وفاقی بجٹ ریلیف، عوامی فلاح، تنخواہ دار طبقے تے ٻھار ڳھٹاوݨ، برآمدات تے سرمایہ کاری ودھاوݨ، معاشی، صنعتی و زرعی ترقی دا بجٹ ہوسی، وزیراعظم محمد شہباز شریف

اسلام آباد۔12 جون (اے پی پی)وزیراعظم محمد شہباز شریف آکھیے جو بجٹ ریلیف، عوامی فلاح اتے تنخواہ دار طبقے تے ٻھار ڳھٹاوݨ، برآمدات ودھاوݨ، صنعتی اتے زرعی ترقی، سرمایہ کاری دا ودھارا اتے معاشی ترقی دا بجٹ اے، ہݨ خوشحالی دا ویلھا شروع تھی چکیے، معاشی استحکام آوݨ نال بجٹ اچ عوام کوں ریلیف ݙتے، ترقی دا سفر بھرپور طریقے نال جاری رہسی اتے عوام دی فلاح و بہبود دی پوری کوشش کریسوں۔ وفاقی بجٹ بارے اپݨے بیان اچ وزیراعظم آکھیے جو اللہ تعالیٰ دا شکر اے جیندے فضل و کرم اتے قوم دیاں دعاواں نال اساں معاشی استحکام حاصل کیتے اتے اڄ اساں بجٹ اچ عوام کوں ریلیف ݙیندے پئے ہیں۔ وزیراعظم آکھیے جو پاکستان دے ہر شہری دا شکریہ ادا کرینداں جئیں اوکھے ترین حالات اچ ݙاݙھا صبر ݙکھائے، اوکھ ݙٹھن اتے اپݨے ملک دے معاشی استحکام کیتے ودھ کردار ادا کیتے، عوام نال وعدہ کیتا ہا جو معاشی استحکام ملدے ہی ایندے ثمرات براہِ راست عام آدمی تئیں پچیسوں، الحمدللہ ہݨ خوشحالی دا ویلھا شروع تھی چکیے۔ انہاں آکھیا جو مشکل دور دے بعد جیہڑی بہتری اتے ریلیف دا میں وعدہ کیتا ہا اتے جیہڑے ریلیف دی میݙی قوم حقدار اے، ایندی شروعات تھی چکی اے، اے بجٹ ریلیف دا بجٹ اے، عوامی فلاح دا بجٹ اے، اے تنخواہ دار طبقے تے ٻھار ڳھٹاوݨ آلا بجٹ اے، اے برآمدات ودھاوݨ، صنعتاں دے ودھارے، زرعی ترقی اتے سرمایہ کاری سودھا معاشی ترقی دا بجٹ اے جیندا بنیادی مقصد معیشت دی مضبوطی دے ثمرات براہِ راست عوام تئیں پچاوݨ اتے ہر طبقہ کوں ایں ترقی اچ رلاوݨ اے، نائب وزیراعظم و وزیر خارجہ اسحاق ڈار، فیلڈ مارشل سید عاصم منیر، وزیر خزانہ محمد اورنگزیب اتے پوری معاشی ٹیم، چارے صوبیاں دے وزرائے اعلیٰ اتے متعلقہ اداریاں دا شکریہ جنہاں دی انتھک محنت، پیشہ ورانہ صلاحیت اتے جذبے ایں ریلیف کوں ممکن ٻݨائے۔ وزیراعظم آکھیا جو “وزیراعظم اپنا گھر پروگرام” دے تحت عوام کوں اپݨی چھت دی سہولت ݙیوݨ توں ڳھن تے ٹیکس ریلیف تئیں، نوجواناں کیتے روزگار دے مواقع پیدا کرݨ، متوسط طبقے تے ٻھار گھٹ کرݨ اتے کاروباری سرگرمیاں کوں ودھاوݨ کیتے تہاڈی حکومت ٹھوس اتے موثر اقدامات کیتن، انشاء اللہ تعالیٰ ترقی دا اے سفر بھرپور طریقے نال جاری رہسی اتے اساں عوام دی فلاح و بہبود کیتے ہرممکن اقدامات کریسوں