ٻاہرلے ملک مقیم پاکستانی ہر سال 40 ارب ڈالر توں ودھ زرمبادلہ وطن بھیجیندن، وفاقی وزیر احسن اقبال

اسلام آباد۔ 11 جون (اے پی پی) وفاقی وزیرِ منصوبہ بندی، ترقی تے خصوصی اقدامات پروفیسر احسن اقبال آکھیے جو پاکستان گزریل کئی ݙھاکیاں توں برآمدات تے مبنی معاشی ترقی دا ماڈل اختیار کرݨ اچ ناکام رہیا جئیں پاروں ملکی معیشت آپݨی حقیقی صلاحیتاں دے مطابق ترقی نئی کر سڳی۔ خمیس کوں پاکستان اکنامک سروے دے اجراء دے موقع تے انھاں آکھیے جو بیرونِ ملک مقیم تقریباً 90 لکھ پاکستانی ہر سال 40 ارب ڈالر توں زائد زرمبادلہ وطن بھیجیندن، جڈانجو 25 کروڑ آبادی آلا پاکستان مجموعی طور تے تقریباً 40 ارب ڈالر دی برآمدات کریندے۔ انھاں دے بقول اے صورتحال ایں امر دی نشاندہی کریندی اے جو ملک کوں آپݨی پیداواری تے برآمدی صلاحیت اچ نمایاں اضافہ کرݨ دی ضرورت اے۔ احسن اقبال زور ݙتا جو قوماں دی ترقی کیتے ماضی دے تجربات تے تاریخ توں سبق سکھݨ ضروری اے۔ انھاں آکھیے جو پائیدار اقتصادی ترقی کیتے سیاسی استحکام، پالیسیاں دا تسلسل تے قومی ترجیحات تے اتفاقِ رائے بنیادی اہمیت رکھیندن۔ وفاقی وزیر آکھیے جو جو حکومت یا ادارہ بہتر کارکردگی دا مظاہرہ کرے ایں کوں آپݨی پالیسیاں دے نتائج حاصل کرݨ کیتے ٻیا موقع ملݨا چاہیدے، کیونجو ترقیاتی منصوبیاں تے معاشی اصلاحات دے ثمرات وقت دے نال سامنے آندن۔ انھاں آکھیے جو پاکستان کوں روایتی طرزِ فکر توں نکل تے آپݨے ترقیاتی پیراڈائم کوں تبدیل کرݨا پوسی، تانجو معیشت کوں جدید تقاضیاں نال ہم آہنگ کیتا ونڄ سڳے۔ انھاں دے مطابق ملک معاشی بحالی دے راستے تے گامزن اے اتے مختلف شعبیاں اچ بہتری دے آثار نمایاں تھیندے پئن، جنھاں کوں مستقل مزاجی تے مؤثر پالیسیاں دے نال ٻیا مستحکم بݨایا ونڄ سڳدے۔