پاکستان مشرقِ وسطیٰ اچ اڄوکی کشیدگی پاروں سفارتی گنجائش محدود ہووݨ دے باوجود امید دا دامن نئی چھوڑیا، ترجمان دفترِ خارجہ

اسلام آباد۔ 11 جون (اے پی پی) پاکستان آکھیے جو مشرقِ وسطیٰ اچ حالیہ کشیدگی تے سنگین صورتحال دے باعث سفارتی گنجائش محدود ہووݨ دے باوجود ایں امید دا دامن نئی چھوڑیا اتے او بدستور امن تے سفارتکاری دے راستے تے مثبت سوچ دے نال گامزن اے۔ ترجمان دفترِ خارجہ طاہر حسین اندرابی خمیس کوں اتھاں ہفتہ وار پریس بریفنگ دے دوران آکھیا جو اساں مسلسل رابطے اچ ہئیں اتے ہک حد تئیں امید دے نال کام کریندے پئیوں اتے ایجھی امید کہیں وی ثالث یا سہولت کار کیتے ناگزیر ہوندی اے۔ انھاں آکھیے جو اساں سمجھدوں جو انھاں دشمنیاں دے باعث سفارتی گنجائش گھٹ تھئی اے لیکن اساں مثبت انداز اچ آپݨی کوششاں جاری رکھیسوں۔ انھاں آکھیے جو پاکستان مشرقِ وسطیٰ اچ حالیہ کشیدگی تے خلیجی خطے اچ جاری تعطل تے گہری تشویش رکھیندے اتے تمام فریقاں توں اپیل کریندے جو او جنگ بندی دے حوالے نال طے تھیوݨ آلی مفاہمت دا احترام کرن اتے دشمنیاں کوں ٻیا نہ ودھاون تانجو مذاکرات تے سفارتکاری کیتے ڄاہ پیدا تھی سڳے۔ ترجمان آکھیے جو پاکستان آپݨے اہم شراکت داراں دے نال ثالثی دی کوششاں جاری رکھے ہوئے ۔ انھاں ایں ضمن اچ پاکستانی قیادت تے ٻین ممالک دی قیادت وچال حالیہ دوریاں تے ٹیلیفونک رابطیاں دا حوالہ ݙتا جنھاں اچ وزیرِ داخلہ دا تہران دا دورہ وی شامل ہئی جتھاں او پاکستانی قیادت دا سنیھا گھن تے ڳئے ہن۔ ترجمان بدھ دی رات نائب وزیرِ اعظم و وزیرِ خارجہ سینیٹر محمد اسحاق ڈار تے انھاں دے ترک ہم منصب وچال تھیوݨ آلی ٹیلیفونک ڳالھ مہاڑ توں وی آگاہ کیتا جئیں اچ ݙوہیں رہنماواں خطے دی بدلتی صورتحال تے ڳالھ مہاڑ کیتی اتے مذاکرات تے تحمل دی اہمیت تے زور ݙتا۔ ݙوہیں رہنماواں امید ظاہر کیتی جو فریقین دے درمیان مفاہمت خطے اچ امن تے استحکام دے فروغ اچ مددگار ثابت تھیسی۔ آزاد جموں و کشمیر توں متعلق بھارتی بیانات کوں مسترد کریندیں ہوئیں ترجمان انھاں ریمارکس کوں مکمل طور تے رد کر ݙتا اتے بھارت دے غیر قانونی طور تے زیرِ تسلط جموں تے کشمیر تے آزاد جموں تے کشمیر دی صورتحال وچال واضح فرق اجاگر کیتا۔ انھاں آکھیے جو بھارت دے غیر قانونی طور تے زیرِ تسلط جموں و کشمیر کوں غیر قانونی طور تے ضم کیتا ڳئے اتے بین الاقوامی سطح تے تسلیم شدہ متنازعہ علاقہ اے جتھ دے عوام کالے قوانین دے تحت منظم زیادتیاں دا شکار ہن اتے انھاں کوں حقِ خودارادیت سمیت بنیادی حقوق توں محروم رکھا ڳئے۔ ایں دے برعکس آزاد جموں و کشمیر اچ مسائل دا حل جمہوری تے آئینی فریم ورک دے اندر رہ کر کیتا ویندا پئے ۔ بھارتی وزیرِ آبی وسائل دے بیان تے ردِعمل ݙیندے ہوئیں انھاں خبردار کیتا جو پاکستان دا پانی روکݨ دی کوئی وی کوشش انتہائی غیر ذمہ دارانہ اقدام ہوسی جیڑھا بین الاقوامی ذمہ واریاں تے سندھ طاس معاہدے دے منافی ہوسی۔ پاکستان دے مؤقف دا اعادہ کریندیں ہوئیں انھاں آکھیے جو ایجھے کہیں وی اقدام کوں انتہائی سنجیدگی نال گھدا ویسی اتے ایں کوں جنگی اقدام تصور کیتا ویسسی۔ ترجمان آکھیے جو تقریباً 50 ݙینھ توں صومالی قزاقاں دے قبضے اچ موجود خالی مال بردار جہاز تے سوار پاکستانی شہریاں دی رہائی کیتے حکومت صومالی حکام تے جہاز دے مالک دے نال رابطے اچ اے۔ انھاں حالیہ سفارتی کوششاں دا ذکر کریندیں ہوئیں آکھیے جو نائب وزیرِ اعظم محمد اسحاق ڈار صومالی وزیرِ خارجہ توں ٹیلیفونک رابطہ کیتے جڈانجو ایں حوالے نال بین الوزارتی اجلاس وی متوقع ہن۔ انھاں آکھیے جو محمد اسحاق ڈار آپݨے صومالی ہم منصب تے زور ݙتا جو او نہ صرف اکستانی عملے دے ارکان بلکہ ٻئے مختلف قومیتاں توں تعلق رکھݨ آلے سات مزید عملے دے ارکان دے رہائشی تے انسانی حالات بہتر بݨاوݨ کیتے اقدامات کرن۔ جنوبی افریقا اچ افریقی تے ایشیائی شہریاں دے خلاف تھیوݨ آلے غیر ملکی مخالف حملیاں دے حوالے نال ترجمان آکھیے جو پریٹوریا اچ پاکستانی سفارتخانہ پاکستانی شہریاں دی سلامتی کیتے سرگرمِ عمل اے اتے جنوبی افریقی حکام دے تعاون نال صورتحال نال نمٹا ویندا پئے ۔ پاک-افغان سرحد دے نال پاکستانی کارروائیاں دے بارے اچ انھاں آکھیے جو اے کارروائیاں مستند انٹیلی جنس معلومات دی بنیاد تے کیتی ڳئن تے انھاں اچ بنوں حملے نال منسلک دہشت گرداں دے ٹکاݨے کوں انتہائی درستگی دے نال نشانہ بݨایا ڳیا۔ متحدہ عرب امارات توں پاکستانیاں دی بے دخلی بارے ہک سوال دے جواب اچ انھاں آکھیے جو پاکستانی سفارتی مشنز ایں معاملے اچ سرگرم ہن تے رہ ونڄݨ آلے اثاثیاں دی واپسی کوں یقینی بݨایا ویسی، پاکستان دے سفیر، قونصل جنرلز تے کمیونٹی ویلفیئر سیکشنز ایں عمل اچ بھرپور کردار ادا کریندے پئن۔