موسمیاتی تبدیلی کوں سوشل میڈیا تے وائرل مواد دی طرح مقبول ہووݨا چاہیدے، عطاء اللہ تارڑ

اسلام آباد۔ 11 جون (اے پی پی) وفاقی وزیرِ اطلاعات تے نشریات عطاء اللہ تارڑ گرین جرنلزم کوں ماحولیاتی شعور اجاگر کرݨ دا مؤثر ذریعہ قرار ݙیندیں ہوئیں آکھیے جو موسمیاتی تبدیلی کوں سوشل میڈیا تے وائرل مواد دی طرح مقبول ہووݨا چاہیدے، پاکستان موسمیاتی تبدیلیاں توں متاثرہ ممالک اچ شامل اے جڈانجو کاربن دے اخراج اچ پاکستان دا حصہ محض ہک فیصد اے، اب ویلھا آ ڳئے جو موسمیاتی تبدیلی دے نال نال ماحولیاتی انصاف تے وی ڳالھ کیتی ونڄے۔ Pakistan حالیہ سالاں اچ تباہ کن سیلاباں دا سامنا کر چکیے، موسمیاتی تبدیلی دے اثرات ہر شعبے کوں متاثر کریندے پئن، اساݙے مذہب اسلام اچ وی ماحولیات دے تحفظ تے زور تے درخت لاوݨ کوں صدقۂ جاریہ قرار ݙتا ڳئے، ماحولیاتی تحفظ اساݙی اخلاقی یا قومی ذمہ داری نئی بلکہ مذہبی فریضہ وی اے، ایں ضمن اچ اساکوں ایکو سسٹم بدلݨ دی ضرورت اے، موسمیاتی تبدیلی دے اثرات توں تحفظ کیتے ہر شخص کوں آپݨا کردار ادا کرݨا ہوسی۔ اے ڳالھیں انہاں خمیس کوں اتھاں او آئی سی۔ کامسٹیک تے وفاقی اردو یونیورسٹی برائے آرٹس، سائنس تے ٹیکنالوجی دے زیرِ اہتمام ہک روزہ ”گرین جرنلزم“ بین الاقوامی کانفرنس توں خطاب کریندیں ہوئیں کیتا۔ ایں موقع تے کامسٹیک دے کوآرڈینیٹر ڈاکٹر محمد اقبال چوہدری، وائس چانسلر وفاقی اردو یونیورسٹی ڈاکٹر ضابطہ خان شنواری، پروفیسر ڈاکٹر جاوید خورشید، فلسطین دی نائب وزیر برائے کمیونیکیشن ہدیٰ الواحدی سمیت طلبہ و طالبات تے ٻیاں اہم شخصیات موجود ہن۔ وفاقی وزیرِ اطلاعات کامسٹیک سمیت ٻین منتظمین کوں ایں شاندار کانفرنس دے انعقاد تے خراجِ تحسین پیش کریندیں ہوئیں انھاں دا شکریہ ادا کیتا۔ انھاں آکھیے جو ایں کانفرنس دے ذریعے نہ صرف موسمیاتی تبدیلی توں متعلق آگاہی دی اہمیت کوں اجاگر کیتا ڳئے بلکہ گرین جرنلزم دے فروغ تے ایں اہم موضوع تے شعور بیدار کرݨ کیتے عملی اقدامات وی کیتے ڳئے ہن۔ وفاقی وزیر آکھیے جو موسمیاتی تبدیلی نہ صرف اساݙے دور دا وݙا خطرہ اے بلکہ اے پوری انسانیت کیتے سنگین چیلنج بݨ ڳئی اے۔ انھاں ݙسائے جو عالمی ادارۂ صحت (ڈبلیو ایچ او) 2030 توں 2050ء دے درمیان موسمیاتی تبدیلی دے باعث ہر سال 2 لکھ 50 ہزار اموات دا خدشہ ظاہر کیتے جیڑھا جو انتہائی تشویشناک اے۔ عطاء اللہ تارڑ آکھیے جو پاکستان دا شمار انھاں ممالک اچ تھیندے جنھاں دا کاربن دے اخراج اچ حصہ ہک فیصد توں وی گھٹ اے۔ 2022ء دے سیلاب اچ خیبر پختونخوا اچ تباہی تھئی، بونیر توں سوات تئیں وسیع پیمانے تے نقصان تھیا، ایں طرزیح پنجاب تے سندھ اچ وی شدید سیلابی صورتحال دے باعث وݙے پیمانے تے تباہی تھئی۔ انھاں آکھیے جو 2010ء اچ دریائے سندھ اچ آوݨ آلے شدید سیلاب کوں وی فراموش نہیں کیتا ونڄ سڳدا۔ ہر کچھ سالاں بعد قیمتی جاناں تے روزگار دا نقصان تھیندے تے عوام کوں شدید مشکلات دا سامنا کرݨا پوندے۔انھاں آکھیے جو جنگلات دی کٹائی، گلیشیئرز دا پگھلݨ، سمندر دی سطح اچ اضافہ، شدید گرمی تے سردی تے غیر معمولی موسمی حالات انسانی زندگی تے تباہ کن اثرات مرتب کریندے پئن تے مختلف بیماریاں اچ اضافے دا باعث بݨدے پئن۔ انھاں آکھیے جو دریاواں دے کناریاں تے مقیم افراد سبھ توں ودھ خطرات نال دوچار ہن، ایں کیتے اساݙی ذمہ داری اے جو اساں اے پیغام عام کروں جو ہر شہری چاہے او نوجوان ہووے یا بزرگ، موسمیاتی تبدیلی دے تباہ کن اثرات توں آگاہی تے انھاں دے تدارک کیتے آپݨا کردار ادا کرے۔ وفاقی وزیر آکھیے جو سوشل میڈیا پلیٹ فارمز جیویں ٹک ٹاک، ایکس، فیس بک، انسٹاگرام تے لنکڈ اِن وی ایں حوالے نال مخصوص مواد تے مہمات کوں فروغ ݙے سڳدن تانجو موسمیاتی تبدیلی توں متعلق سنیھا ودھ توں ودھ لوکاں تئیں پڄ سڳے۔ انھاں آکھیے جو ’’گرین جرنلزم‘‘ دے عنوان نال ہک مؤثر مہم دے ذریعے مثبت نتائج حاصل کیتے ونڄ سڳدن۔ انھاں ہائر ایجوکیشن کمیشن تے یونیورسٹیاں دے کردار تے وی زور ݙتا تے آکھیے جو موسمیاتی تبدیلی کوں نہ صرف یونیورسٹی سطح بلکہ ابتدائی تعلیم دے نصاب اچ وی شامل کیتا ونڄݨا چاہیدے۔ انھاں تجویز ݙتی جو ہک فوکل پرسن نامزد کر تے مشترکہ ورکنگ گروپ تشکیل ݙتا ونڄے جیڑھا مختلف اسٹیک ہولڈرز دی نشاندہی تے انھاں دے کردار دا تعین کرے۔ ایں گروپ دے ذریعے عملی اقدامات، ذمہ داریاں تے ٹائم لائنز کوں واضح کیتا ونڄ سڳدے۔ وفاقی وزیر آکھیے جو میڈیا شخصیات، رائے عامہ سازوں تے انفلوئنسرز کوں وی ایں مہم اچ شامل کیتا ونڄے کیونجو عوام انھاں دی ڳالھ سݨدے ہن تے او معاشرتی رویاں دی تشکیل اچ اہم کردار ادا کریندن۔ انھاں یقین دہانی کروائی جو وزارتِ اطلاعات تے نشریات ایں نیک مقصد کیتے ہر ممکن تعاون فراہم کریسی اتے گرین جرنلزم دے فروغ کیتے پیغام رسانی کوں مؤثر انداز اچ اڳوں ودھایا ویسی۔