وزیرِ اعظم محمد شہباز شریف دا پٹرول دی قیمت اچ 74 روپے اتے ڈیزل دی قیمت اچ 67 روپے فی لیٹر کمی دا اعلان

اسلام آباد۔19 جون(اے پی پی)وزیرِ اعظم محمد شہباز شریف پٹرول دی قیمت اچ 74 روپے اتے ڈیزل دی قیمت اچ 67 روپے فی لیٹر کمی دا اعلان کریندے آکھیے جو عوام کوں ودھ توں ودھ ریلیف ݙیوݨ حکومت دی ترجیح اے، قوم نال جیڑھا وعدہ کیتا ہئی، الحمدللہ او پورا کریندے پئے ہیں، خطے اچ معاشی صورتِ حال اچ بہتری آوݨ اتے تیل دیاں قیمتاں اچ کمی دا فائدہ فوراً عوام کوں پچیندے پئے ہیں، پٹرول دی فی لیٹر قیمت 373 روپے توں گھٹ تھی تے 299 روپے اتے ڈیزل دی فی لیٹر قیمت 378 روپے توں گھٹ تھی تے 311 روپے تے آ ویسی، مشرقِ وسطیٰ دی کشیدہ صورتِ حال اچ پاکستان دی ثالثی پاروں امن ممکن تھئے، اللہ تعالیٰ پاکستان کوں عزت بخشی اتے اسلام آباد مفاہمتی یادداشت تے دستخط تھئے، معاشی استحکام برقرار رکھݨ اتے مہنگائی اچ مزید کمی کیتے مؤثر اقدامات جاری رکھیسوں۔ پاکستان دی ثالثی پاروں خطے و عالمی امن دے قیام دے بعد تیل دیاں قیمتاں دے حوالے نال جاری اہم بیان اچ وزیراعظم آکھیا جو خطے اچ معاشی صورتِ حال اچ بہتری آوݨ اتے تیل دیاں قیمتاں اچ کمی دا فائدہ فوراً عوام کوں منتقل کریندے پئے ہیں، پٹرول دی قیمت اچ 74 روپے اتے ڈیزل دی قیمت اچ 67 روپے فی لیٹر کمی کیتی ویندی پئی اے، ایویں ہی پٹرول دی فی لیٹر قیمت 373 روپے توں گھٹ تھی تے 299 روپے تے آ ویسی اتے ڈیزل دی فی لیٹر قیمت 378 روپے توں گھٹ تھی تے 311 روپے تے آویسی۔ وزیراعظم آکھیا جو عوام دیاں مشکلات دا بخوبی اندازہ اے، تساں مشکل صورتِ حال اچ صبر و تحمل دا بے مثال مظاہرہ کیتے، انھاں مشکل حالات اچ حکومت دا ساتھ ݙیوݨ تے اساں عوام دے تہہ دل توں مشکور ہیں۔ وزیرِ اعظم آکھیا جو ایں بحران دے آغاز توں ہی اساں اپݨے وسائل توں تیل دیاں قیمتاں اچ جتنا تھؑے کمی دی کوشش کیتی اے، وفاقی حکومت ترقیاتی بجٹ توں اتے کفایت شعاری توں کیتی ڳئی بچت دے ذریعے 129 ارب استعمال کر تے، ملک بھر دے عوام کوں تیل دیاں قیمتاں اچ بے پناہ اضافے توں ممکنہ حد تئیں ریلیف ٖٖتے۔ وزیراعظم آکھیا جو خطے دی معاشی صورتِ حال اچ ڄݙاں کڄھ ملکاں اچ فیول راشننگ جھیں اقدامات کیتے ویندے پئن، حکومتِ پاکستان دی بہتر منصوبہ بندی پاروں توانائی دا بحران نئیں آیا، مؤثر اقدامات نال نہ کوئی لائن لڳی، نہ ہی عوام کوں کہیں قسم دی پیٹرولیم مصنوعات دی کمی دا سامنا کرݨا پئے۔ وزیر اعظم آکھیا جو ملکی معیشت کوں مستحکم رکھݨ کیتے وفاق اتے صوبیاں پورا تعاون کیتے جیندے تے صوبائی وزرائے اعلیٰ دا شکر گزار ہاں، عالمی منڈی اچ تیل دیاں قیمتاں اچ جیڑھی کمی آسی او من و عن عوام کوں منتقل کریندے پئے ہیں۔ وزیرِ اعظم آکھیا جو معاشی استحکام برقرار رکھݨ اتے مہنگائی اچ مزید کمی کیتے مؤثر اقدامات جاری رکھیسوں، بحران دے پورے عرصے اچ نہ صرف حکومتی سطح تے کفایت شعاری کوں اپنایا ڳئے ٻھل ریلیف دی مد اچ محروم طبقیاں کوں وی سبسڈی ݙتی ڳئی۔ وزیر اعظم آکھیا جو عوام کوں ودھ توں ودھ ریلیف ݙیوݨ حکومت ترجیح اے، اللہ دے فضل نال مشرقِ وسطیٰ دی کشیدہ صورتِ حال اچ پاکستان دی ثالثی پاروں امن ممکن تھیا، اللہ تعالیٰ پاکستان کوں عزت بخشی اتے اسلام آباد مفاہمتی یادداشت تے دستخط تھئے، جیڑھی ہک تاریخی دستاویز اے، اللہ تعالیٰ اے عزت و اکرام اپݨی کمال مہربانی نال سارے پاکستانیاں کوں عطا فرمائے۔ وزیرِ اعظم آکھیا جو فیلڈ مارشل سید عاصم منیر خصوصی مبارک باد دے مستحق ہین جنھاں دی انتھک محنت اتے پیشہ ورانہ صلاحیت پاروں اے امن معاہدہ ممکن تھیا، نائب وزیرِ اعظم و وزیرِ خارجہ سینیٹر اسحاق ڈار، وزیرِ داخلہ سید محسن رضا نقوی اتے حکومتِ پاکستان دی پوری ٹیم جیڑھی امن دیاں انھاں کوششاں اچ خلوصِ نیت نال سرگرمِ عمل رہی، کوں وی خراجِ تحسین پیش کرینداں، ایںدے علاوہ معاشی ٹیم جنھاں اچ وفاقی وزیرِ خزانہ محمد اورنگزیب، وفاقی وزیرِ منصوبہ بندی احسن اقبال، وفاقی وزیرِ اقتصادی امور احد خان چیمہ، وزیرِ پیٹرولیم علی پرویز ملک، سیکرٹری خزانہ، سیکرٹری پیٹرولیم اتے چیئرمین ایف بی آر شامل ہن، معاشی بحران اچ قابلِ قدر کوششاں کیتن جیڑھیاں سراہݨ دے قابل ہین۔