آپریشن ‘بنیان مرصوص’ اتے ایران امریکا ثالثی اچ کامیابی پاکستان کوں داخلی، خارجی، سفارتی اتے معاشی میدان اچ نویکلی سنڄاݨ ݙیوائی اے، وزیر خزانہ

اسلام آباد۔ 12 جون (اے پی پی) آپریشن ‘بنیان مرصوص’ اتے ایران امریکا ثالثی پاکستان دی قومی تاریخ دا نویکلا باب اے جیندے بعد پاکستان کوں داخلی، خارجی، سفارتی اتے معاشی میدان اچ وݙیاں کامیابیاں ملین۔ قومی اسمبلی اچ آندے مالی سال دا وفاقی بجٹ پیش کریندے ہوئیں وزیرِ خزانہ سینیٹر محمد اورنگزیب آکھیے جو اے بجٹ اینڄھے ویلھے پیش تھیندا پئے ڄݙاں پاکستان اپݨے عوام اتے ڄڳ دی نظر اچ ہک اہم ملک ٻݨ چکیے جیندی آواز سݨی ویندی اے اتے ایندے نال سنڳت ودھاوݨ دی سک کیتی ویندی اے، اے تبدیلی گزریل سال مئی اچ بھارتی جارحیت کوں پاکستان ولوں منہ توڑ جواب ݙیوݨ دے بعد ملی، ساݙیاں مسلح افواج دشمن کوں اینڄھا حیرت انگیز ولدا ݙتے جو او کڄھ ہی ڳھنٹے اچ آپ امن ودھاوݨ تے مجبور تھی ڳئے، اے کامیابی ݙھاکیاں دی پیشہ ورانہ تربیت اتے تیاری دا پھل اے۔ انھاں آکھیا جو آپریشن ‘بنیان مرصوص’ دی کامیابی ساݙی قومی تاریخ دا ہک روشن باب اے، اڄ ڄڳ پاکستان دی دفاعی قوت دا معترف اے، ساݙیاں فضاواں دا تحفظ کرݨ والے فائیٹر جیٹس کوں کئی ملک اپݨی فضائیہ اچ رلاوݨ کیتے پاکستان نال رابطے اچ ہن، ساݙی دفاعی صنعت قیمتی زرمبادلہ کماوݨ دا وی ہک ذریعہ بݨ چکی اے، جیڑھا ثبوت اے جو مضبوط دفاع نہ صرف ساݙی سالمیت کیتے اہم اے ٻھل ملک دی معاشی ترقی کیتے وی ہتھ ونݙا سڳدے۔ انھاں آکھیا جو ایں دفاعی قوت نہ صرف خطے ٻھل ڄڳ اچ ساݙی تزویراتی شراکت داری دا نقشہ نویں سرے توں ترتیب ݙتے۔ انہاں آکھیا جو پاکستان اتے سعودی عرب دے باہمی دفاعی معاہدے پاروں خادمین حرمین الشریفین نال ساݙے تعلقات کون ہک نویں ٻݨیاد ملی اے، اے ہک اعزاز ہی نئیں ہک مقدس ذمہ داری وی اے جیکوں نبھاوݨ کیتے اساں پورے عزم اتے یقین نال سعودی عرب نال کھڑے ہیں۔ انھاں آکھیا جو اڄوکے دور دی ہک خطرناک ترین جنگ اچ امریکہ اتے ایران پاکستان تے اعتماد کریندے ایکوں تریاکل قبول کیتے اتے پاکستان دے این ذمہ دارانہ کردار پاروں خطہ ہک وݙے سلامتی خطرے توں ٻاھرو نکلم اچ کامیاب تھئے، اساں ‘اسلام آباد پیس ٹاکس’ نال امریکہ اتے ایران کوں 47 سال بعد ہک میز تے ڳھن آوݨ اچ کامیاب تھئے ہیں، پاکستان دی کوشش اے جو تیکھے ہک معاہدے نال خطے اچ دیرپا امن یقینی ٻݨایا ونڄے اتے آبنائے ہرمز توں تیل دی سپلائی پہلے آلی کار ممکن تھیوے، اے او وݙی کامیابی اے جیندے نال ساݙا بطور قوم ڄڳ اچ ماݨ ودھیے اتے ایندے سرخیل وزیر اعظم شہباز شریف، فیلد مارشل سید عاصم منیر دی شاندار بصیرت اتے قیادت اے ڄیکوں ڄڳ وی منیے۔ انہاں خطے اچ امن و خوشحالی کیتے پاک چین تعلقات تے وی ماݨ کریندے چین کوں ہک اہم سنڳتی اتے تجارتی شراکت دار قرار ݙتے۔ انہاں آکھیا جو پاکستان اچ سیلاب، بھارت نال جنگ، خطے اچ سلامتی صورتحال دے چیلنجز دے باوجود پاکستان معاشی محاز تے وی سرخرو تھئے، اوکھے اقتصادی حالات دے باوجود حکومت عوام کوں ودھ توں ودھ ریلیف ݙیوݨ دی کوشش کیتی اے، ایں بحران دے باوجود ‘فچ ریٹنگ ایجنسی’ پاکستان دی ریٹنگ کوں مستحکم قرار ݙتے، شہباز شریقف دی قیادت اچ موجودہ حکومت انتھک محنت نال حالات تے قابو پاتے اتے کئی اہم اتے دور رس نتائج نال کامیابیاں حاصل کیتن