آئین، قانون تے جمہوریت دے فروغ کیتے اپوزیشن نال ڳالھ مہاڑ کیتے تیار ہیسے، اساکوں آپݨی سکیورٹی فورسز دی قربانیاں دا احترام کرݨا پوسی، وزیر اعظم محمد شہباز شریف

اسلام آباد۔13 جون (اے پی پی) وزیر اعظم محمد شہباز شریف ہک واری ولا ایں عزم دا اعادہ کیتے جو آئین، قانون تے جمہوریت دے فروغ کیتے اپوزیشن نال ڳالھ مہاڑ کیتے تیار ہیسے، دہشت گردی دے خاتمے کیتے اساݙی سکیورٹی فورسز آپݨی جاناں دا نذرانہ پیش کریندی پئن، اساکوں آپݨی سکیورٹی فورسز دی قربانیاں دا احترام کرݨا پوسی۔ ہفتہ کوں قومی اسمبلی اچ ڳالھ کریندیں ہوئیں وزیراعظم شہباز شریف آکھیا جو قائدِ حزبِ اختلاف جیڑھے نکات چاتن، سب کوں غور نال سݨیے، انھاں جیڑھے نکات چاتے انھاں دا جواب مناسب موقع تے تفصیل نال ݙیسے۔ ایں ایوان دے منتخب ارکان پاکستان دے چاریں صوبیاں توں تعلق رکھیندن اتے اساکوں سب دا احترام اے، اے ایوان ہک گھر وانگوں اے، اساں سب کوں پاکستان کوں مضبوط بݨاوݨ اتے تعلقات اچ کتھائیں دراڑ اے تاں ایں کوں دور کرݨ کیتے آپݨا کردار ادا کرݨا اے، عزت و احترام کوں فروغ ݙیوݨا اے، سیاست، نظریات تے سوچ آپݨی آپݨی اے لیکن پاکستان اے تاں اساں سارے ہیسے، ایں کیتے جو وی قربانی ݙتی ونڄے او ڳھٹ اے۔ انھاں آکھیاجو قائدِ حزبِ اختلاف صوبیاں دے وسائل دا معاملہ چاتا، صوبیاں دے معاشی وسائل انھاں دا حق اے، ایں اچ کوئی اختلاف کائنی، ریکوڈک معاہدہ ہک روشن مثال اے، بلوچستان دے زعماء نال بھرپور مشاورت نال اے معاہدہ معرضِ وجود اچ آیا، ایں اچ بلوچستان دا حصہ سب دے سامݨے اے۔ انھاں آکھیا جو 2010 دا این ایف سی (NFC) ایوارڈ پاکستان دی تاریخ دا ݙاہواں ایوارڈ اے، انھاں آکھیا جو بلوچستان ہک خوبصورت صوبہ ہووݨ دے نال نال دلیر لوکاں دی سرزمین اے، ایں دے حصے اچ سو فیصد اضافہ کیتا ڳیا، تمام صوبیاں ایں اچ قربانی ݙتی اتے پنجاب آپݨے حصے توں سب توں ودھ بلوچستان کوں ݙتا۔ پنجاب 11 ارب روپے بلوچستان کوں آپݨے حصے توں سالانہ ݙتن۔ جے اساݙے کول ہک روٹی ہوسی تاں اساں رل ونڈ کراہیں کھاسوں، اے احسان نئی یکجہتی اے۔ انھاں آکھیا جو معاشی تے معاشرتی انصاف دے بغیر گھر وی نئی چلدا۔ ݙو سال پہلے بلوچستان دے کاشتکار کوں 70 ارب روپے دی لاگت نال سولر پینلز ݙتے، ایں اچ 50 ارب روپے وفاق ݙتے جیڑھے ایثار تے بھائی چارے دی مثال اے، ایں کار 300 ارب روپے دی لاگت نال گوادر توں چمن ݙورویہ کیرج وے تعمیر کیتی ویندی پئی اے قائدِ حزبِ اختلاف دا مطالبہ نہ ہئی بلکہ بطورِ وزیراعظم میݙی ذمہ واری ہئی جو میں او اقدامات چاواں جئیں نال چاریں صوبے ترقی دی دوڑ اچ برابر ہوون۔ تاہم ایں کیتے وقت درکار اے راتوں رات ممکن نئی، اے رل کراہیں ای ممکن اے۔ انھاں آکھیا جو افواجِ پاکستان دی وطن دے دفاع کیتے قربانیاں لازوال ہن، ترائے ݙینھ پہلے ہک ہیلی کاپٹر حادثے اچ 22 افسراں تے جوان شہید تھئے، انھاں اچ ݙو مسیحی وی شامل ہن، ایں کار بلوچستان اچ ݙینھ رات دہشت گردی دا مقابلہ کریندے پئیوں اتے ایں دہشت گردی اچ مالی تے تکنیکی معاونت دے خارجی ہتھ دے ملوث ہووݨ دے ثبوت موجود ہن، بلوچستان اچ سرحد تے باڑ آپݨی سلامتی کیتے لاتی ڳئی اے۔ خیبر پختونخوا اچ ݙینھ رات دہشت گردی تھیندی پئی اے اتے افواجِ پاکستان ݙینھ رات انھاں دا مقابلہ کریندی پئن، افسر تے جوان شہید تھیندے پئن اتے او آپݨے ٻالاں کوں یتیم کرتے پاکستان دے کروڑاں ٻالاں کوں یتیم ہووݨ توں بچیندن، اساکوں رل کراہیں انھاں دی قربانیاں کوں عزت و تکریم ݙیوݨی پوسی۔ انھاں آکھیا جو ہیلی کاپٹر حادثے اچ شہیداں دی نمازِ جنازہ اچ شرکت کیتی تاں شہداء دے معصوم ٻالاں نال وی ملیا جنھاں کوں اے وی علم نئی جو انھاں دے والدین شہید تھی ڳئن۔ ہݨ انھاں کوں زندگی دیاں مشکلات دا سامنا کرݨا پوسی۔ انھاں آکھیا جو جے اساں اڄ غفلت کیتی تاں آوݨ آلی نسلاں اساکوں معاف نہ کریسن۔ انھاں آکھیا جو قائدِ حزبِ اختلاف جے جاتی عمرہ کوں آپݨا گھر سمجھدن تاں میں وی جݙاں کوئٹہ ویندا ہمی تاں انھاں دے گھر ویندا ہمی، اے کوئی پوائنٹ سکورنگ نئی ۔ وزیر اعظم آکھیا جو آئین، قانون تے جمہوریت دے فروغ کیتے ڳالھ مہاڑ کیتے تیار ہیسے، ماضی اچ بطورِ اپوزیشن لیڈر وی میثاقِ جمہوریت وانگوں میثاقِ معیشت دی دعوت ݙتی ہئی جڈانجو ایں کوں حقارت نال ٹھکرایا ڳیا، اساں اڄ وی ایں کیتے تیار ہیسے۔