الیکٹرانک میڈیا کوں درپیش چیلنجز دے حل کیتے مل بہہ تے اقدامات کرݨے پوسن، وفاقی وزیرِ اطلاعات تے نشریات

اسلام آباد۔ 11 جون (اے پی پی) وفاقی وزیرِ اطلاعات تے نشریات عطاء اللہ تارڑ آکھیے جو الیکٹرانک میڈیا چینلز مختلف مشکلات دا سامنا کریندے پئن، اے واحد فورم اے جہاں ضابطۂ اخلاق موجود اے، الیکٹرانک میڈیا کوں درپیش چیلنجز دے حل تے ایں دی ترقی کیتے تمام سٹیک ہولڈرز کوں مل بہہ تے اقدامات کرݨے پوسن۔ خمیس کوں قومی اسمبلی اجلاس اچ وقفۂ سوالات دے دوران ارکانِ قومی اسمبلی دے ضمنی سوالات دا جواب ݙیندیں ہوئیں وفاقی وزیرِ اطلاعات آکھیے جو حکومت نجی ٹی وی چینلز دے بقایا جات دی ادائیگی کیتے اقدامات کریندی پئی اے تانجو میڈیا ادارے آپݨے ملازمین کوں بروقت تنخواہیں ادا کر سڳن۔ انھاں آکھیے جو میڈیا ہاؤسز دی زیرِ التوا ادائیگیاں دا معاملہ کل اقتصادی رابطہ کمیٹی (ای سی سی) دے اجلاس اچ وی زیرِ غور آوسی۔ انھاں آکھیے جو میڈیا ادارے اکثر عید دے نیڑے ادائیگیاں دی جلد فراہمی دی درخواست کریندے ہن تانجو او آپݨے ملازمین کوں تنخواہیں ادا کر سڳن۔ پریس انفارمیشن ڈیپارٹمنٹ (پی آئی ڈی) اچ ہک مخصوص سیل قائم اے جیڑھا بقایا جات دی صورتحال دی نگرانی کریندے اتے میڈیا اداریاں دے نال رابطے اچ رہندے تانجو ادائیگیاں اچ سہولت پیدا کیتی ونڄ سڳے۔ انھاں آکھیے جو حکومت دی کوشش اے جو رواں مالی سال دے اختتام توں پہلے ٻئی ادائیگیاں دا ہک حصہ جاری کیتا ونڄے تانجو میڈیا اداریاں تے مالی دباؤ گھٹ ہووے اتے ملازمین کوں بروقت تنخواہیں ملن۔ وفاقی وزیر آکھیے جو او پاکستان براڈکاسٹرز ایسوسی ایشنز دے حوالے نال اے ڳالھ آہݨ چاہندن جو الیکٹرانک میڈیا چینلز مختلف مشکلات دا سامنا کریندے پئن تاہم ایہو واحد فورم اے جہاں ضابطۂ اخلاق موجود اے، ادارتی بورڈ کام کریندے پئن تے ذمہ دار صحافت دی مثال پیش کیتی ویندی اے۔ انھاں آکھیے جو انسدادِ پولیو مہم، ڈیجیٹل والٹ مہم یا ٻین عوامی اہمیت دے امور تے آگاہی مہمات کیتے اشتہارات جاری کرݨ حکومت دی ذمہ داری اے۔ ایں حوالے نال تمام وزارتاں، ڈویژنوں، خودمختار اداریاں تے ٻین اداروں دیاں تفصیلات فراہم کر ݙتیاں ڳئن جو کیڑھی کیڑھی مدات اچ اشتہارات جاری کیتے ڳئے ہن۔ وفاقی وزیر آکھیے جو جݙاں میڈیا ادائیگیاں دی ڳالھ آندی اے تاں پاکستان براڈ کاسٹرز ایسوسی ایشن دے نال معاملات طے کیتے ویندے ہن جیڑھی جو تمام الیکٹرانک میڈیا چینلز دی نمائندہ تنظیم اے تے انھاں دی آپس اچ ہم آہنگی اے۔ وفاقی وزیر آکھیے جو ٹاپ، مڈ ٹیئر تے تھرڈ ٹیئر چینلز کوں ریٹنگ دے مطابق ادائیگیاں کیتیاں ویندن۔ انھاں ݙسائے جو 2024 توں 2026 دے دوران تمام وزارتاں، ڈویژنز تے سرکاری اداریاں دی ادائیگیاں تے مختلف مہمات کوں شامل کیتا ونڄے تاں مجموعی طور تے 8 بلین روپے دی رقم بݨدی اے تاہم بعض چینلز دا موقف اے جو اے رقم ڳھٹ اے تے ایں اچ اضافہ کیتا وݨڄݨا چاہیدے۔ انھاں میڈیا ورکرز دے مسائل دا ذکر کریندیں ہوئیں آکھیے جو ملازمین دے معاملات وی ہک اہم مسئلہ ہن۔ انھاں بعض میڈیا اداریاں دی طرفوں مثبت اقدامات کوں سراہندے ہوئیں آکھیے جو سنو نیوز کچھ ملازمین کوں ولا ملازمت تے بحال کیتے جڈانجو آج نیوز حالیہ صورتحال دے بعد کچھ بقایا جات دی ادائیگی وی کیتی اے جئیں تے او انھاں دے شکر گزار ہن۔ وفاقی وزیر آکھیے جو صورتحال اے اے جو کئی چینلز آپݨی مالی مشکلات دے باعث چار چار مہینے تئیں ملازمین کوں تنخواہیں ادا کرݨ دی پوزیشن اچ نئی ہن۔ انھاں آکھیے جو الیکٹرانک میڈیا ملک اچ ذمہ دار صحافت کوں فروغ ݙتے اتے ایں شعبے کوں مزید سپورٹ کرݨ دی ضرورت اے۔ وفاقی وزیر میڈیا ورکرز کیتے مالی معاونت دے طریقۂ کار دی ضرورت تے وی زور ݙتا۔ انھاں آکھیے جو حکومت ایں معاملے تے پی بی اے تے ٻین سٹیک ہولڈرز توں مشاورت کریسی تانجو میڈیا ورکرز دے تحفظ کیتے متفقہ لائحۂ عمل بݨایا ونڄ سڳے۔ انھاں آکھیے جو پی ٹی وی مالی نظم و ضبط دے ذریعے فیفا ورلڈ کپ دے نشریاتی حقوق حاصل کیتے اتے اے امر باعثِ فخر اے جو ایں ایونٹ اچ استعمال ہووݨ آلیاں فٹ بالز سیالکوٹ اچ تیار کیتی ڳئن۔ انھاں آکھیے جو الیکٹرانک میڈیا دی بقا تے ترقی قومی مفاد اچ اے تے ایں شعبے دی بہتری کیتے ٻئی اصلاحات تے اقدامات دی ضرورت اے۔