عالمی امن کیتے اہم موقع، مل تے دنیا اچ اتحاد قائم کر سڳدے ہیں: شہباز شریف

برگن سٹاک۔21 جون(اے پی پی)وزیراعظم پاکستان شہباز شریف آکھیے جو عالمی امن کیتے اے اہم موقع اے، فیلڈ مارشل عاصم منیر معاہدے کیتے اہم کردار ادا کیتے، اساں مل تے دنیا اچ اتحاد قائم کر سڳدے ہیں۔ سوئٹزرلینڈ دے شہر برگن اسٹاک اچ امریکا ایران امن مذاکرات دے سیشن دے بعد وزیراعظم شہباز شریف الیندے آکھیے جو امریکی صدر ڈونلڈ ٹرمپ دی مدبرانہ قیادت نال امریکا اتے ایران وچال مذاکرات ممکن تھئن۔ وزیراعظم آکھیا جو امریکی نائب صدر جے ڈی وینس مذاکرات کیتے فعال کردار ادا کیتے، امریکا اتے ایران اچ اینجھے نتیجہ خیز مذاکرات دے تانڳھی ہیں جیڑھے مثبت نتائج گھن آوݨ۔ انھاں دا آکھݨ ہئی جو براہِ راست مذاکرات تے صدر ٹرمپ دے فعال اتے بہترین وژن دے شکر گزار ہیں۔ ایں موقع تے امریکا دے نائب صدر جے ڈی وینس پاکستان دے آرمی چیف فیلڈ مارشل سید عاصم منیر دی قیادت کوں زبردست خراجِ تحسین پیش کریندے انھاں کوں ہک ‘بہترین سپہ سالار’ قرار ݙتے۔ انھاں واضح کیتا جو فیلڈ مارشل سید عاصم منیر شروع دے ݙینھ توں اساݙے نال ہن اتے پاکستان دا مثبت کردار پوری دنیا اچ سراہیا ڳئے۔ امریکی نائب صدر دا آکھݨ ہئی جو وزیراعظم پاکستان میاں شہباز شریف اتے فیلڈ مارشل سید عاصم منیر میݙے اتے صدر ڈونلڈ ٹرمپ دے ݙاݙھے قریبی دوست ہین۔ انھاں پاکستان اتے امریکا دے دیرینہ تعلقات اتے سیکیورٹی تعاون دی اہمیت تے زور ݙتا۔