آندے مالی سال دے پی ایس ڈی پی اچ وزارتِ ہاؤسنگ اینڈ ورکس دے جاری تے نویں ترقیاتی منصوبیں کیتے 16 ارب 33 کروڑ 47 لکھ روپے رکھئے ڳئن

اسلام آباد۔ 12 جون (اے پی پی) وفاقی حکومت آندے مالی سال 2026-27 دے پبلک سیکٹر ڈویلپمنٹ پروگرام (پی ایس ڈی پی) اچ وزارتِ ہاؤسنگ اینڈ ورکس دے جاری تے نویں ترقیاتی منصوبیں کیتے مجموعی طور تے 16 ارب 33 کروڑ 47 لکھ روپے مختص کر ݙتن۔ اتھاں جاری کیتے ڳئے پی ایس ڈی پی دستاویزات موجب وزارتِ ہاؤسنگ اینڈ ورکس دے جاری منصوبیں کیتے آندے مالی سال 2026-27 اچ 15 ارب 9 کروڑ 47 لکھ روپے رکھے ڳئن جڈانجو انھاں منصوبیں دی مجموعی لاڳت 80 ارب روپے توں ودھ اے۔ اہم جاری منصوبیں اچ وزیراعظم آفس بلاک دی تزئین و مرمت کیتے 15 کروڑ 33 لکھ 80 ہزار روپے، شہیدِ ملت سیکرٹریٹ اچ پراݨی لفٹاں دی تبدیلی کیتے ہک لکھ ہک ہزار روپے تے منسٹرز انکلیو اسلام آباد اچ 12 نویں اپارٹمنٹس دی تعمیر کیتے 5 کروڑ 30 لکھ 80 ہزار روپے مختص کیتے ڳئن۔ایویں الیکشن کمیشن آف پاکستان دے وفاقی دارالحکومت اچ فیڈرل الیکشن اکیڈمی تے ٻئے دفاتر دی تعمیر کیتے 10 کروڑ روپے، ڈپلومیٹک انکلیو اسلام آباد اچ آئی بی دی عمارت دی تعمیر کیتے 10 کروڑ روپے تے حیدرآباد اچ موجود مرکزی نالے دی بحالی دے منصوبے کیتے 15 کروڑ روپے رکھے ڳئن۔ دستاویز دے مطابق گورنمنٹ گرلز ڈگری کالج دی لائبریری و فرنیچر دی تعمیر و ترقی دے منصوبے کیتے 10 کروڑ روپے جڈانجو کراچی اربن انفراسٹرکچر ڈویلپمنٹ پیکیج کیتے 7 ارب 50 کروڑ روپے تے حیدرآباد اربن انفراسٹرکچر ڈویلپمنٹ پیکیج کیتے 2 ارب 50 کروڑ روپے مختص کیتے ڳئن۔پی ایس ڈی پی اچ وزارتِ ہاؤسنگ اینڈ ورکس دے تحت ترائے نویں منصوبے وی شامل کیتے ڳئن جنھاں کیتے مجموعی طور تے ہک ارب 30 کروڑ روپے مختص کیتے ڳئن۔ انھاں منصوبیں اچ اسلام آباد اچ نیشنل ڈیجیٹل لائبریری تے 150ویں سالگرہ یادگار کیتے ہک ارب 20 کروڑ روپے، سوات اچ آئی بی آفس دی تعمیر کیتے 5 کروڑ روپے تے مٹھی اچ آئی بی آفس دی تعمیر کیتے 5 کروڑ روپے شامل ہن۔ دستاویز دے مطابق وزارتِ ہاؤسنگ اینڈ ورکس دے جاری منصوبیں دی مجموعی لاگت 80 ارب 21 کروڑ 38 لکھ 70 ہزار روپے اے جڈانجو مالی سال 2026-27 کیتے مجموعی ترقیاتی مختص رقم 16 ارب 33 کروڑ 47 لکھ روپے رکھی ڳئی اے۔