صدرِ مملکت دا امریکہ اتے ایران وچال اسلام آباد مفاہمتی یادداشت تے دستخطاں دا خیرمقدم

اسلام آباد۔18 جون (اے پی پی)صدرِ مملکت آصف علی زرداری امریکہ اتے ایران وچال اسلام آباد مفاہمتی یادداشت تے دستخطاں دا خیرمقدم کریندے ایکوں خطے اتے دنیا کیتے ہک تاریخی لمحہ قرار ݙتے۔ صدرِ مملکت آکھیے جو فروری 2026 اچ شروع تھیوݨ والے تنازعے خطے دے عوام کوں ٻہوں مسائل نال گھیریے اتے عالمی سطح تے توانائی دی فراہمی، تجارت اتے اقتصادی استحکام کوں شدید متاثر کیتے، امید اے جو اینڄھا سانحہ ولا کݙاھیں نا تھیسی اتے خطے دے ملک ہݨ اپݨاں زور ترقی، خوشحالی اتے اپݨے عوام دی فلاح و بہبود تے وقف کریسن۔ صدرِ مملکت وزیراعظم محمد شہباز شریف، نائب وزیراعظم تے وزیرِ خارجہ سینیٹر محمد اسحاق ڈار، چیف آف آرمی سٹاف فیلڈ مارشل سید عاصم منیر اتے وفاقی وزیرِ داخلہ محسن نقوی کوں انھاں دیاں انتھک سفارتی کاوشاں تے خراجِ تحسین پیش کیتا جنھاں فریقین کوں معاہدے تئیں پڄاوݨ اچ اہم کردار ادا کیتا۔ انھاں آکھیا جو پاکستان پورے بحران اچ ہک اصولی، متوازن اتے تعمیری کردار ادا کیتے اتے مسلسل مذاکرات، تحمل اتے تنازعات دے پرامن حل تے زور ݙیندے متعلقہ فریقاں نال رابطے برقرار رکھے۔ صدر آصف علی زرداری امریکی صدر ڈونلڈ ٹرمپ، آیت اللہ سید مجتبیٰ حسین خامنہ ای، ایرانی صدر مسعود پزشکیان تے وزیرِ خارجہ عباس عراقچی دی قیادت کوں وی سراہیا، جنھاں تنازعے دے سفارتی حل کوں یقینی بݨایا اتے امن کیتے کردار ادا کیتا۔ صدرِ مملکت قطر، سعودی عرب، ترکیہ تے مصر سودھا برادر ملکاں دے علاوہ روسی فیڈریشن اتے چین دی قیمتی معاونت کوں وی سراہیا۔ انہاں فریقین کوں آکھیے جو او اسلام آباد مفاہمتی یادداشت تے مکمل عملدرآمد کوں یقینی ٻݨاوݨ اتے مقررہ مدت اچ حتمی معاہدے تئیں پڄݨ دیاں کوششاں کوں تیز کرن تاں جو پائیدار امن اتے ترقی دی راہ ہموار تھی سڳے۔ صدرِ مملکت انھاں امید کیتی جو اسلام آباد اتے پاکستان دے ناں نال منسوب اے مفاہمتی یادداشت خطے اچ دیرپا اتے جامع امن دی بنیاد ثابت تھیسی۔ صدر آصف علی زرداری آکھیا جو پاکستان خطے دے سارے برادر ملکاں نال امن اتے خوشحالی دے مشترکہ سفر اچ یکجہتی نال کھڑا رہسی۔