پی ایس ڈی پی دے تحت قومی غذائی تحفظ و تحقیق ڈویژن دے منصوبیاں کیتے 4183 ملین روپے مختص

اسلام آباد۔ 12 جون(اے پی پی)وفاقی حکومت آئندہ مالی سال 2026-27 کیتے سرکاری شعبے دے سالانہ ترقیاتی پروگرام (پی ایس ڈی پی) دے مطابق قومی غذائی تحفظ و تحقیق ڈویژن دے منصوبیاں کیتے مجموعی طور تے 4183 ملین روپے دا بجٹ رکھیے۔ پی ایس ڈی پی دستاویزات دے مطابق انھاں منصوبیاں اچ پہلے توں جاری 9 ڄݙاں جو ہک نواں منصوبہ شامل اے۔ پہلے توں جاری 9 منصوبیاں اچ خضدار اتے تربت اچ سیڈ سرٹیفیکیشن لیبارٹری دا قیام، تیلدار اجناس دی پیداوار ودھاوݨ دا قومی پروگرام، ملک دے بارانی علاقیاں اچ زرعی پیداوار ودھاوݨ دا پروگرام، ملک اچ زیتون دی کاشت اتے کاروباری بنیاداں تے ایںدی وکری ودھاوݨ، آلو دی پیداوار دے نظام اچ پاک کوریا مشترکہ پروگرام دے تحت تصدیق شدہ بیج، ٹویٹ نیشنل ریفارمز پروگرام دے تحت زرعی شعبے اچ پیشہ ورانہ استعداد کار ودھاوݨ، وزارتِ قومی غذائی تحفظ و تحقیق دے پراجیکٹ پلاننگ اینڈ ڈویلپمنٹ یونٹ، جانوراں دی بیماریاں تے قابو پاوݨ اتے شیخوپورہ اچ ایگریکلچر ریسرچ انسٹی ٹیوٹ دے قیام دا منصوبہ شامل اے، ڄݙاں جو قومی غذائی تحفظ اتے پیداوار اچ اضافے دے پروگرام دا ہک نواں منصوبہ وی شامل اے۔ وزارتِ قومی غذائی تحفظ و تحقیق دے پہلے توں جاری 9 مختلف منصوبیاں تے مجموعی لاگت دا تخمینہ 43,610.5 ملین روپے اے، ڄݙاں جو 30 جون 2026ء تئیں انھاں منصوبیاں تے متوقع اخراجات دا تخمینہ 7,862.910 ملین روپے اے۔ آئندہ مالی سال کیتے پہلے توں جاری 9 مختلف منصوبیاں کیتے 2200 ملین روپے دا بجٹ مختص کیتا ڳئے۔ پی ایس ڈی پی دے مطابق وزارتِ قومی غذائی تحفظ و تحقیق دے قومی غذائی تحفظ اتے پیداوار اچ ودھارے دے پروگرام دے نویں منصوبے تے مجموعی لاگت دا تخمینہ 17000 ملین روپے لایا ڳئے، ڄݙاں جو آئندہ مالی سال ایں منصوبے کیتے 1983 ملین روپے دے فنڈز رکھیے ڳئن۔ وزارتِ قومی غذائی تحفظ و تحقیق دے مختلف ترقیاتی منصوبیاں کیتے آئندہ مالی سال 4183 ملین روپے دا بجٹ رکھیا ڳئے۔