25 لکھ مہاجرینِ کشمیر کوں نظر انداز نئی کیتا ونڄ سڳدا، انھاں دیاں نشستاں ختم کرݨ دا مطالبہ عوام دے سامݨے رکھیا ونڄے، خواجہ محمد آصف

اسلام آباد۔ 11 جون (اے پی پی) وزیرِ دفاع خواجہ محمد آصف آکھیے جو 25 لکھ مہاجرینِ کشمیر کوں نظر انداز نئی کیتا ونڄ سڳدا، انھاں دیاں نشستاں ختم کرݨ دا مطالبہ عام انتخابات اچ عوام دے سامݨے رکھیا ونڄے، او ووٹ دی پرچی نال ایں دا فیصلہ کریسن، پرتشدد مظاہریاں دا کوئی جواز نئی، اساں کشمیریاں کوں پاکستانی سمجھدے ہئیں، حیرت اے اتنی نفرت کتھوں آئی، پی ٹی آئی دے بانی قانونی عمل دے تحت قید ہن، اپوزیشن ایں ایوان دا تقدس پامال نہ کرے، اساݙی قیادت وی قید کٹی اے تاہم اساں سسٹم کوں ڈی ریل کیتا نہ ایں ایوان دا تقدس پامال کیتا۔ خمیس کوں قومی اسمبلی اچ ڳالھ مہاڑ کریندیں ہوئیں انھاں آکھیے جو اساݙی تمام قیادت قید اچ رہی، پیپلز پارٹی دی قیادت قید اچ رہی، اساں ضرور ایں تے احتجاج کیتا لیکن اساں ایں ایوان دے تقدس کوں داؤ تے نئی لایا، اساں احتجاج کیتے متعلقہ فورمز استعمال کیتے، اساں سسٹم کوں چیلنج نئی کیتا۔ انھاں آکھیے جو شریف فیملی دے سیاست کرݨ آلے تے سیاست نہ کرݨ آلے سارے لوکاں دے خلاف کارروائی کیتی ڳئی۔ انھاں آکھیے جو پی ٹی آئی اتھاں صرف بانی دی رہائی دی ڳالھ کرݨ دے علاوہ کوئی پارلیمانی کارروائی اچ حصہ نئی گھدا، اے ادارہ سپریم اے تاہم ہک شخص کیتے ایں دا استحقاق ݙو سال توں مجروح کیتا ویندا پئے، اے ملک قائم و دائم رہسی، افراد تے شخصیات آندی ویندی رہندن، ہر ہک اتھاں توں ونڄݨا اے، جے انھاں دا لیڈر قید اچ اے تاں ایں کوں جواز بݨا تے ایں ایوان دی کارروائی اچ رکاوٹ نہ پاتی ونڄے۔ انھاں آکھیے جو اے رویہ درست نئی، اے لیڈرشپ دیاں ہدایات تے عملدرآمد کرݨ دی کوشش کریندے ہن، پی ٹی آئی دے اکثر ممبران چاہندن جو ایوان دی کارروائی چلے۔ انھاں آکھیے جو ایں ادارے کوں کاری ضرباں لائیاں ڳئن، جے اساݙیاں کمزوریاں نہ ہوندیاں تاں باہر توں آ تے کوئی ایں کوں نقصان نئی ݙے سڳدا ہا، اے سلسلہ بند ہووݨا چاہیدے، انھاں آکھیے جو کشمیری مہاجرین پاکستان دی سرزمین تے آوݨ دی قیمت ادا کیتی، سیالکوٹ سرحد پار کریندیں ہوئیں سوا ݙو لکھ کشمیری شہید تھئے، توی تے چناب انھاں دے خون نال سرخ تھی ڳئے، کالعدم ایکشن کمیٹی انھاں توں ووٹ دا حق کھسݨ دی ڳالھ کریندی پئی اے، آزاد کشمیر کیتے سارے پاکستان قربانیاں ݙتیاں ہن، صرف کشمیریاں قربانی نئی ݙتی، 25 کروڑ پاکستانیاں دی ایں نال وابستگی اے۔ انھاں ݙسائے جو سیالکوٹ اچ ہک تحصیل اچ مہاجرینِ کشمیر دی ہک سیٹ اے۔ انھاں ݙسائے جو ہک جگہ او ٻݙ تے جاں بحق تھیوݨ آلے ہک کشمیری ٻال دی تعزیت کرݨ ڳئے تاں ایں دے والد دے چہرے تے کوئی افسردگی نہ ݙیکھ تے میں حیرت زدہ تھیا تاں ایں ݙسائے جو اساں مہاجرت دے دوران آپݨی 11 ٻالڑیاں کوں عصمت دری دے خوف توں بچاوݨ کیتے آپݨے ہتھاں نال دریا اچ سٹیا۔  انھاں آکھیے جو اے مسئلہ کشمیر کوں مدِ نظر رکھ تے ایں دی حیثیت دا فیصلہ کرن۔ انھاں آکھیے جو اج پاکستان دے لکھاں فوجی اتھاں سرحدوں دی حفاظت تے مامور ہن، قائدِ اعظم محمد علی جناح کشمیر کوں شہ رگ قرار ݙتا، اساں ایں دی تاحیات حفاظت کریسوں۔