مالی سال 2026-27: وفاقی مجموعی فنڈ توں لازمی اخراجات دی تفصیلات قومی اسمبلی اچ پیش، قرض ادائیگی کیتے 25 ہزار 992 ارب روپے مختص

اسلام آباد۔20 جون(اے پی پی)30 جون 2027ء کوں مکݨ والے مالی سال کیتے مطالباتِ زر و تخصیصات اچ شامل وفاقی مجموعی فنڈ اچوں غیر تصویبی اخراجات (لازمی اخراجات) دی تفصیلات قومی اسمبلی اچ پیش کر ݙتن۔ مجموعی طور تے 40 ہزار 741 ارب 55 کروڑ روپے توں زائد دے غیر تصویبی اخراجات شامل ہین۔ قومی اسمبلی اچ وفاقی وزیرِ خزانہ سینیٹر محمد اورنگزیب لازمی اخراجات دی تفصیل پیش کیتی۔ ملکی قرضہ جات دی ادائیگی کیتے 25 ہزار 992 ارب توں زائد، غیر ملکی قرضہ جات دی ادائیگی کیتے 5 ہزار 836 ارب 27 کروڑ روپے توں زائد، غیر ملکی قرضہ جات دے مصارف دی مد اچ ہک ہزار 71 ارب 39 کروڑ روپے توں زائد، وفاقی حکومت ولوں بیرونی ترقیاتی قرضے اتے ایڈوانسز دی مد اچ 607 ارب 30 کروڑ روپے توں ودھ رکھین۔ قلیل المیعاد بیرونی قرض دی ادائیگی اچ 130 ارب 29 کروڑ روپے، گرانٹس، اعانتاں اتے متفرق اخراجات کیتے 57 ارب، وفاقی محتسب کیتے 2 ارب، انتخابات کیتے 10 ارب، سپریم کورٹ 7 ارب 44 کروڑ، وفاقی آئینی عدالت 6 ارب 4 کروڑ توں زائد، اسلام آباد ہائیکورٹ 2 ارب 36 کروڑ توں زائد، آڈٹ کیتے 9 ارب 82 کروڑ توں زائد، صدر دا عملہ خانہ داری و الاؤنسز (پرسنل) کیتے ہک ارب 83 کروڑ 66 لکھ ڄݙاں جو صدر دا عملہ خانہ داری اتے الاؤنسز کیتے 96 کروڑ، سینیٹ کیتے 6 ارب 45 کروڑ، قومی اسمبلی کیتے 7 ارب 96 کروڑ، الاؤنسز و پنشن کیتے 6 ارب 93 کروڑ روپے توں زائد رکھے ڳئن۔ اپوزیشن رکن علی محمد خان غیر تصویبی اخراجات تے بحث اچ حصہ گھندے آکھیا جو قرآنی احکامات اچ سود کوں ترک کرݨ دا ول ول حکم ݙتا ویندے، ایں کوں اللہ اتے رسولؐ نال جنگ قرار ݙتا ڳئے، 26 ویں ترمیم اچ جنوری 2028 تئیں پاکستان کوں سود توں پاک کرݨ دی شق وی شامل اے، ہݨ آئین اساں کوں پابند کریندے جو سود توں چھٹکارا حاصل کرݨا اے۔ انھاں نے آکھیا جو قائدِ اعظم نے اسلامی بینکاری نظام بݨاوݨ دی ہدایت کیتی ہئی۔ ایں تے سب کوں سر جوڑ تے ایں سودی نظام توں نکلݨ کیتے کوششاں کرݨ دی ضرورت اے۔ اپوزیشن رکن ڈاکٹر نثار احمد آکھیا جو بجٹ بحث تے اساں بجٹ تے کڄھ تحفظات ݙتن جیندا وزیرِ خزانہ مفصل جواب ݙتے، یارن تے لوکل مارکیٹ تے ٹیکس ختم کر ݙیو یا درآمد تے وی ٹیکس لا ݙیو۔ قومی اتفاق، استحکام، معاشی ترقی کیتے صاف شفاف الیکشن ضروری ہن، آئندہ انتخابات اچ جوڈیشری دے ذریعے الیکشن کرائے ونڄن۔ انتخابی عملے دی تربیت کیتی ونڄے۔ اپوزیشن رکن شاہد احمد آکھیا جنھاں اداریاں کوں غیر تصویبی اخراجات دے فنڈز ݙیوݨ دی ڳالھ کیتی ویندی پئی اے او ادارے اپݨا کم ٹھیک نئیں کریندے پئے۔ عدالتاں اچ کیسز دے فیصلیاں اچ ݙاݙھی تاخیر تھیندی اے۔ نعیمہ کشور خان آکھیا جو پوسٹل دی نجکاری دیاں ڳالھیں تے ملازمین کوں سرپلس کرݨ دیاں ڳالھیں تھیندیاں پئن تاں ایں کیتے چارج ایکسپنڈیجر اچ فنڈ کیوں رکھے ویندے پئن۔ اساݙیاں قائمہ کمیٹیاں مکمل کائنی، انھاں کوں فعال کیتا ونڄے۔ سود دے خاتمے دی ترمیم کیتی ڳئی ایںدے تے پیش رفت کیتی ہووݨی چاہیدی اے، ساکوں بیرونی قرضیاں توں نجات مل سڳدی اے۔ الیکشن کمیشن دی کارکردگی تے سوال چاتا ویندے، ہر انتخابات اچ شفافیت تے سوال چاتے ویندن۔ اپوزیشن رکن جنید اکبر آکھیا جو دنیا اچ اساݙی عدلیہ 132 ویں نمبر تے اے۔ الیکشن کمیشن شفاف انتخابات کراوݨ اچ ناکام رہے۔ گوہر علی خان آکھیا جو اے ادارہ بالادست اے جیڑھا آئین تے ترمیم کریندے، آئین بݨیندے، اداریاں دی کارکردگی تے سوالات بجا ہین۔ الیکشن کمیشن ویلھے سر مقامی حکومتاں دے انتخابات اچ کامیاب نئیں تھی سڳیا۔ انتخابات دا صاف شفاف انعقاد الیکشن کمیشن دی ذمہ داری اے جیکوں پورا نئیں کیتا ڳیا۔ ای وی ایم دا نفاذ ضروری اے، ہر ادارہ اپݨا کام کرے۔ عمیر خان نیازی آکھیا جو بجٹ دا 75 فیصد لازمی اخراجات تے ویندا پئے۔ ایں وجہ توں معیشت کوں سنبھالا نئی ملدا پیا، الیکشن کمیشن کیتے 10 ارب رکھے ڳئن، عام انتخابات 2024 تے دولتِ مشترکہ دی رپورٹ تے الیکشن کمیشن موقف نئیں ݙتا۔ جمعیت علمائے اسلام (ف) دی رکن عالیہ کامران آکھیا جو لازمی اخراجات تے بحث لاحاصل اے ایںدے اچ کوئی تبدیلی نئیں کیتی ونڄ سڳدی۔ عامر ڈوگر آکھیا جو الیکشن کمیشن کوں سالانہ ارباں دی گرانٹ ایں کیتے ݙتی ویندی اے جو او صاف شفاف انتخابات کراوے ٻھل شفاف انتخابات نئیں کرائے ویندے۔ ریاض فتیانہ آکھیا جو سیاسی استحکام دے بغیر معاشی استحکام ممکن کائنی، سیاسی استحکام کیتے سیاسی قیدیاں کوں رہا کیتا ونڄے۔ پاکستان دیاں سیاسی جماعتاں کیتے کڄھ یورپی ملکاں وانڳوں فنڈز مختص کیتے ونڄن۔ گھریلو تے کاشتکار کوں سستی بجلی ݙیوݨ نال معاشی ترقی تھیسی۔ کاشتکاراں دی فصلاں دی انشورنس ہووݨی چاہیدی اے۔ حمید حسین آکھیا جو اساݙے علاقے دے رستے کھولے ونڄن، پارلیمنٹ کوں وقعت ݙتی ونڄے۔ چنگیز خان آکھیا جو ملک اچ انصاف دی فراہمی ناپید اے۔ شفقت عباس آکھیا جو عدلیہ کیتے ست ارب روپے بجٹ ݙتا ڳئے، انصاف دی فراہمی دا نظام درست ہووݨا چاہیدے۔ ثناء اللہ خان مستی خیل آکھیا جو اخراجات اچ معقولیت گھن آوݨ ضروری اے، ملک کوں میثاقِ پاکستان دی ضرورت اے۔ سہیل سلطان آکھیا جو خیبر پختونخوا دہشت گردی توں ودھ متاثرہ صوبہ اے، وفاق دے ذمے خیبر پختونخوا دے واجبات دی ادائیگی کیتی ونڄے، ضم اضلاع کیتے سالانہ فنڈز دے تحت 532 ارب روپے دے واجبات ادا کیتے ونڄن، کالام منصوبہ اڄاں تئیں مکمل نئی تھیا۔