وفاقی بجٹ ریلیف آلا اتے پچھلے بجٹاں توں مختلف اے؛ معاشی استحکام، ٹیکس اصلاحات اتے موثر انفورسمنٹ نال تنخواہ دار طبقے، برآمد کنندگان، آئی ٹی، نوجواناں سودھا ہر شعبے کوں ودھ ریلف ݙتے، عطاء اللہ تارڑ

اسلام آباد۔17 جون(اے پی پی)وفاقی وزیرِ اطلاعات و نشریات عطاء اللہ تارڑ آندے مالی سال 27-2026ء دے وفاقی بجٹ کوں ’’ریلیف تے مبنی اتے پچھلے بجٹاں توں مختلف‘‘ قرار ݙیندے آکھیے جو حکومت معاشی استحکام، ٹیکس اصلاحات اتے مؤثر انفورسمنٹ نال مالی گنجائش کݙھ تے تنخواہ دار طبقے، برآمد کنندگان، صنعت، ہاؤسنگ، زراعت، آئی ٹی تے نوجواناں سودھا مختلف شعبیاں کوں ودھ ریلیف ݙتے، وزیراعظم شہباز شریف دی قیادت اچ معیشت کوں ڈیفالٹ دے خطرات، ودھدی مہنگائی، غیر مستحکم شرحِ تبادلہ اتے گھٹ ترین زرمبادلہ ذخائر جیویں سنگین چیلنجز توں کڈھ تے استحکام دی راہ تے سٹیے ڄڈاں جو ایف بی آر اصلاحات، ڈیجیٹلائزیشن، ٹیکس نظام دی بہتری، وݙے شعبیاں توں مؤثر وصولیاں، ہاؤسنگ اتے برآمدی شعبے کیتے مراعات، نوجواناں کیتے قرض و ہنرمندی پروگرامز، زرعی مشینری اتے ڈیوٹی دے خاتمے اتے آئی ٹی و فری لانسرز کیتے سہولتاں نال وسیع معاشی سرگرمی اتے عوامی ریلیف کوں یقینی ٻݨایا ڳئے۔ انھاں اے ڳالھ آن لائن بریفنگ اچ آکھی۔ ایں موقع تے وزیرِ مملکت برائے خزانہ بلال اظہر کیانی وی انھاں دے نال ہن۔ وفاقی وزیرِ اطلاعات آکھیا جو کڄھ لوکاں کوں محض تنقید دی عادت اے اتے او تنقید برائے تنقید تے یقین رکھیندن، ایں بجٹ دی مخالفین وی تعریف کریندے پئن، اللہ تعالیٰ دے فضل و کرم نال ریلیف تے مبنی بجٹ ٻݨائے۔ وفاقی وزیر آکھیا جو ماضی اچ پی ٹی آئی دے لوک دعویٰ کریندے پئن جو ملک اڄ دیوالیہ تھیسی، کل دیوالیہ تھیسی، اوں دور اچ زرمبادلہ دے ذخائر گھٹ ترین سطح تے آ چکیے ہن، درآمدی ضروریات پوریاں کرݨ کیتے وسائل موجود کائنا ہن، شرحِ تبادلہ شدید اتار چڑھاؤ دا شکار ہئی، روپیہ مستحکم نا ہئی، برآمد کنندگان کیتے ایل سیز کھلواوݨ اوکھا ہئی، اینڄھی صورتِ حال ہئی جیڑھی مہنگائی 38 فیصد تئیں پڄ چکی ہئی اتے 50 فیصد تئیں پڄݨ دی پیشنگوئی کیتی ویندی پئی ہئی، شرحِ سود 22 فیصد توں اتے ونڄ چکی ہئی، ترسیلاتِ زر اچ وی نمایاں کمی تھی چکی ہئی۔ عطاء اللہ تارڑ آکھیا جو پیرس اچ عالمی مالیاتی فنڈ (آئی ایم ایف) نال معاملات طے نہ تھیندے، تاں خدشہ ہئی جو شاید ملک ڈیفالٹ کر ویندا۔ وزیراعظم شہباز شریف آئی ایم ایف نال کامیاب مذاکرات کیتے، اتے معاشی استحکام آئے، پچھلے ݙو سال اچ وزیراعظم وعدہ کیتا ہا جو گنجائش ملدے ہی عوام کوں ریلیف ݙتا ویسی، اتے انہاں اپݨا وعدہ پورا کیتے۔ وزیرِ اطلاعات آکھیا جو حکومت ایف بی آر اچ اصلاحات کیتن، سفارش کلچر ختم کیتے، ٹیکس وصولی دے نظام کوں مربوط کیتے۔ انھاں آکھیا جو وزیراعظم شہباز شریف دا وژن واضح ہئی جو ٹیکس ݙیوݨ والیاں تے ٹیکس نہ ݙیوݨ والیاں دا بوجھ نئیں پاتا ونڄ سڳدا۔ انھاں آکھیا جو کسٹم ہووے یا انکم ٹیکس، سفارش اتے تقرری دا سلسلہ ختم تے مکمل میرٹ دا نظام متعارف کروایا ڳئے۔ بندرگاہواں توں گھن تے انکم ٹیکس دفاتر تئیں شفاف اتے میرٹ تے مبنی نظام قائم اے جڈانجو بندرگاہواں تے ’’فیس لیس اپریزل‘‘ دا نظام نافذ اے، فیس لیس سسٹم اچ تاخیر یا ناجائز مطالبیاں دی گنجائش ختم تھی چکی اے۔ انھاں آکھیا جو چینی، مشروبات، سیمنٹ اتے تمباکو جھیاں کڄھ وݙیاں صنعتاں غیر معمولی منافع کماوݨ دے باوجود متناسب ٹیکس ادا نئیں کریندیاں پیاں، اصلاحاتی عمل نال صرف شوگر انڈسٹری توں 60 ارب روپے اضافی ٹیکس وصول تھیا، تمباکو دی صنعت اچ ݙو سو ارب روپے دی لیکج ہئی، چھاپے مار تے غیر قانونی تجارت کوں روکیا ڳیا جڈانجو مشروبات اتے سیمنٹ دے شعبیاں اچ وی نگرانی دا عمل جاری اے، ساݙا مقصد اے جو وݙے شعبے وی اوہو ٹیکس ادا کرن جیڑھا انھاں تے لاگو اے تاں جو انھاں دا بوجھ صرف تنخواہ دار طبقے تے نہ پووے۔ انھاں آکھیا جو حکومت ٹیکس تنازعات اتے مقدمات دے حل کیتے نویں ٹریبونلز قائم کیتن، زیرِ التوا مقدمات دے فیصلاں نال کئی سو ارب روپے دیاں وصولیاں ممکن تھئین، حکمِ امتناع ختم کروا تے متعلقہ اداریاں کوں مکمل ریکوری دیاں ہدایات ݙتیاں ڳئن، صرف ہک سال اچ تقریباً آٹھ سو ارب روپے دی اضافی وصولی انفورسمنٹ دے ذریعے کیتی ڳئی۔ انھاں اصلاحات نال حکومت عوام کوں ریلیف ݙیوݨ کیتے مالی گنجائش پیدا کیتی۔ حکومت دا مؤقف واضح ہئی جے تئیں ٹیکس نظام بہتر نا تھیسی، ایف بی آر ریفارمز نا ہوسن اتے آئی ٹی بیس سسٹم نا آسن، نظام بہتر نئیں تھی سڳدا۔ انھاں آکھیا جو میلنڈا بل گیٹس فاؤنڈیشن ایف بی آر دی ڈیجیٹلائزیشن اچ شامل رہی، دنیا دے بہترین انسٹیٹیوشنز توں پڑھے ہوئے لوک ایں ویلھے آئی ٹی سسٹم چلیندے پئن۔ وفاقی وزیر آکھیا جو پی ٹی آئی دی حکومت وی اے اقدامات کر سڳدی ہئی، انھاں اقدامات نال تنخواہ دار طبقے کوں ریلیف ݙتا ڳیا۔ وفاقی وزیر آکھیا جو 50 ہزار روپے ماہانہ تنخواہ تے کوئی ٹیکس نا ہوسی، 50 ہزار توں ہک لکھ روپے ماہانہ آمدݨ تے صرف ہک فیصد ٹیکس مقرر کیتا ڳئے، ٻئے آمدݨ والے طبقیاں کیتے وی ٹیکس شرح اچ کمی کیتی ڳئی اے، تنخواہ دار طبقے تے ٻھار گھٹ کرݨ اہم مطالبہ ہئی جیکوں پورا کیتا ڳیا۔ وفاقی وزیر آکھیا جو بجٹ اچ ہاؤسنگ سیکٹر دے حوالے نال اہم اقدامات تجویز کیتے ڳئن، 5 اتے 10 مرلے دے گھر یا پلاٹ گھنݨ اتے ویچݨ والیاں دا ٹیکس ٻہوں گھٹ کر ݙتا ڳئے، اپݨا گھر پروگرام کیتے 90 ارب روپے مختص کیتے ڳئن جڈانجو 11 ارب روپے جاری کیتے ڳئن، ہاؤسنگ سیکٹر اچ سرمایہ کاری نال نہ صرف تعمیرات بھل سیمنٹ، بجری، سریا، فٹنگز اتے ٻیاں متعلقہ صنعتاں سودھا 12 توں ودھ شعبے متحرک تھیندن. انھاں آکھیا جو بجٹ اچ برآمد کنندگان کیتے پیشگی ٹیکس ختم کر ݙتا ڳئے، سپر ٹیکس دے خاتمے دا وی اعلان کیتا ڳیا۔ وفاقی وزیر آکھیا جو برآمد کنندگان ودھ منافع حاصل کریسن تاں او نویں سرمایہ کاری کریسن، صنعتیں پھل چیسن اتے ’’میڈ اِن پاکستان‘‘ مصنوعات عالمی منڈی اچ مزید مسابقتی ٻݨ سڳسن۔ انھاں آکھیا جو ایکسپورٹ ری فنانسنگ سکیم دے تحت شرحِ سود صرف چار فیصد مقرر کیتی ڳئی اے، اے سہولت برآمدی صنعت کیتے وݙا ریلیف منی ویندی پئی اے۔ وفاقی وزیر آکھیا جو نوجواناں کیتے وزیراعظم یوتھ پروگرام دے تحت وݙے پیمانے تے فنڈز مختص کیتے ڳئن۔ زرعی اتے کاروباری قرضیاں توں ساݙھے 5 لکھ نوجوان مستفید تھیسن۔ فنی تربیت دے اداریاں کوں مضبوط کیتا ویندا پئے تاں جو نوجواناں کوں جدید ہنر ݙتے ونڄ سڳن۔ انھاں آکھیا جو کھیݙاں دے شعبے اچ سپورٹس ٹیلنٹ ہنٹ پروگرام کوں مزید وسعت ݙتی ڳئی اے، سپورٹس ٹیلنٹ ہنٹ پروگرام توں ایں واری پاکستان سپر لیگ اچ وی ٻہوں سارے کھلاڑی سامݨے آئے، ارشد ندیم سودھا ٻہوں سارے کامیاب سپورٹس مین سامݨے آئے، دانش سکولز، دانش یونیورسٹی جھئیں منصوبیاں کوں اڳو ودھایا ویندا پئے تاں جو نوجوان نسل کوں بہتر تعلیمی مواقع مل سڳن۔ انھاں آکھیا جو ایگریکلچر بارے مشینری دی امپورٹ ڈیوٹی ختم کر ݙتی ڳئی اے، ہݨ اے مشینری آسانی نال منگوائی ونڄ سڳسی۔ سپر ٹیکس اتے ایڈوانس ٹیکس ختم کیتا ڳئے، پرائیویٹ سیکٹر کیتے ٻہوں ساریاں سہولیات پیدا کیتن۔ ہک سوال دے جواب اچ وفاقی وزیر آکھیا جو آئی ٹی اتے ٹیکس رعایت کوں جاری رکھا ڳئے، فری لانسرز تے کوئی اضافی بوجھ اتے اضافی ٹیکس نئی، آئی ٹی سرسیز حکومت دی اولین ترجیح ہین، آئی ٹی کمپنیاں کوں رعایت ݙتی ڳئی تاں جو او اپݨے معاملات اڳو تے چلا سڳن۔ ہک ٻئے سوال دے جواب اچ وفاقی وزیر آکھیا جو تقریباً 36 لکھ ریٹیلرز ٹیکس نیٹ توں ٻاہرو ہین، تاجر تنظیماں نال مشاورت دے بعد انھاں کیتے فکسڈ ٹیکس سکیم گھن آئی ڳئی اے، ریٹیلرز گھٹ توں گھٹ 25 ہزار روپے سالانہ ٹیکس ادا کریسن، انھاں کوں ایف بی آر دا سرٹیفیکیٹ جاری کیتا ویسی، اے ٻہوں وݙا اقدام اے، پورے پاکستان دیاں تاجر تنظیماں آن بورڈ ہن۔ ہک سوال دے جواب اچ عطاء اللہ تارڑ آکھیا جو جیولرز دیاں ڈیمانڈز دا ہک پورا چارٹ ساݙے کولو آئے ایندا جائزہ ڳھندے پئے ہیں، ایں سانڳے پالیسی ترتیب ݙتی ویسی۔ عطاء اللہ تارڑ آکھیا جو زرعی آلات دی درآمد تے ہر قسم دی ڈیوٹی ختم کر ݙتی ڳئی اے، یوتھ بزنس لون دے تحت زرعی شعبے اتے نوجوان گریجویٹس کوں پروموٹ کرݨ کیتے ہک ارب روپے توں ودھ رقم مختص کیتی ڳئی اے، ایں سال زرعی گریجویٹس کوں مزید تعلیم کیتے چین بھیجا ڳیا، ایگریکلچرل انوویشن کیتے سکیم جاری رہسی، ذرخیزی سکیم دے تحت ایگریکلچر فنانس تے شرحِ سود کوں ٻہوں گھٹ کیتا ویسی، تنخواہ دار طبقہ، انڈسٹری، ایکسپورٹرز سب کوں ایں بجٹ اچ فائدہ ݙتا ڳئے۔ انھاں آکھیا جو ایں بجٹ دا ہر طبقہ تعریف کریندا پئے، وزیراعظم شہباز شریف اپݨی پوری ٹیم نال معاشی استحکام کیتے ݙینھ رات محنت کیتی۔ وزیرِ خزانہ سینیٹر محمد اورنگزیب، فیلڈ مارشل سید عاصم منیر اتے انھاں دی ٹیماں اتے ایس آئی ایف سی سودھا سارے سٹیک ہولڈرز معاشی استحکام کیتے اپݨا کردار ادا کیتا۔ اڄ ملک معاشی استحکام دو ودھدا پئے جیڑھا اجتماعی کاوشوں دا نتیجہ اے، اے اقدامات ٹیم ورک دا نتیجہ ہن جیندے اچ محمد نواز شریف دا وژن شامل اے۔ مسلم لیگ ن ہمیشہ ملک دی خدمت کیتی اے، ݙو سال اچ ودھ توں ودھ ریلیف پیدا کرݨ دی کوشش کیتی ڳئی اتے اساں اپݨا وعدہ پورا کیتے۔