گلگت بلتستان اچ 100 میگا واٹ سولر منصوبے دے اخراجات وفاقی حکومت چیسی، وزیراعظم شہباز شریف

اسلام آباد۔16 جون(اے پی پی)وزیراعظم محمد شہباز شریف آکھیے جو گلگت بلتستان دے عوام کیتے 100 میگا واٹ شمسی بجلی دے منصوبے دے سارے اخراجات وفاقی حکومت چیسی۔ منگل کوں وزیرِ اعظم آفس دے میڈیا ونگ دے جاری کیتے ڳئے بیان دے مطابق انھاں اے ڳالھ گلگت بلتستان اچ 100 میگا واٹ شمسی توانائی دے منصوبے تے ہک جائزہ اجلاس دی اڳواݨی کریندے آکھی۔ اجلاس اچ وفاقی وزیر منصوبہ بندی احسن اقبال، وفاقی وزیر اقتصادی امور احد خان چیمہ، وفاقی وزیر پاور ڈویژن سردار اویس احمد خان لغاری، وزیر برائے امورِ کشمیر و گلگت بلتستان انجینئر امیر مقام اتے متعلقہ سرکاری افسران شرکت کیتی۔ وزیراعظم منصوبے تے کم کوں تیکھا کرݨ، منصوبے کوں فوری مکمل کرݨ اتے ایںدے مراحل اچ شفافیت یقینی ٻݨاوݨ کیتے غیر جانبدار تھرڈ پارٹی ویلیڈیشن دی ہدایت کیتی۔ اجلاس اچ متعلقہ حکام گلگت بلتستان اچ وفاقی حکومت دے سولر منصوبے دے حوالے نال بریفنگ ݙتی۔ بریفنگ اچ ݙسیا ڳیا جو گلگت بلتستان دی سرکاری عمارتاں کیتے 18 میگا واٹ شمسی توانائی دا منصوبہ اے، گلگت اتے دیامیر ڈویژنز دی سرکاری عمارتاں کیتے 18 میگا واٹ دا منصوبہ دسمبر 2026ء اتے بلتستان ڈویژن دی سرکاری عمارتاں دی سولرائزیشن دا منصوبہ اکتوبر 2026ء تئیں مکمل تھیسی، ڄݙاں جو گلگت، سکردو، چلاس اتے خپلو اچ گھراں کیتے 82 میگا واٹ دے شمسی توانائی دے منصوبے تے وی کم جاری اے۔