آزاد کشمیر اچ ایکشن کمیٹی دے 38 اچوں 35 نکات تے عملدرآمد تھی ڳیا ہئی، مہاجرین مقیم پاکستان دے حوالے نال سپریم کورٹ آزاد کشمیر قرار ݙتے جو نویں اسمبلی فیصلہ کرے، اعظم نذیر تارڑ

اسلام آباد۔ 10 جون (اے پی پی) وفاقی وزیرِ قانون و انصاف اعظم نذیر تارڑ آکھیے جو آزاد کشمیر اچ ایکشن کمیٹی دے نال 38 اچوں 35 نکات تے عملدرآمد تھی ڳیا ہئی، مہاجرین مقیم پاکستان وݙیاں قربانیاں ݙتیاں ہن، انھاں دی آزاد کشمیر اسمبلی اچ نمائندگی دے حوالے نال سپریم کورٹ آزاد کشمیر صدارتی ریفرنس تے آپݨے فیصلے اچ قرار ݙتے جو نویں اسمبلی ایں دا فیصلہ کرے۔ بدھ کوں قومی اسمبلی اچ بیرسٹر گوہر خان دے نکتۂ اعتراض دا جواب ݙیندے ہوئیں انھاں آکھیے جو کشمیر اچ رانا ثناء اللہ دی سربراہی اچ وزیراعظم کمیٹی بݨائی جئیں ایکشن کمیٹی نال مذاکرات کیتے۔ انھاں آکھیے جو کشمیر اساݙی شہ رگ اے تے اساکوں بہت عزیز اے۔ وزیرِ اعظم گزشتہ سال ہک کمیٹی بݨائی، ایں اچ ایکشن کمیٹی دے 38 مطالبات اچوں 35 من گھدے ڳئن۔ بجلی 3 روپے یونٹ تے اٹا 2 ہزار روپے مݨ انھاں کوں ملدا پئے، ایں سبسڈی دے اخراجات وفاقی حکومت برداشت کریندی اے۔ انھاں آکھیے جو مہاجرین دیاں 12 سیٹاں ختم کرݨ دا مطالبہ کیتا ویندا پئے، اے اوہے مہاجرین ہن جنھاں آپݨا سبھ کچھ قربان کیتا، اے پاکستان اچ آباد ہن، ایں تے ڳالھ تھئی، ایں تے اے پی سی منعقد کیتی ڳئی، جے پی ٹی آئی ایں اچ شریک تھیندی تاں چنڳا ہا، ایجھے حساس معاملات تے بائیکاٹ نئی کرݨا چاہیدا۔ انھاں ݙسائے جو اتھاں اے قرارداد اسمبلی اچ گھدی آئی ڳئی اتے ایں تے اے فیصلہ تھیا جو ایں تے قانونی رائے کیتے سپریم کورٹ اچ ریفرنس دائر کیتا ونڄے، ایں ریفرنس تے سپریم کورٹ فیصلہ ݙتا جو آئین اچ ترمیم دی صوابدید پارلیمان دی اے، ایں آئینی معاملے تے نویں اسمبلی قانون سازی کر سڳدی اے۔ انھاں آکھیے جو سرحد پار توں ہدایات تے حالات خراب کیتے ویندے پئن، ایں دے ثبوت سامنے آندے پئن، ایں معاملے تے سیاسی پوائنٹ سکورنگ نہ کرو، اے حساس معاملہ اے۔ انھاں آکھیے جو 10 مئی کوں جو عزت اللہ ݙتی تے بھارت کوں مؤثر جواب ݙتا، پوری پارلیمان نال کھڑی ہئی، اساں ساریاں رل تے فتح دا جشن منایا۔ انھاں آکھیے جو صوبیاں دے نال رل تے آرٹیکل 164 دے تحت خصوصی حالات اچ مدد منگی اے، اے پاکستان دے عوام دا پیسہ اے، ہک فارمولے دے تحت صوبیاں اچ تقسیم کریندے ہئیں، ایں اچوں مدد طلب کرݨ دی اجازت آئین ݙیندے۔