وزیراعظم شہباز شریف اسلام آباد مفاہمتی یاداشت تے بطورِ ثالث دستخط کر ݙتن

اسلام آباد۔18 جون (اے پی پی)وزیراعظم محمد شہباز شریف ’’اسلام آباد مفاہمتی یاداشت‘‘ تے بطورِ ثالث دستخط کر ݙتن۔’’اسلام آباد مفاہمتی یاداشت‘‘ تے امریکی صدر ڈونلڈ ٹرمپ تے ایران دے صدر مسعود پزشکیان دے دستخط موجود ہن۔ ایں توں پہلے وزیراعظم محمد شہباز شریف امریکہ اتے ایران وچال ’’اسلام آباد مفاہمتی یادداشت‘‘ تے دستخطاں دا اعلان کریندے آکھیا جو فوراً لاگو تھیوݨ آلے ایں ایم او یو دے تحت پہلے مرحلے اچ ایران ہرمز کوں ولا کھول ݙیسی ڄݙاں جو امریکہ وی اپݨی ناکہ بندی ختم کر ݙیسی۔ وزیراعظم ’’ایکس‘‘ تے سنیہے اچ آکھیے جو میکوں اے اعلان کریندے ݙاݙھی خوشی اتے اعزاز ملدا پئے جو اڄ ریاستہائے متحدہ امریکہ اتے اسلامی جمہوریہ ایران وچال تاریخی ’’اسلام آباد مفاہمتی یادداشت‘‘ تے الیکٹرانک طور تے دستخط کر ݙتے ڳئن۔ یادداشت تے ݙوہائیں ملکاں دے صدور دستخط کیتن ڄݙاں جو بطورِ ثالث انھاں وی ایںدی توثیق کیتی اے۔ ایں معاہدے تے متعلقہ حکومتاں دی اعلیٰ ترین سطح تے دستخط واضح ثبوت ہین جو ݙوہائیں فریق تنازعے دے سفارتی حل کیتے پرعزم ہن۔ وزیراعظم آکھیا جو میں ریاستہائے متحدہ امریکہ دے صدر ڈونلڈ جے ٹرمپ کوں ایں ایم او یو دے طے پاوݨ تے مبارک ݙینداں اتے انھاں کوں خراجِ تحسین پیش کرینداں جو انھاں دی سفارت کاری توں غیر متزلزل وابستگی اتے تنازعات دے پُرامن حل کوں ترجیح ݙیوݨ دی پالیسی ہک واری ول اینجھے بحران دے خاتمے اچ مدد ݙتی جیڑھا خطے اتے دنیا کیتے تباہ کن بݨ سڳدا ہئی۔ وزیراعظم آکھیا جو میں امریکی مذاکراتی ٹیم بشمول جے ڈی وینس، سٹیو وٹکوف اتے جیرڈ کشنر دی انتھک محنت، لگن اتے قابلِ قدر خدمات کوں سلام کرینداں، جنھاں ایں تاریخی کامیابی اچ اہم کردار ادا کیتا۔ وزیراعظم آکھیا جو او اسلامی جمہوریہ ایران دے سپریم لیڈر آیت اللہ سید مجتبیٰ حسینی خامنہ ای اتے صدر مسعود پزشکیان دے دانشمندانہ فیصلیاں، دور اندیشی اتے مدبرانہ قیادت کوں وی خراجِ تحسین پیش کریندن جنھاں امن دے مقصد کوں اپنیندے ہوئیں قابلِ قدر قیادت ݙکھائی اے۔ وزیراعظم ایرانی مذاکراتی ٹیم، بشمول محمد باقر قالیباف، عباس عراقچی اتے اسکندر مومنی دیاں کاوشاں کوں وی سراہیا، جنھاں دے صبر، استقامت اتے تعمیری مکالمے دی وابستگی ایں معاہدے کوں توڑ پچاوݨ اچ اہم کردار ادا کیتا۔ انھاں خاص طور تے ریاستِ قطر دی قیادت دیاں مخلصانہ کوششاں اتے مثبت کردار دا وی اعتراف کیتا جنھاں ایں پیش رفت کیتے اہم معاونت کیتی۔ وزیراعظم آکھیا جو میں مملکتِ سعودی عرب، جمہوریہ ترکیہ اتے عرب جمہوریہ مصر دی قیادت دے کردار کوں قدر نال ݙیہداں۔ وزیراعظم فیلڈ مارشل سید عاصم منیر دا خصوصی طور تے ذکر کیتا اتے آکھیا جو انھاں دیاں انتھک کاوشاں، بے لوث وابستگی اتے کلیدی کردار ایں اہم پیش رفت کوں ممکن بݨاوݨ تے امن و علاقائی استحکام کیتے اہم ثابت تھئے۔ انھاں دعا کیتی جو اے مفاہمتی یادداشت پورے خطے اچ باہمی افہام و تفہیم، احترامِ متقابل اتے مشترکہ خوشحالی کیتے ہک مضبوط اتے پائیدار بنیاد ثابت تھیسی۔