہ تے حساس نوعیت دی عالمی سرگرمیاں دی میزبانی ٻہوں کامیابی تے شفافیت دے نال کر سڳدے۔