اسلام آباد۔16 جون(اے پی پی)نائب وزیراعظم تے وزیرِ خارجہ سینیٹر محمد اسحاق ڈار چین دی کمیونسٹ پارٹی (سی پی سی) دی مرکزی کمیٹی دے پولیٹیکل بیورو دے رکن اتے چین دے وزیرِ خارجہ وانگ یی نال ٹیلیفون تے ڳالھ مہاڑ کیتی۔ ݙوہائیں رہنماواں ایران اتے امریکہ وچال مفاہمتی یادداشت (ایم او یو) دے تحت طے پاوݨ آلی مفاہمت دا خیرمقدم کریندے ایکوں خطے اچ پائیدار امن اتے استحکام دے ودھارے …
نائب وزیراعظم سینیٹر محمد اسحاق ڈار دی چین دے وزیرِ خارجہ نال ٹیلیفونک ڳالھ مہاڑ
اسلام آباد۔16 جون(اے پی پی)نائب وزیراعظم تے وزیرِ خارجہ سینیٹر محمد اسحاق ڈار چین دی کمیونسٹ پارٹی (سی پی سی) دی مرکزی کمیٹی دے پولیٹیکل بیورو دے رکن اتے چین دے وزیرِ خارجہ وانگ یی نال ٹیلیفون تے ڳالھ مہاڑ کیتی۔ ݙوہائیں رہنماواں ایران اتے امریکہ وچال مفاہمتی یادداشت (ایم او یو) دے تحت طے پاوݨ آلی مفاہمت دا خیرمقدم کریندے ایکوں خطے اچ پائیدار امن اتے استحکام دے ودھارے کیتے اہم قرار ݙتا۔ وزیرِ خارجہ وانگ یی پاکستان دیاں فعال سفارتی کاوشاں اتے مؤثر ثالثی دیاں کوششاں کوں ٻہوں سراہے جنھاں ایران اتے امریکہ وچال مسلسل رابطے اتے مذاکرات کیتے سازگار ماحول پیدا کرݨ اچ مدد ݙتی۔ انھاں بین الاقوامی امن و استحکام دے ودھارے اچ پاکستان دے اہم کردار کوں وی خراجِ تحسین پیش کیتا۔ دفترِ خارجہ توں جاری کیتے ڳئے بیان دے مطابق نائب وزیراعظم و وزیرِ خارجہ ایران اتے امریکہ وچال مذاکرات اتے سفارتکاری ودھاوݨ کیتے پاکستان دیاں کوششاں اچ چین دی مستقل حمایت دی تعریف کیتی۔ انھاں علاقائی امن و استحکام دی بحالی کیتے چین دیاں اہم خدمات، بالخصوص صدر شی جن پنگ دی چار نکاتی تجویز اتے پاکستان-چین پانچ نکاتی اقدام دا وی ذکر کیتا۔ ݙوہائیں رہنماواں زور ݙتا جو فریقین وچال طے پاوݨ آلی مفاہمت اتے مؤثر عملدرآمد اتے باقی رہ ونڄݨ آلے مسلیاں دے پرامن حل کیتے مسلسل رابطہ اتے مشاورت ضروری اے۔ انھاں عالمی معیشت، توانائی دے تحفظ اتے بین الاقوامی تجارت کیتے آبنائے ہرمز دے کھلے رہݨ دی اہمیت تے وی زور ݙتے۔ فریقین وزیرِ اعظم شہباز شریف دے حالیہ کامیاب دورہ چین تے وی الایا اتے ایندے نتائج تے مؤثر عملدرآمد اتے پیشرفت جاری رکھݨ تے اتفاق کیتے۔ نائب وزیراعظم و وزیرِ خارجہ سی پیک تے مشترکہ طور تے کم کرݨ اتے ݙوطرفہ اقتصادی و سرمایہ کاری تعاون ٻیا ودھاوݨ تے زور ݙتے۔ انہاں باہمی دلچسپی دے اہم ݙوطرفہ اتے علاقائی امور تے قریبی رابطہ برقرار رکھݨ اتے مشاورت جاری رکھݨ تے اتفاق کیتے۔
