فوجداری قوانین متعلق 100 ترمیم تے مشتمل ٻل قائمہ کمیٹی کنے زیرغوراے، اپوزیشن کوں قانون سازی دے عمل اچ تکنیکی تے عملی کردار ادا کرݨا پوسی، وفاقی وزیرِ قانون اعظم نذیر تارڑ

اسلام آباد۔22 جون (اے پی پی) وفاقی وزیرِ قانون و انصاف اعظم نذیر تارڑ آکھیے جو حکومت فوجداری قوانین متعلق 100 ترامیم تے مشتمل ہک ٻل قومی اسمبلی اچ پیش کیتے جیڑھا ایں ویلھےقائمہ کمیٹی کنے زیرِ غور اے، ایں تے خیبرپختونخوا حکومت دی صلاح وی منڳی ڳئی ہئی پرحالی تئیں انھاں دا جواب کائنی ملیا، اپوزیشن کوں قانون سازی دے عمل اچ تکنیکی تے عملی کردار ادا کرݨا پوسی۔ قومی اسمبلی اچ اپوزیشن رکن گوہر علی خان دی طرفوں چاتے ڳئے نکات دا جواب ݙیندے وفاقی وزیرِ قانون اعظم نذیر تارڑ آکھیا جو اعلیٰ عدلیہ متعلق نمائندگی تے طریقہ کار کوں بہتر بݨاوݨ کیتے رولز اچ ترامیم کیتیاں ڳیاں ہن جنھاں دے تحت ہݨ ہائیکورٹ اچ ججز دی تقرری کیتے تشکیل ݙتی ڳئی کمیٹی اچ ممبرانِ اسمبلی کوں وی نمائندگی ݙتی ڳئی اے۔ انھاں آکھیا جو چیف جسٹس آف پاکستان دا کردار آئینی تے انتظامی نوعیت دا اے انھاں دا کہیں سیاسی عمل نال تعلق کائنی۔ انھاں آکھیا جو صرف تقریراں توں قانون دی حکمرانی، پارلیمان دی بالادستی یا ٻئے مسئلے حل نہ ہوسن بلکہ قانون سازی دے عمل اچ تکنیکی تے عملی کردار ادا کرݨا پوسی۔انھاں واضح کیتا جو عدالتی عمل اچ حکومتاں دا عمل دخل نئی ہوندا، عدالت دی طرفوں سݨائی ونڄݨ آلی سزاواں اچ وی حکومت دا کوئی کردار نئی ہوندا، جے کہیں فیصلے تے اعتراض ہووے تاں اپیل دے ذریعے رجوع کیتا ونڄ سڳدے۔ انھاں آکھیا جو ضابطہِ فوجداری اچ کوئی 100 دے نیڑے ترامیم لاتیاں ڳئن تے اے ٻل قومی اسمبلی اچ پیش کیتا ڄݙاں جو او ہݨ قائمہ کمیٹی اچ اے، اساں اپوزیشن توں استدعا کریندوں جو او قائمہ کمیٹیاں اچ واپس آون تے اتھاں اپݨا کردار ادا کرݨ، صرف قانون دی حکمرانی دے سبق پڑھاوݨ توں اے معاملات حل نہ ہوسن، ایں کیتے کجھ تکنیکی چیزاں کرݨیاں ہوسن، ایں اچ اپوزیشن وی اپݨا کردار ادا کرے، اساں انھاں ترامیم تے خیبرپختونخوا دی حکومت توں صلاح منڳی ہئی تاںجو ہݨ تئیں اتھوں کہیں قسم دا جواب نئی آیا، اے مکمل طور تے غیر سیاسی ترامیم ہن