وزیراعظم شہباز شریف ولوں امریکا تے ایران دی قیادت کوں تعمیری رابطے دے تسلسل تے مذاکراتی عمل نال وابستگی تے خراجِ تحسین

اسلام آباد۔22 جون (اے پی پی) وزیراعظم محمد شہباز شریف امریکا تے ایران دی قیادت کوں تعمیری رابطے دے تسلسل تے مذاکراتی عمل نال وابستگی تے خراجِ تحسین پیش کریندے دوست ملکاں دا شکریہ ادا کیتے جنھاں ایں تاریخی عمل کوں اڳوں ودھاوݨ اچ اپݨا کردار ادا کیتے جئیں دے نتیجے اچ مثبت تے تعمیری ماحول اچ مذاکرات تھئے تے حوصلہ افزا پیش رفت سامݨے آئی اے۔وزیراعظم “ایکس” (ٹوئٹر) تے اپݨے پیغام اچ ݙسائے جو الحمدللہ اسلام آباد مفاہمتی یادداشت دے فریم ورک دے تحت پہلی اعلیٰ سطحی کمیٹی دا اجلاس سوئٹزرلینڈ دے شہر برگن سٹاک اچ کامیابی نال اختتام پذیر تھی ڳئے۔ انھاں آکھیا جو مذاکرات مثبت تے تعمیری ماحول اچ منعقد تھئے تے حوصلہ افزا پیش رفت سامݨے آئی، جئیں اچ 60 ݙینھ دے اندر ہک حتمی معاہدے تئیں پڄݨ کیتے روڈ میپ تے اتفاق، سیاسی نگرانی ݙیوݨ کیتے ہک اعلیٰ سطحی کمیٹی دا قیام تے مزید تکنیکی مذاکرات دے آغاز دا فیصلہ شامل اے۔انھاں آکھیا جو او امریکا تے ایران ݙوہیں ملکاں دی قیادت کوں تعمیری رابطے دے تسلسل تے مذاکراتی عمل نال وابستگی تے خراجِ تحسین پیش کریندن تے سارے بھرا و دوست ملکاں دا شکریہ ادا کریندن جنھاں ایں تاریخی عمل کوں اڳوں ودھاوݨ اچ قیمتی تعاون ݙتا۔ وزیراعظم آکھیا جو ایں سلسلے اچ او بالخصوص بھرا ملک قطر دا تہہِ دل توں شکریہ ادا کریندن جئیں انھاں مذاکرات کوں اڳوں ودھاوݨ کیتے سازگار ماحول پیدا کرݨ اچ کلیدی کردار ادا کیتا۔ وزیراعظم سوئس حکومت دا وی شکریہ ادا کیتا جئیں انھاں مذاکرات دی میزبانی تے سہولت کاری کیتی۔وزیراعظم آکھیا جو او فیلڈ مارشل عاصم منیر کوں خصوصی خراجِ تحسین پیش کریندن جنھاں دی انتھک کاوشاں انھاں مذاکرات کوں کامیابی نال ہمکنار کیتا، انھاں دی لگن، عزم تے ثابت قدمی تعریف دے قابل اے تے انھاں دی کوششاں دے بغیر اے پیش رفت ممکن کائنا ہئی۔ وزیراعظم نے نائب وزیراعظم و وزیرِ خارجہ سینیٹر محمد اسحاق ڈار تے دفترِ خارجہ دی ٹیم کوں وی سفارتی کوششاں تے دلی مبارکباد تے خراجِ تحسین پیش کیتا۔ انھاں وزیرِ داخلہ محسن نقوی دی محنت تے کردار کوں دی وی تعریف کیتی جنھاں ایں مذاکرات دی کامیابی اچ نمایاں حصہ پاتا۔ وزیراعظم ایں عزم دا اعادہ کیتا جو پاکستان پائیدار امن تے دیرتئیں حل دے حصول کیتے مکالمے تے سفارت کاری دے ودھارے اچ اپݨا دیانتدارانہ تے مخلصانہ کردار ادا کریندا رہسی۔