افغان طالبان رجیم دے خیبر پختونخوا اتے بلوچستان دے سرحدی علاقیاں اچ مبینہ ڈرون حملیاں دے دعوے کوڑے قرار، فیکٹ چیکر وزارتِ اطلاعات

اسلام آباد۔19 جون(اے پی پی)وزارتِ اطلاعات و نشریات دے فیکٹ چیکر افغان طالبان رجیم ولوں ابتدائی نوعیت دے ڈرونز استعمال کریندے ہوئیں خیبر پختونخوا اتے بلوچستان دے سرحدی علاقیاں اچ داعش خراسان (آئی ایس کے پی) دے کڄھ مبینہ ٹھکاݨیاں کوں نشانہ بݨاوݨ دے دعویاں کوں سختی نال مسترد کر ݙتے۔ جمعے کوں سماجی رابطے دے پلیٹ فارم ’’ایکس‘‘ تے فیکٹ چیکر وزارتِ اطلاعات و نشریات ہک پوسٹ اچ آکھیا جو افغان طالبان حکومت اپݨے مختلف پروپیگنڈا ذرائع اتے آفیشل بیانات نال دعویٰ کریندی پئی اے جو اوں ابتدائی نوعیت دے ڈرونز استعمال کریندے ہوئیں خیبر پختونخوا اتے بلوچستان دے سرحدی علاقیاں اچ داعش خراسان (آئی ایس کے پی) دے کڄھ مبینہ ٹھکاݨیاں کوں نشانہ ٻݨائے۔ اے دعوے اڳیں آلی کار بالکل کوڑے اتے بے بنیاد ہین۔ داعش سودھا دہشت گردی دے کیمپ اتے ݙو درجن توں ودھ ٻیاں دہشت گرد تنظیماں دے ٹھکاݨے حقیقتاً افغان طالبان حکومت دے زیرِ کنٹرول علاقیاں اچ ہی موجود ہن اتے انھاں کوں اتھائو چلایا ویندے اتے سرپرستی کیتی ویندی اے۔ بیان اچ آکھیا ڳئے جو خطے اتے ہمسایہ ملکاں دے خلاف دہشت گردی بشمول داعش، فتنہ الخوارج، فتنہ الہندوستان اتے ٻین عناصر دی سرپرستی کوں لکاوݨ کیتے افغان طالبان حکومت عموماً ایں نوعیت دے کوڑٹے اتے مذموم بیانات جاری کریندی رہندی اے۔ حقیقت اے ہے جو طالبان حکومت دا ہک ابتدائی نوعیت دا ڈرون خیبر دے علاقے شینکو دے نیڑے پاکستان دی فضائی حدود اچ وڑیے ڄیکوں فوراً سنڄاݨ تے پاکستان فضائیہ دے الرٹ فضائی دفاعی نظام غیر مؤثر بݨا ݙتے۔ بیان اچ آکھیا ڳیا جو حق ہمیشہ باطل تے غالب آندے۔