کیڈٹ کالج پٹارو، جامشورو دے 35 رکنی طلبہ دے وفد دا پارلیمنٹ ہاؤس اسلام آباد دا مطالعاتی دورہ

اسلام آباد۔18 جون (اے پی پی)کیڈٹ کالج پٹارو، جامشورو دے 35 رکنی طلبہ دے وفد فیکلٹی ممبران دے کٹھے پارلیمنٹ ہاؤس اسلام آباد دا مطالعاتی دورہ کیتے۔ پارلیمنٹ ہاؤس آوݨ تے سینیٹ سیکرٹریٹ دے حکام وفد کوں خوش آمدید آکھیے۔ طلبہ دے وفد کوں سینیٹ میوزیم دا دورہ کروایا ڳیا جِتھاں انھاں کوں پاکستان دی پارلیمانی تاریخ، سینیٹ دے قیام و ارتقاء، آئینی سفر اتے قومی قانون سازی اچ ایوانِ بالا دے کلیدی کردار تے تفصیلی بریفنگ ݙتی ڳئی۔ ایں موقع تے وفد کوں سینیٹ دی تاریخ اتے کارکردگی تے مبنی ہک دستاویزی فلم وی ݙکھائی ڳئی۔ وفد سینیٹ دے اجلاس دی کارروائی وی ݙٹھی اتے ارکانِ سینیٹ ولوں قانون سازی، عوامی مسائل دے حل اتے قومی اہمیت دے امور تے تھیوݨ آلی بحث اچ دلچسپی ݙکھائی۔ طلبہ پارلیمانی طریقہ کار، قانون سازی دے مراحل اتے ایوانِ بالا دیاں ذمہ داریاں بارے مختلف سوالات کیتے جیندے سینیٹ سیکرٹریٹ حکام تفصیلی اتے تسلی بخش جوابات ݙتے۔ طلبہ پارلیمنٹ ہاؤس دے دورے کوں ݙاݙھا معلوماتی اتے مفید قرار ݙیندے آکھیا جو اینجھے مطالعاتی دورے نوجوان نسل اچ جمہوری اقدار، آئینی شعور اتے قومی اداریاں بارے سنڄاݨ ݙیندن۔ وفد دورے دے بہترین انتظامات اتے جامع بریفنگز تے سینیٹ سیکرٹریٹ حکام دا شکریہ ادا کیتا۔ وفد اچ ايڈمنسٹريٹو آفيسر ہيرو ٹھاکر، اسٹنٹ پروفيسر مسعود اختر، اسٹنٹ پروفيسر غلام علی اتے ليکچرر مُزمل ميمن وی شامل ہن۔