پی ایس ڈی پی 2026-27 دے تحت کھیݙاں دے انفراسٹرکچر دی ترقی کیتے 1.851 ارب روپے رکھئن

اسلام آباد۔ 12 جون (اے پی پی) وفاقی حکومت بین الصوبائی رابطہ ڈویژن دے تحت کھیݙاں دے انفراسٹرکچر دی ترقی دے منصوبیں کیتے پبلک سیکٹر ڈویلپمنٹ پروگرام 2026-27 (پی ایس ڈی پی) اچ تقریباً 1.851 ارب روپے مختص کیتن جیڑھا ملک اچ کھیݙاں دی سہولتاں کوں بہتر بݨاوݨ دے حکومتی عزم دی عکاسی کریندے۔ پی ایس ڈی پی دستاویزات موجب مجموعی طور تے 13 جاری ترقیاتی منصوبے موجودہ سال دے ترقیاتی پروگرام اچ شامل کیتے ڳئن جنھاں دی مجموعی منظور شدہ لاڳت 9.508 ارب روپے اے۔ 30 جون 2026ء تئیں انھاں منصوبیں تے 4.356 ارب روپے خرچ کیتے ونڄ چکن جڈانجو 5.151 ارب روپے دی رقم آندے مالی سال کیتے مختص کیتی ڳئی اے۔اہم منصوبیں اچ پاکستان سپورٹس کمپلیکس اسلام آباد اچ ارشد ندیم تے شہباز شریف ہائی پرفارمنس اسپورٹس اکیڈمی دا قیام شامل اے جیں کیتے 250 ملین روپے مختص کیتے ڳئن۔ ایویں جنوبی ایشیائی کھیݙاں کیتے پاکستان اسپورٹس کمپلیکس اسلام آباد اچ مختلف سہولتاں ݙیوݨ کیتے 134.832 ملین روپے مختص کیتے ڳئن۔ انھاں سہولتاں اچ وارم اپ ٹریک، ہیٹ ایکسچینجر، کوچز دے رہائشی فلیٹس، کثیرالمقاصد ہالز، فینسنگ، فائیو اے سائیڈ ہاکی گراؤنڈ، فٹسال گراؤنڈز تے ماسٹر پلاننگ شامل اے۔ ایں منصوبے دی مجموعی لاڳت 769.391 ملین روپے اے۔اسکردو اچ پاکستان اسپورٹس بورڈ (PSB) کوچنگ سینٹر دی تعمیر کیتے 150 ملین روپے مختص کیتے ڳئن جڈانجو اسلام آباد، فیصل آباد، واہ کینٹ، پشاور، کوئٹہ، مظفرآباد تے سوات سودھے ست شہراں اچ مصنوعی ہاکی ٹرف دی تبدیلی تے تنصیب کیتے 120 ملین روپے رکھے ڳئن۔ ٻئے اہم منصوبیں اچ پاکستان اسپورٹس کمپلیکس تے پی ایس بی کوچنگ سینٹرز اچ الیکٹرانک ڈسپلے تے اسکورنگ سسٹمز دی تنصیب کیتے 271.200 ملین روپے، لیاقت جمنازیم دی ایئرکنڈیشننگ کیتے 158.371 ملین روپے تے پی ایس بی کوچنگ سینٹر کراچی اچ مصنوعی ایتھلیٹکس ٹریک، فٹبال گراؤنڈ، اسپرنکلنگ سسٹم تے فلڈ لائٹس دی تنصیب کیتے 150 ملین روپے شامل ہن۔فیصل آباد اچ ݙو پیڈل کورٹس تے مشتمل کثیرالمقاصد اسپورٹس کمپلیکس دی تعمیر کیتے 144.512 ملین روپے مختص کیتے ڳئن جڈانجو پی ایس بی کوچنگ سینٹر کراچی دی موجودہ سہولتاں دی بحالی تے اپ گریڈیشن کیتے 196.587 ملین روپے رکھیے ڳئن۔ ایں مرکز اچ کھݙاریاں دے ہوسٹل دی تعمیر کیتے 26.415 ملین روپے مختص کیتے ڳئن۔ پاکستان سپورٹس کمپلیکس اسلام آباد اچ جنوبی ایشیائی کھیݙاں دی تیاری دے سلسلے اچ موجودہ سہولتاں دی بحالی تے بہتری کیتے 88.226 ملین روپے جڈانجو سڑکاں، فٹ پاتھاں، مرکزی دروازے، سکیورٹی نظام تے لینڈ اسکیپنگ دی بہتری کیتے 90.569 ملین روپے مختص کیتے ڳئن۔