ایف آئی اے کوں 2026ء تئیں جدید ادارہ ٻݨاوݨ دا ہدف: وزیر داخلہ محسن نقوی دا خطاب

اسلام آباد۔13 اپریل(اے پی پی)وفاقی وزیر داخلہ محسن نقوی فیڈرل انویسٹی گیشن ایجنسی (ایف آئی اے) کوں 31 دسمبر 2026ء تئیں ہک جدید، فعال اتے موثر ادارہ ٻݨاوݨ دا ہدف مقرر کریندے واضح کیتے جو سارے وسائل دی فراہمی دے بعد محکمے اچ کرپشن دے خلاف ’’زیرو ٹالرنس‘‘ پالیسی اپنائی ویسی۔ اسلام آباد اچ ایف آئی اے افسراں دی خصوصی کانفرنس نال خطاب کریندے محسن نقوی نویں اسسٹنٹ ڈائریکٹرز، انسپکٹرز اتے افسراں نال پیشہ ورانہ معاملیاں تے تفصیلی ڳال مہاڑ کیتی۔ ایں موقع تے وزیر مملکت برائے داخلہ طلال چوہدری، وفاقی سیکرٹری داخلہ خرم آغا اتے ڈی جی ایف آئی اے ڈاکٹر عثمان انور وی موجود ہن۔ وزیر داخلہ افسراں دے مسئلے سݨ تے انہاں دے فوری حل دی یقین دہانی کریندے آکھیا جو نویں ڈی جی دی متحرک قیادت اچ ایف آئی اے کوں ہک فعال ادارہ ٻݨایا ویسی، خامیاں کوں دور کرݨ اتے نظام کوں بہتر ٻݨاوݨ ساݙی پہلی ترجیح اے۔ محسن نقوی اعلان کیتا جو ترقی (پروموشن) ہر ملازم دا حق اے، ایں سانڳے سروس سٹرکچر کوں بہتر ٻݨایا ویسی۔ وزیر داخلہ ایف آئی اے دے سارے شہداء دے خانداناں کوں پلاٹ ݙیوݨ دا وی اعلان کیتے۔ انہاں ݙسایا جو ملازمین کیتے ہک جامع ویلفیئر پلان ٻݨایا ویندا پئے جیندے اچ تعلیم، صحت اتے ٻیاں بنیادی سہولتاں ہوسن۔ انہاں آکھیا جو پہلے وسائل ݙیسوں، ول کرپشن دے خلاف سختی نال عمل کیتا ویسی اتے ایماندار افسراں کوں مکمل تحفظ ݙتا ویسی۔ تقریب نال ڈی جی ایف آئی اے ڈاکٹر عثمان انور وی خطاب کیتے اتے ادارے دی کارکردگی کوں چنڳا ٻݨاوݨ دا عزم دوہرائے۔