سید مصطفیٰ کمال نال ہیلتھ ریسرچ ایڈوائزری بورڈ دے وفد دی ملاقات، صحت بارے تحقیق دا نظام مضبوط بݨاوݨ تے ٻین اقدامات دا جائزہ گھدا

اسلام آباد۔ 11 جون (اے پی پی) وفاقی وزیر برائے صحت سید مصطفیٰ کمال نال ہیلتھ ریسرچ ایڈوائزری بورڈ دے چیئرمین دی قیادت اچ وفد ملاقات کیتی جئیں اچ جنرل سیکرٹری تے فنانس سیکرٹری ہیلتھ ریسرچ ایڈوائزری بورڈ وی شامل ہن۔ ملاقات دے دوران ملک اچ صحت توں متعلق تحقیق دے نظام کوں مضبوط بݨاوݨ، بیماریاں دی مؤثر نگرانی دے فروغ تے قومی سطح تے صحت دے ڈیٹا دے مؤثر استعمال نال متعلق اقدامات دا جائزہ گھدا ڳیا۔ سید مصطفیٰ کمال آکھیے جو حکومت قومی سطح تے صحت دے اعداد و شمار کوں یکجا کر تے شواہد تے مبنی پالیسی سازی کوں مضبوط بݨیندی پئی اے۔ انھاں آکھیے جو ڈیجیٹل ہیلتھ ڈیٹا دے مؤثر استعمال دے ذریعے عوام کوں بہتر طبی سہولیات دی فراہمی ممکن تھیسی اتے صحت دے شعبے اچ شفافیت تے مؤثر گورننس کوں فروغ ملسی۔ وزیرِ صحت دی ہدایت تے بیماریاں دی قومی رجسٹری دے نظام دی نگرانی تے قومی سطح تے صحت دے ڈیٹا دے مؤثر استعمال کیتے نیشنل سٹیئرنگ کمیٹی قائم کر ݙتی ڳئی اے۔ ترجمان وزارتِ قومی صحت دے مطابق کمیٹی دے قیام دا باضابطہ نوٹیفکیشن جاری کر ݙتا ڳئے۔ نوٹیفکیشن دے مطابق 15 رکنی نیشنل سٹیئرنگ کمیٹی اچ وفاقی تے صوبائی صحت حکام، ماہرینِ صحت، محققین، ترقیاتی شراکت داراں دے نمائندے، سارے صوبیاں دے ڈائریکٹر جنرلز ہیلتھ، اسلام آباد، آزاد جموں و کشمیر تے گلگت بلتستان دے صحت دے نمائندے وی شامل ہوسن، ایں دے علاوہ پاکستان ڈائبیٹیز رجسٹری تے پاکستان کارڈیک رجسٹری دے بانی ڈائریکٹرز وی کمیٹی دا حصہ ہوسن۔