ملکی معیشت ایں مالی سال دے دوران نمایاں بحالی تے استحکام دا مظاہرہ کیتا، اقتصادی سروے

اسلام آباد۔ 11 جون (اے پی پی) وفاقی حکومت ے اقتصادی سروے 2025-26 جاری کر ݙتے جئیں دے مطابق ملکی معیشت رواں مالی سال دے دوران نمایاں بحالی تے استحکام دا مظاہرہ کیتا، حقیقی جی ڈی پی دی شرحِ نمو 3.7 فیصد ریکارڈ کیتی ڳئی جڈانجو معیشت دا مجموعی حجم 11 فیصد اضافے دے نال ریکارڈ 452.1 ارب ڈالر تئیں پڄ ڳیا، فی کس آمدنی 9 فیصد ودھ تے 1901 ڈالر تھی ڳئی، زراعت 2.89 فیصد، صنعت 3.51 فیصد تے خدمات دے شعبے 4.09 فیصد دی شرحِ نمو حاصل کیتی، وݙے پیمانے دی مینوفیکچرنگ اچ 6.1 فیصد اضافہ ریکارڈ کیتا ڳیا جیڑھی جو گزریل چار سالاں دی بلند ترین سطح اے تے ایں دے بیشتر ذیلی شعبیاں مثبت کارکردگی ݙکھائی، مالیاتی تے بیرونی شعبیاں اچ وی نمایاں بہتری ݙٹھی ڳئی، مالیاتی خسارہ جی ڈی پی دے محض 0.7 فیصد تئیں محدود رہیا جڈانجو پرائمری سرپلس 3.2 فیصد ریکارڈ کیتا ڳیا، زرمبادلہ دے ذخائر 49 فیصد اضافے دے نال 17.2 ارب ڈالر تئیں پڄ ڳئے جڈانجو ترسیلاتِ زر 33.9 ارب ڈالر رہیاں تے مالی سال دے اختتام تئیں انھاں دے 41 ارب ڈالر توں تجاوز کر ونڄݨ دی توقع اے۔ آئی ٹی برآمدات 21 فیصد اضافے نال 3.8 ارب ڈالر تئیں پڄ ڳئیاں، نویں کپمنیاں دی رجسٹریشن اچ 20.4 فیصد اضافہ تھیا اتے پاکستان سٹاک ایکسچینج اچ سرمایہ کاراں دی تعداد 45 فیصد ودھ ڳئی۔ سروے دے مطابق مہنگائی اچ نمایاں کمی، نجی شعبے تے زراعت کیتے قرضیاں اچ اضافہ، ڈیجیٹلائزیشن تے جاری ساختی اصلاحات معیشت دے استحکام تے کاروباری اعتماد کوں مزید مضبوط بݨائے۔ وفاقی وزیرِ خزانہ سینیٹر محمد اورنگزیب خمیس کوں اتھاں پر ہجوم پریس کانفرنس اچ اقتصادی جائزہ 2025-26 پیش کیتا۔ وفاقی وزیرِ منصوبہ بندی و ترقی پروفیسر احسن اقبال، وزیرِ اطلاعات و نشریات عطا اللہ تارڑ تے وزیرِ مملکت برائے خزانہ بلال اظہر کیانی وی ایں موقع تے موجود ہن۔ اقتصادی سروے 2025-26 دے مطابق ملکی معیشت دے حجم تے شرحِ نمو سمیت تمام اہم اقتصادی اعشارییاں اچ نمایاں بہتری ریکارڈ کیتی ڳئی جئیں توں معاشی استحکام تے بحالی دے عمل کوں واضح تقویت ملی۔ اقتصادی سروے دے اہم ترین 25 اعشارییاں تے مبنی دستاویز دے مطابق رواں مالی سال دے دوران حقیقی جی ڈی پی گروتھ 3.70 فیصد ریکارڈ کیتی ڳئی جیڑھی جو گزریل مالی سال دے دوران 3.2 فیصد رہی، مالی سال 2024 اچ 2.6 فیصد جڈانجو مالی سال 2023 اچ منفی 0.2 فیصد ہئی جئیں توں ظاہر تھیندے جو معیشت دے تمام وݙے شعبیاں اچ بحالی دا عمل تیز تھیا۔ دستاویز دے مطابق پاکستان دی تاریخ اچ معیشت دا سبھ توں وݙا حجم ریکارڈ کیتا ڳیا جیڑھی جو گزریل برس دے 408 ارب ڈالر دے مقابلے اچ 11 فیصد اضافے نال 452.1 ارب ڈالر (126.9 ٹریلین روپے) تئیں پڄ ڳئے جڈانجو فی کس آمدنی وی 9 فیصد سالانہ اضافے دے نال 1901 ڈالر تئیں پڄ ڳئی جیڑھی جو معاشی ترقی دے نال آمدنی اچ بحالی دی عکاس اے۔ معیشت دے پیداواری شعبیاں دی جاری تفصیلات دے مطابق سیلاب تے ٻین نقصانات دے باوجود زراعت دے شعبے لچک دا مظاہرہ کریندیں ہوئیں 2.89 فیصد دی شرحِ نمو حاصل کیتی جڈانجو صنعتی شعبے اچ وی نمایاں بحالی ݙٹھی ڳئی اتے ایں دی شرحِ نمو 3.51 فیصد رہی جیڑھی جو مالی سال 2023 اچ منفی 3.9 فیصد تئیں ڈھہ ڳئی ہئی۔ وݙے صنعتی اداریاں دی شرحِ نمو (ایل ایس ایم) اچ 6.1 فیصد جڈانجو جولائی توں مارچ 6.5 فیصد اضافہ ریکارڈ کیتا ڳیا جیڑھی جو گزریل 4 سالاں اچ سبھ توں ودھ اے، ایل ایس ایم دے 22 اچوں 16 ذیلی شعبیاں دی کارکردگی مثبت رہی جڈانجو خدمات (سروسز) دا شعبہ وی 4.09 فیصد دی شرحِ نمو دے نال معاشی ترقی دا اہم محور رہیے۔ مالیاتی ڈسپلن تے بیرونی کھاتیاں دے حوالے نال اقتصادی جائزے اچ ݙسایا ڳیا جو جولائی تا مارچ مالیاتی خسارہ جی ڈی پی دا محض 0.7 فیصد رہا جیڑھی جو گزریل کئی سالاں دے مقابلے اچ بہترین کارکردگی اے جڈانجو پرائمری سرپلس جی ڈی پی دا 3.2 فیصد ریکارڈ کیتا ڳیا جئیں توں مضبوط معاشی بنیاداں دی عکاسی تھیندی اے۔ ایں دے علاوہ قرضیاں دا بوجھ مسلسل گھٹ تھیندا پئے اتے ڈیٹ ٹو جی ڈی پی دا تناسب گھٹ تھی تے 68.5 فیصد تے آ ڳیا جیڑھی جو مالی سال 2023 اچ 75.2 فیصد تے مالی سال 2024 اچ 70.7 فیصد ریکارڈ کیتا ڳیا ہئی۔ اقتصادی جائزہ رپورٹ دے مطابق جولائی تا مئی صارفین کیتے اوسط مہنگائی (سی پی آئی) 6.7 فیصد رہی جڈانجو جولائی تا فروری اے شرح 5.5 فیصد ہئی، تاہم مارچ توں مئی دے دوران مشرقِ وسطیٰ اچ اسرائیل ایران تنازعے دے باعث توانائی دی قیمتاں تے پووݨ آلے اثرات دی وجہ توں ایں اچ کچھ اضافہ تھیا تاہم مالی سال 2023 دی سی پی آئی 29.2 تے مالی سال 2024 دی 23.4 فیصد دے مقابلے اچ قیمتاں اچ استحکام برقرار اے۔ جولائی تا اپریل کرنٹ اکاؤنٹ خسارہ نمایاں کمی دے نال محض 252 ملین ڈالر تئیں گھٹ تھی ڳیا جیڑھی جو مالی سال 2022 اچ 17.4 ارب ڈالر ہئی جڈانجو ملکی زرمبادلہ دے ذخائر 29 مئی 2026 تئیں 49 فیصد اضافے دے نال 17.2 ارب ڈالر تئیں پڄ ڳئن جئیں توں بیرونی معاشی جھٹکیاں دے خلاف پاکستان دی اقتصادی پوزیشن مستحکم تھئی اے اتے امپورٹ کور ودھ تے 2.75 ماہ دی درآمدات دے برابر تھی ڳئے جڈانجو گزریل مالی سال اچ اے حجم 1.77 مہینوں دے مساوی ہئی۔ سمندر پار پاکستانیاں دیاں ترسیلاتِ زر جولائی تا مئی 9 فیصد سالانہ اضافے دے نال 33.9 ارب ڈالر تئیں پڄ ڳئن جئیں اچ اپریل دے مہینے اچ ریکارڈ کیتی ونڄݨ آلی 4.3 ارب ڈالر دی ہݨ تئیں دی سبھ توں زیادہ ماہانہ ترسیلات وی شامل ہن تے توقع ظاہر کیتی ڳئی اے جو رواں مالی سال دے اختتام تئیں اے 41 ارب ڈالر توں تجاوز کر ویسن۔ آئی ٹی تے ٹیکنالوجی دے شعبے دی برآمدات جولائی تا اپریل 21 فیصد اضافے دے نال 3.8 ارب ڈالر ریکارڈ کیتیاں ڳئیاں جئیں اچ فری لانسرز دا حصہ 49 فیصد اضافے دے نال 959 ملین ڈالر رہیا جیڑھی جو ہک ارب ڈالر دے سنگِ میل دے نیڑے پڄ ڳئن جڈانجو روشن ڈیجیٹل اکاؤنٹ اچ جمع رقم 12.7 ارب ڈالر تئیں پڄ ڳئی اے۔ نجی شعبے دے قرضیاں اچ جولائی تا مارچ اضافہ ݙٹھا ڳیا اتے اے 934 ارب روپے رہے جیڑھے گزریل سال ایں عرصے اچ 768 ارب روپے ہن جڈانجو زرعی قرضے 15 فیصد اضافے دے نال 2162 ارب روپے تئیں پڄ ڳئے جئیں توں کاروباری سرگرمیاں تے دیہی معیشت کوں فروغ حاصل تھیندا پئے۔ پاکستان سٹاک ایکسچینج اچ سرمایہ کاراں دے اعتماد اچ زبردست اضافہ ݙٹھا ڳیا اتے مئی 2026 تئیں سرمایہ کاراں دی تعداد 45 فیصد اضافے دے نال 5 لکھ 63 ہزار توں تجاوز کر ڳئی جئیں اچ نوجواناں تے پہلی واری سرمایہ کاری کرݨ آلیاں دی وݙی تعداد شامل اے جڈانجو رواں برس 11 نویں کمپنیاں دی لسٹنگ (IPOs) تھئی جیڑھی جو گزریل ݙو ݙھاکیاں اچ بلند ترین کارپوریٹ اعتماد کوں ظاہر کریندی اے۔ اقتصادی جائزہ رپورٹ دے مطابق ملک اچ کاروباری دستاویزی نظام تے کارپوریشن کوں فروغ ملیا اتے 20.4 فیصد اضافے دے نال 39 ہزار توں ودھ نویں کمپنیاں رجسٹرڈ تھیاں جنھاں اچوں 99.9 فیصد ڈیجیٹل طور تے رجسٹرڈ کیتیاں ڳئیاں اتے ایں طرح ملک اچ کل رجسٹرڈ کمپنیاں دی تعداد 2 لکھ 97 ہزار توں تجاوز کر ڳئی اے۔ سماجی تحفظ دے حوالے نال بینظیر انکم سپورٹ پروگرام (بی آئی ایس پی) دا بجٹ 21 فیصد اضافے دے نال 722.5 ارب روپے کر ݙتا ڳئے تانجو غریب ترین خانداناں کوں ریلیف فراہم کیتا ونڄ سڳے جڈانجو عوام دی مالیاتی وسائل تئیں رسائی کیتے وزیرِ اعظم آپݨا گھر پروگرام، زرخیز زرعی سکیم، پیو الیکٹرک وہیکل فنڈ، سوشل امپیکٹ تے یوتھ پروگرامز دے ذریعے نوجواناں، کساناں تے پسماندہ طبقات دی مدد کیتی ویندی پئی اے۔ وزارتِ خزانہ دے مطابق ٹیکسیشن دے نویں آپریٹنگ ماڈل، توانائی دی قیمتاں دے حوالے نال اصلاحات، پی آئی اے تے بجلی دی تقسیم کار کمپنیاں (ڈسکوز) سمیت سرکاری اداریاں دی نجکاری، وزارتاں تے محکمیاں دے رائٹ سائزنگ، پنشن ماڈل اچ اصلاحات، کاروباری آسانیاں تے ڈیجیٹل پاکستان سویں مشکل ساختی اصلاحاتی پروگرام کامیابی دے نال نفاذ دے مراحل اچ ہن جنھاں دے دور رس نتائج برآمد تھیندے پئن۔