چیئرمین سینیٹ سید یوسف رضا گیلانی دی صدارت ہاؤس بزنس ایڈوائزری کمیٹی دا اجلاس

اسلام آباد۔ 10 جون (اے پی پی) چیئرمین سینیٹ سید یوسف رضا گیلانی دی صدارت ہاؤس بزنس ایڈوائزری کمیٹی دا اجلاس تھیا جئیں اچ سینیٹ دے 362 ویں اجلاس دے قانون سازی تے ٻئے ایجنڈے تے غور کیتا ڳیا، سینیٹ دا موجودہ اجلاس 23 جون تئیں جاری رہسی۔ بدھ کوں سینیٹ سیکرٹریٹ توں جاری تھیوݨ آلے بیان دے مطابق سینیٹ دی ہاؤس بزنس ایڈوائزری کمیٹی دا اجلاس پارلیمنٹ ہاؤس اچ چیئرمین سینیٹ سید یوسف رضا گیلانی دی صدارت تھیا۔ اجلاس اچ سینیٹ دے 362 ویں اجلاس دے دوران زیرِ غور آوݨ آلے قانون سازی دے ایجنڈے تے تفصیلی مشاورت کیتی ڳئی۔ کمیٹی قانون سازی دے امور دے علاوہ مالی سال 2026–27 دے آئندہ وفاقی بجٹ توں متعلق معاملات تے ٻئے اہم قومی و بین الاقوامی امور تے وی ڳالھ مہاڑ کیتی۔ اجلاس اچ اے فیصلہ کیتا ڳیا جو سینیٹ دا موجودہ اجلاس 23 جون تئیں جاری رہسی۔ ہاؤس بزنس ایڈوائزری کمیٹی دے باضابطہ اجلاس توں پہلے سینیٹ اچ موجود پارلیمانی رہنماواں چیئرمین سینیٹ کوں سالگرہ دی مبارکباد ݙتی تے ایں موقع تے کیک کٹیا ڳیا۔ پارلیمانی رہنماواں چیئرمین سینیٹ سید یوسف رضا گیلانی کیتے نیک تمناواں دا اظہار کیتا جئیں تے چیئرمین سینیٹ انھاں دا شکریہ ادا کریندے ہوئیں ایں محبت تے خیرسگالی کوں سراہیا۔ اجلاس اچ ڈپٹی چیئرمین سینیٹ سیدال خان ناصر، قائدِ حزبِ اختلاف سینیٹر راجہ ناصر عباس، سینیٹر سلیم مانڈوی والا، سینیٹر شیری رحمان، سینیٹر رانا ثناء اللہ خان، سینیٹر سید علی ظفر، سینیٹر منظور احمد، سینیٹر عطاء الرحمن، سینیٹر جان محمد، سینیٹر کامل علی آغا، سینیٹر حاجی ہدایت اللہ خان، سینیٹر عامر ولی الدین چشتی، سینیٹر ڈاکٹر زرقا سہروردی تیمور، وفاقی وزیرِ قانون و انصاف سینیٹر اعظم نذیر تارڑ، وفاقی وزیر برائے پارلیمانی امور ڈاکٹر طارق فضل چوہدری تے سیکرٹری سینیٹ سید حسنین حیدر شرکت کیتی۔ اجلاس دے چھیکڑ تے سیکرٹری سینیٹ سید حسنین حیدر شرکاء کوں جاری اجلاس دے دوران زیرِ غور آوݨ آلے قانون سازی دے امور تے مجوزہ پارلیمانی کارروائی دے حوالے نال بریفنگ ݙتی۔