چیئرمین آئی سی ٹی (پیرا) دی اڳواݨی اچ اجلاس، اسلام آباد دے نجی تعلیمی اداریاں ولوں 10 فیصد مستحق طلبہ کیتے لازمی اسکالرشپس تے عملدرآمد دا جائزہ

اسلام آباد۔ 17 جون(اے پی پی) سینیٹ دی قائمہ کمیٹی برائے وفاقی تعلیم و پیشہ ورانہ تربیت دیاں ہدایات تے وفاقی سیکرٹری تعلیم دی خصوصی رہنمائی اچ چیئرمین آئی سی ٹی (پیرا) ڈاکٹر غلام علی ملاح دی اڳواݨی اچ ہک اہم اجلاس تھئے۔ اجلاس اچ اسلام آباد دے نجی تعلیمی اداریاں دی ولوں رائٹ ٹو فری اینڈ کمپلسری ایجوکیشن ایکٹ 2012 دے تحت 10 فیصد مستحق طلبہ کیتے لازمی اسکالرشپس تے عملدرآمد دا جائزہ ڳھدا ڳئے۔ اجلاس اچ چنتا کیتا ڳئے جو ٻہوں سارے نجی تعلیمی اداریاں کئی واری چتاوݨی دے باوجود اسکالرشپ بارے مطلوبہ معلومات نئیں ݙتیاں، اتھارٹی قانون تے مکمل عملدرآمد یقینی ٻݨاوݨ کیتے ہر اقدام چیسی۔ ڈاکٹر غلام آلی ملاح آکھیا جو سکول توں ٻاھرو رہ ونڄݨ آلے ٻالاں کوں ترجیحی بنیاداں تے 10 فیصد اسکالرشپ سکیم دے تحت نجی تعلیمی اداریاں اچ داخلہ ݙوایا ویسی تاں جو کوئی وی مستحق ٻال تعلیم توں محروم نہ راہوے۔ اجلاس اچ فیصلہ کیتا ڳیا جو سارے اداریاں کوں 30 جون 2026ء تئیں مطلوبہ معلومات جمع کرواوݨ دا آخری موقع ݙتا ونڄے ایندے بعد عمل نہ کرݨ تے متعلقہ اداریاں دی رجسٹریشن اتے تجدیدِ رجسٹریشن دی کارروائی روک ݙتی ویسی، انہاں دے ناں آئی سی ٹی (پیرا) دی ویب سائٹ تے بطورِ نادہندہ چھاپیے ویسن اتے متعلقہ امتحانی بورڈز کوں وی ݙسایا ویسی، ایں سانڳے جرمانے، رجسٹریشن دی معطلی اتے متعلقہ قانون دے تحت قانونی کارروائی وی کیتی ویسی۔ اجلاس مکمل تعاون کرݨ آلے اداریاں دی کارکردگی دی تعریف کریندے آکھیے جو اینجھے اداریاں کوں انھاں دی سماجی ذمہ داری اتے تعلیمی شمولیت دے فروغ اچ کردار دے اعتراف اچ تعریفی اسناد جاری کیتاں ویسن۔ آئی سی ٹی (پیرا) اسلام آباد دے ٻالاں، بالخصوص مستحق اتے آؤٹ آف اسکول ٻالاں کوں معیاری تعلیم ݙیوݨ اتے انھاں دے تعلیمی حقوق دے تحفظ کیتے اپݨا عزم ودھیندی اے۔