امریکہ ایران امن معاہدہ عالمی امن کیتے تاریخی، پاکستان 19 جون کوں جنیوا اچ معاہدے تے دستخطاں دی تقریب دی میزبانی کریسی، وزیراعظم شہباز شریف

اسلام آباد۔15 جون(اے پی پی)وزیرِ اعظم شہباز شریف امریکہ اتے ایران وچال امن معاہدے کوں عالمی امن کیتے ہک تاریخی سنگِ میل قرار ݙیندے آکھیے جو ایں تاریخی امن معاہدے تے دستخط دی باضابطہ تقریب، جمعہ 19 جون کوں، جنیوا اچ پاکستان دی میزبانی اچ تھیسی، اے صرف ݙو ملکاں وچال ہک معاہدہ نئیں ٻھل امن اتے مکالمے دی طاقت دی فتح اتے سفارتکاری دی کامیابی اے، انہاں اے ڳالھ امریکہ دے صدر ڈونلڈ ٹرمپ ولوں امن معاہدہ طے پاوݨ دے اعلان دے بعد قومی اسمبلی اچ خطاب کریندے آکھی۔ وزیرِ اعظم شہباز شریف اللہ تعالیٰ دا دا شکر ادا کریندے آکھیے جو اڄ ڄڳ امن دا ہک تاریخی سنگِ میل پار کیتے، جنگ دی اندھاری رات دے بعد الحمداللہ امن دا سڄھ اٻھردا پئے اتے وݙی ازمائش دے بعد امریکہ اتے ایران لبنان سودھا سارے محاذاں تے فوجی کارروائیاں دے فوری اتے مستقل خاتمے دا اعلان کر ݙتے۔ انہاں آکھیا جو جمعہ 19 جون کوں، جنیوا اچ امن معاہدے تے دستخطاں دی تقریب دی میزبانی پاکستان کریندا پئے، جنگ دے ودھدے شعلیاں کوں روک تے امن سانڳے ساݙیاں مخلصانہ کوششاں کوں اللہ تعالیٰ اپݨی کمال مہربانی نال پذیرائی ݙتی اے اتے ڄڳ اچ پاکستان کوں او ماݨ ملیے جیندے کیتے قوماں صدیاں تئیں ترسدن، اڄ جیڑھی عزت پاکستانیاں کوں ملی اے ایندی تاریخ اچ مثال نئیں ملدی۔ انھاں پاکستانی قوم سودھا پوری عالمی برادری کوں ایں کامیابی تے مبارک ݙیندے آکھیا جو میں صدرِ مملکت آصف علی زرداری، چیئرمین پاکستان پیپلز پارٹی بلاول بھٹو زرداری، پارٹی سربراہان کوں مبارک ݙینداں جنہاں پوری حمایت کیتی، اے صرف ݙو ملکاں وچال معاہدہ نئیں ٻھل امن اتے مکالمے دی طاقت دی فتح اے، اے جنگ دیاں تباہ کاریاں دے مقابلے اچ سفارتکاری دی کامیابی اے۔  انہاں ایوانِ زیریں دی بھرپور تائید نال امریکہ دے صدر ڈونلڈ ٹرمپ، ایران دے سپریم لیڈر سید مجتبیٰ خامنائی، ایران دے صدر مسعود پزشکیان اتے امن دے ایں عمل اچ شریک انھاں دیاں ٹیماں دے ارکان کوں وی مبارک ݙتی جنہاں اوکھے حالات اچ صبر، سمجھ بوجھ نال کم ڳھندے ہوئے اے کامیابی ڳھدی اے۔ انہاں آکھیا جو امن عمل کیتے قطر دے امیر شیخ تمیم بن حمد آل ثانی دے بھرپور تعاون دے مشکور ہیں، سعودی عرب دے ولی عہد شہزادہ محمد بن سلمان، ترکیہ دے صدر طیب ایردوان دی دور اندیش قیادت وݙا ساتھ ݙتے۔ وزیراعظم پاکستان دے عظیم دوست چین دے صدر شی جن پنگ دا وی خصوصی شکریہ ادا کیتے جنھاں امن مذاکرات کوں اڳوں ودھاوݨ اچ مکمل حمایت کیتی اتے پاکستان نال صضاح مشورے کیتن۔ انھاں آکھیا جو ایویں ہی ڄڳ دے کئی ملکاں ایں تاریخ ساز ݙینھ دے موقع تے شکریہ ادا کرینداں، آؤ اساں سارے رل تے اللہ دے حضور سجدہِ شکر کڑوں ڄئیں ساݙے تے اے کرم کیتے۔ وزیرِ اعظم آکھیا جو اڄ دے ایں تاریخ ساز ݙینھ، پاکستان دے عظیم اتے بہادر فرزند، فیلڈ مارشل سید عاصم منیر دا ناں ڳھدے بغیر میݙی تقریر نامکمل رہسی، ایں جنگ دے شعلے ٻُڄھاوݨ اتے امن کیتے فیلڈ مارشل سید عاصم منیر رات ݙینھ ہک کر ݙتے، مذکارات اچ کئی اوݨ پوݨ آئن، ٻھل پاکستان دے ایں عظیم سپوت ہمت نئیں چھؤری اتے اللہ تعالیٰ تے توکل کریندے کوششاں جاری کھین جیندے بعد کل رات کوں جنگ بندی دا باضابطہ اعلان کیتا ڳئے۔ وزیرِ اعظم آکھیا ڄیکر خلوص، استقامت اتے دانشمندی دا اے سفر جاری نہ رہندا، تاں شاید دنیا اچ امن دا خواب بکھر ویندا اتے جنگ وݙی تباہی کھنݙیندی، ایں سانڳے فیلڈ مارشل سید عاصم منیر غیر معمولی کردار ادا کیتے، ڄیندے تے میں سودھا پوری قوم انھاں کوں خراجِ تحسین پیش کریندی اے۔ وزیرِ اعظم نائب وزیراعظم تے وزیر خارجہ سینیٹر محمد اسحاق ڈار کوں وی مبارک ݙتی ڄئیں ݙینھ رات محنت نال امن کیتے کامیابی سانڳے بھرپور کردار ادا کیتے۔ انھاں برادر ملک ایران دے حوالے نال، وفاقی وزیرِ داخلہ محسن نقوی دی خدمات کوں وی سراہیا جنھاں ݙاݙھی ذمہ داری نال اہم امور نٻیڑین، انہاں وزارتِ خارجہ دے افسران دی وی تعریف کیتی اتے آکھیے جو اے سارے پاکستان دا ماݨ ہین، اڄ دا ݙینھ، نہ صرف پاکستان اچ وسݨ والیاں ٻھل ڄڳ اچ آباد ہر پاکستانی کیتے اعاز دی ڳالھ اے۔ انہاں آکھیا جو ایں جنگ دے اثرات توں پوری دنیا اتے ایںدی معیشت ہل ڳئی ہئی، پاکستان دی معیشت وی شدید دباؤ وات آئی، اے جھٹکے ہݨ تئیں جاری ہین ٻھل قوم ݙاݙھے صبر اتے برداشت نال حکومت دا پورا ہتھ ونݙائے، اساں ویلھے سر فیصلیاں نال اپݨی قوم کوں مہنگائی دی شدت توں ممکنہ حد تئیں بچاوݨ دی پوری کوشش کیتی اے، ایں سانڳے صوبائی حکومتاں وی نال ہن، ایں امن معاہدے نال عالمی معاشی استحکام دے ثمرات اپݨیاں اجتماعی کوششا اتے صلاحیتاں استعمال کریندے ہر پاکستانی تئیں پچیسوں۔