پاکستان دی معیشت اچ استحکام دے آثار نمایاں تھیندے پئن، وݙیاں صنعتاں اچ بحالی دا عمل وسیع بنیاداں تے جاری اے، وفاقی وزیرِ خزانہ محمد اورنگزیب دی میڈیا بریفنگ

اسلام آباد۔ 11 جون (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو پاکستان دی معیشت اچ استحکام دے آثار نمایاں تھیندے پئن، وݙیاں صنعتاں اچ بحالی دا عمل وسیع بنیاداں تے جاری اے تے سرمایہ کاری، برآمدات، کاروباری سرگرمیاں تے مالیاتی شعبے اچ مثبت پیش رفت ریکارڈ کیتی ڳئی اے۔اقتصادی سروے 2025-26 دے اجراء دے موقع تے میڈیا بریفنگ ݙیندے ہوئیں وزیرِ خزانہ ݙسایا جو وݙیاں صنعتاں (ایل ایس ایم) دے 16 شعبیں اچ مثبت نمو ݙٹھی ڳئی جیں اچ خوراک، ٹیکسٹائل، ملبوسات، پٹرولیم مصنوعات، غیر دھاتی معدنیات، آٹوموبائل، مشروبات تے برقی آلات شامل ہن۔ انھاں دے مطابق اے پیش رفت ایں ڳالھ دی نشاندہی کریندی اے جو صنعتی سرگرمیاں ول رفتار پکڑیندیاں پئن۔ انھاں آکھیے جو عالمی معاشی مشکلات دے باوجود پاکستان دی ویلیو ایڈڈ برآمدات بہتر کارکردگی ݙکھیندیاں پئن۔ جولائی توں مئی مالی سال 2025-26 دے دوران ویون گارمنٹس دی برآمدات اچ 5 فیصد، ہوم ٹیکسٹائل اچ 3 فیصد تے نِٹڈ گارمنٹس اچ 3 فیصد اضافہ تھیا جڈانجو کھیݙاں دے سامان دی برآمدات اچ 18 فیصد نمایاں اضافہ ریکارڈ کیتا ڳیا۔ وزیرِ خزانہ آکھیے جو پاکستانی ساختہ فٹ بال دا عالمی ٹورنامنٹس اچ استعمال ملکی سپورٹس انڈسٹری دی بین الاقوامی مسابقت دا واضح ثبوت اے۔سرمایہ کاری دے رجحانات دا ذکر کریندے انھاں ݙسایا جو روشن ڈیجیٹل اکاؤنٹ اچ رقم دی آمد مسلسل ودھدی پئی اے۔ انھاں دے مطابق جتھاں پہلے ماہانہ بنیاد تے 180 توں 190 ملین ڈالر دی سرمایہ کاری آندی ہئی، او اپریل اچ ودھ کراہیں 322 ملین ڈالر توں تجاوز کر ڳئی جڈانجو مئی اچ وی ایں سطح دے برقرار رہوݨ دی توقع اے۔ انھاں آکھیے جو اے سرمایہ کاری ہاؤسنگ، کیپٹل مارکیٹ تے مختلف حکومتی سرمایہ کاری سکیماں کوں سہارا ݙیندی پئی اے۔وزیرِ خزانہ دے مطابق اسٹاک مارکیٹ اچ سرمایہ کاراں دی تعداد 5 لکھ 63 ہزار توں تجاوز کر چکی اے تے ہک سال دے دوران تقریباً ہک لکھ 75 ہزار نویں سرمایہ کار مارکیٹ دا حصہ بݨئن۔ ایں عرصے اچ 39 ہزار توں ودھ نویاں کمپنیاں رجسٹر تھیاں جنھاں اچ تقریباً ساریاں رجسٹریشن ڈیجیٹل نظام دے ذریعے مکمل کیتیاں ڳئیاں۔ ایویں ملک اچ رجسٹرڈ کمپنیاں دی مجموعی تعداد تقریباً ترائے لکھ تئیں پہنچ چکی اے۔ انھاں آکھیے جو ݙو ݙہاکیں دے بعد 11 ابتدائی عوامی پیشکشاں (آئی پی اوز) دا کامیابی نال مکمل ہووݨ سرمایہ کاراں دے ودھدے ہوئے اعتماد دا مظہر اے جڈانجو اسٹاک مارکیٹ اچ درج کمپنیاں دی آمدݨ اچ 22 فیصد اضافہ وی کارپوریٹ سیکٹر دی مضبوطی دی عکاسی کریندے۔وزیرِ خزانہ آئی ٹی شعبے کوں پاکستان دی معیشت دا ابھردا ہویا ستون قرار ݙیندے آکھیے جو آئی ٹی برآمدات 3.8 ارب ڈالر توں تجاوز کر چکئن جڈانجو فری لانسنگ دے ذریعے تقریباً 900 ملین ڈالر دی برآمدات حاصل تھیندیاں پئن۔ انھاں دا آکھݨ ہئی جو جے نوجواناں کوں مصنوعی ذہانت (AI)، بلاک چین تے جدید ڈیجیٹل ٹیکنالوجیز دی تربیت ݙتی ونڄے تاں انھاں دی فی گھنٹہ آمدݨ 10 توں 12 ڈالر توں ودھ کراہیں 50 توں 400 ڈالر توں تئیں ونڄ سڳدی اے۔ انھاں آکھیے جو جے کہیں کوں پاکستان دی معیشت اچ موقع نظر نئی آندے پئے تاں او اڄوکے سرمایہ کاری تے کاروباری سرگرمیاں دا جائزہ گھنے۔ انھاں دے مطابق بین الاقوامی کمپنیاں پاکستان اچ سرمایہ کاری کریندیاں پئن یا آپݨی موجودہ سرمایہ کاری اچ اضافہ کریندیاں پئن جنھاں اچ گوگل، بی وائی ڈی، آرامکو، علی بابا گروپ، اے ڈی پورٹس، نیسلے، مشرق بینک تے ترک پٹرولیم پاکستان اچ داخل تھی چکن۔قرضیں دے حوالے نال وزیرِ خزانہ آکھیے جو پاکستان دا مجموعی قرضہ جی ڈی پی دے تناسب نال 2023ء اچ 75 فیصد ہئی جیڑھا جو ہݨ گھٹ تھی کراہیں 68.5 فیصد رہ ڳئے ۔ انھاں ݙسایا جو پاکستان دے قرضیں دا 40 توں 45 فیصد حصہ رعایتی قرضیں تے مشتمل اے جیڑھے عالمی مالیاتی اداریں تے ترقیاتی شراکت داراں توں طویل المدتی بنیاداں تے حاصل کیتے ڳئن۔ انھاں سعودی عرب تے چین سودھے دوست ملکاں دا شکریہ ادا کریندے آکھیے جو اوکھے معاشی حالات اچ انھاں ملکاں پاکستان دی معاونت جاری رکھی۔ انھاں دے مطابق پاکستان عالمی سرمایہ منڈیاں تئیں ول رسائی حاصل کریندے کامیابی نال بانڈز جاری کیتن جنھاں اچ پانڈا بانڈ وی شامل اے۔ وزیرِ خزانہ آکھیے جو پانڈا بانڈ دی لاگت تقریباً 3 فیصد رہی جیڑھی گھٹ لاگت فنانسنگ دے حصول اچ ہک اہم کامیابی اے۔ٹیکس اصلاحات دے حوالے نال انھاں ݙسایا جو سیمٹ تے کھنڈ دے شعبیں اچ ڈیجیٹل مانیٹرنگ دے ذریعے تقریباً 60 ارب روپے اضافی ریونیو حاصل کیتا ڳیا جڈانجو مصنوعی ذہانت تے مبنی آڈٹ تے رسک بیسڈ کمپلائنس اقدامات نال مزید 34 ارب روپے جمع کیتے ڳئے۔انھاں ݙسایا جو شرحِ سود 22 فیصد توں گھٹ تھی کراہیں 11.5 فیصد تئیں آ چکی اے جڈانجو کاروباری طبقے کوں سہولت ݙیوݨ کیتے زرعی تے ہاؤسنگ شعبے سودھے 6 توں 7 نویاں سبسڈی سکیماں متعارف کراوݨ دی تیاری کیتی ویندی پئی اے جنھاں دے تحت طویل المدتی تے گھٹ شرحِ سود تے فنانسنگ ݙتی ویسی۔ توانائی دے شعبے اچ جاری اصلاحات دا ذکر کریندے وزیرِ خزانہ آکھیے جو کراسس سبسڈی دے بتدریج خاتمے نال صنعتی صارفین کیتے بجلی دے نرخ گھٹ تھئن۔ انھاں مزید ݙسایا جو بجلی دی تقسیم کار کمپنیاں دی نجکاری دا عمل جاری اے تے جے منصوبہ بندی دے مطابق پیش رفت تھئی تاں اڄوکے سال دے اختتام تئیں ترائے تقسیم کار کمپنیاں نجی شعبے دے حوالے کیتیاں ونڄ سڳدن ۔ انھاں زور ݙتا جو پائیدار اقتصادی ترقی کیتے سرمایہ کاری دی شرح کوں جی ڈی پی دے 15 فیصد توں اتے گھن ونڄݨ ضروری اے۔ انھاں دے مطابق ریگولیٹری رکاوٹاں تے پالیسیاں دا عدم تسلسل ہݨ وی وݙے چیلنجز ہن تاں جو حکومت اصلاحات، نجکاری، ڈیجیٹلائزیشن تے نجی شعبے دی قیادت اچ ترقی دے ماڈل تے عمل کریندی پئی اے تاں جو ملک کوں پائیدار معاشی نمو دی راہ تے گامزن کیتا ونڄ سڳے۔