وفاقی وزیرِ خزانہ اڄ 3 وڄے وفاقی بجٹ پیش کریسن

اسلام آباد۔ 12 جون (اے پی پی) قومی اسمبلی دا اہم ترین اجلاس اڄ 3:00 وڄے پارلیمنٹ ہاؤس اچ تھیندا پئے، جیں اچ وفاقی وزیرِ خزانہ و ریونیو، سینیٹر محمد اورنگزیب مالی سال 2026-27 دا وفاقی بجٹ پیش کریسن۔قومی اسمبلی سیکرٹریٹ توں جاری ایجنڈے موجب، اجلاس دا باقاعدہ آغاز تلاوتِ کلامِ پاک، حدیثِ مبارکہ، نعتِ رسولِ مقبول ﷺ تے قومی ترانے نال تھیسی۔ وفاقی وزیرِ خزانہ سینیٹر محمد اورنگزیب مالی سال 2026-27 کیتے حکومت دے مالیاتی تخمینے تے بجٹ تجویزاں ایوان دے سامݨے رکھیسن۔بجٹ تقریر دے نال نال وزیرِ خزانہ اہم دستاویزات تے مالیاتی گوشوارے قومی اسمبلی اچ پیش کریسن جنھاں اچ مالی سال 2026-27 دی سالانہ بجٹ اسٹیٹمنٹ تے مالی سال 2025-26 دے ترمیمی تخمینے، مالی سال 2026-27 کیتے مطالباتِ زر تے تخصیصِ فنڈز، مالی سال 2024-25 تے 2025-26 کیتے باقاعدہ تے تکنیکی ضمنی گرانٹس تے مالی سال 2016-17 تے 2024-25 کیتے اضافی بجٹ سٹیٹمنٹ شامل ہن۔یکم جولائی 2026 توں شروع تھیوݨ آلے نویں مالی سال کیتے وفاقی حکومت دی مالیاتی تجویزاں کوں قانونی شکل ݙیوݨ تے متعلقہ قوانین اچ ترامیم کیتے “فنانس ٻل، 2026” ایوان اچ متعارف کرایا ویسی۔ دنیا دے مختلف ملکاں دے سفارتکاراں تے مبصرین دی وݙی تعداد بجٹ سیشن ݙیکھݨ کیتے پارلیمنٹ ہاؤس اچ موجود ہوسی۔