سارے چیلنجز دا مقابلہ کرݨ دے باوجود معیشت اڄ مستحکم اے، موجودہ حکومت دے تریجھے بجٹ نال معیشت دا پھیتا تکھے چلݨ شروع تھی ویسی، وزیراعظم شہباز شریف دا وفاقی کابینہ دے خصوصی اجلاس توں خطاب

اسلام آباد۔ 12 جون (اے پی پی) وزیراعظم محمد شہباز شریف آکھیے جو سارے چیلنجز دا مقابلہ کرݨ دے باوجود معیشت اڄ مستحکم اے، موجودہ حکومت دے تریجھے بجٹ نال معیشت دا پھیتا تکھے چلݨ شروع تھی ویسی۔ عوام جیں صبر و تحمل دا مظاہرہ کیتے تے مہانگ برداشت کیتی اے، ایں تے پاکستان دے 24 کروڑ عوام دا شکریہ ادا کرینداں۔ وفاق تے صوبیں وچال ہم آہنگی نال سارے چیلنجز تے قابو پاتا ونڄ سڳدے۔ آئی ایم ایف پاکستان دی معاشی کارکردگی تے ساݙیاں کوششاں دی تعریف کیتی  خوشحالی قوم دا مقدر اے۔وزیراعظم محمد شہباز شریف اے ڳالھ وفاقی کابینہ دے خصوصی اجلاس توں خطاب کریندے آکھی ۔ وزیراعظم کابینہ کوں ݙسایا جو انھاں گزریل ݙینھ ہیلی کاپٹر حادثے اچ شہید تھیوݨ آلے جواناں دی نمازِ جنازہ اچ شرکت کیتی، شہید تھیوݨ آلیں اچ پاک فوج دے افسران، جوان تے ݙو مسیحی بھرا وی شامل ہن۔ انھاں آکھیا جو ہیلی کاپٹر حادثے دے دلخراش واقعے ہر اکھ اشکبار کرݙتی، اے ضائع نہ نہ ویسن، بالآخر دہشت گردی دا خاتمہ تھی کراہیں رہسی۔انھاں آکھیا جو اج وفاقی کابینہ دا ہک نکاتی ایجنڈا وفاقی بجٹ اے، اڄ ساݙی حکومت تریجھا وفاقی بجٹ پیش کرݨ ویندی پئی اے۔ پہلے ݙو بجٹاں اچ ملک تے آئی ایم ایف دی ضرورتاں کوں مدِ نظر رکھیندے تے ملکی ترقی دے رستے کھولݨ کیتے کئی سالاں توں ہچکولے کھاندی معیشت کوں مستحکم کرݨ کیتے ٹیکسز لاوݨے پئے جیں نال عام آدمی کوں مشکلات دا سامݨا کرݨا پیا۔ انھاں اپݨی تے وفاقی کابینہ دی طرفوں 24 کروڑ عوام دا شکریہ ادا کیتا جنھاں صبر و تحمل نال مہانگ برداشت کیتی۔وزیراعظم آکھیا جو اساکوں عام آدمی دی اوکھ دا چنڳی طرح اندازہ اے، گزریل 2 سال دے دوران حکومتی کوششاں نال مہانگ دی شرح 38 فیصد توں گھٹ تھی کراہیں سنگل ڈیجٹ تے آڳئی، پالیسی ریٹ وی 22.5 فیصد توں گھٹ تھی کراہیں 11 فیصد تے آئے۔ خلیج دی صورتحال پاروں کئی مشکلات دا سامݨا کرݨا پیا تاں جو سارے معاشی چیلنجز دے باوجود ساݙی معیشت اڄ مستحکم اے۔ انھاں ایں توقع دا اظہار کیتا جو تریجھا بجٹ ساݙی معیشت کوں مزید تکھے اڳوں گھن تے ویسی۔ انھاں آکھیا جو پاکستان دے معاشی اشاریے بہتری آلے پاسے ٹردے پئن۔وزیراعظم سولر، ونڈ تے بیٹری سٹوریج جیویں توانائی ذرائع تے توجہ ݙیوݨ دی لوڑھ تے زور ݙیندے آکھیا جو اساکوں اپݨے وسائل کوں بروئے کار گھن آوݨا پوسی تے اساکوں پاݨی دے ذخیرے تے ڈیمز تعمیر کرݨے ہوسن۔ انھاں آکھیا جو ایں بجٹ کوں بݨاوݨ اچ ٻہوں چیلنجز درپیش ہن۔وزیراعظم کابینہ کوں ݙسایا جو وفاق تے صوبیں وچال معاشی اہداف دے حوالے نال مثبت ڳالھ مہاڑ تھئی، قومی ہم آہنگی تے مؤثر تعاون نال چیلنجز تے قابو پاتا ونڄ سڳدے۔ انھاں وفاق دے نال بھرپور تعاون تے وزیراعلیٰ پنجاب مریم نواز دا شکریہ ادا کیتا تے آکھیا جو میݙے قائد محمد نواز شریف دی وفاق تے پنجاب اچ ہم آہنگی کوں مضبوط بݨاوݨ دی کوششاں قابلِ ستائش ہن۔ انھاں صدرِ مملکت آصف علی زرداری تے چیئرمین پیپلز پارٹی بلاول بھٹو زرداری دے مثبت کردار دا وی شکریہ ادا کیتا۔وزیراعظم آکھیا جو بلوچستان تے خیبرپختونخوا دے وزرائے اعلیٰ وی وفاق دے نال تعاون کیتے تے کشادہ دلی دا مظاہرہ کیتے، وفاق کوں اضافی فنڈز دی لوڑھ اے جیں کیتے صوبیں دے نال بامعنی ڳالھ کیتی تے صورتحال انھاں دے سامݨے رکھی، صوبیں بھرپور تعاون کیتا، قومی وحدت، یکجہتی تے اتحاد دا ایں توں بہتر مظاہرہ نئی تھی سڳدا۔ وزیراعظم وفاقی حکومت دی ٹیم دا شکریہ ادا کیتا جیں صوبوں نال مشاورت اچ بھرپور کردار ادا کیتا۔وزیراعظم معاشی ٹیم دی کارکردگی دی تعریف کیتی جیں آئی ایم ایف دے نال محنت کرتے معاشی استحکام کیتے کم کیتا۔ انھاں آکھیا جو میں خود آئی ایم ایف دی سربراہ نال ڳالھ کیتی، انھاں پاکستان دی معاشی کارکردگی دی تعریف کیتی تے آکھیا جو او ساݙیاں کوششاں توں متاثر ہن۔ وزیراعظم ایں توقع دا اظہار کیتا جو حکومتی اقدامات پاروں خوشحالی قوم دا مقدر تھیسی۔ انھاں کابینہ کوں اپݨے دورہِ چین تے وی اعتماد اچ ڳھدا تے ݙسایا جو چین دے دورے اچ سی پیک فیز 2.0 تے تفصیلی ڳالھ کیتی، ݙوہیں پاسوں چار نکات تے بھرپور توجہ ݙیوݨ تے اتفاق تھیا۔وزیراعظم پاکستان پیپلز پارٹی، بی اے پی، نیشنل پارٹی، ایم کیو ایم سودھے حکومت دی اتحادی جماعتاں دا وی شکریہ ادا کیتا۔