پاکستان اچ مصنوعی ذہانت دے ودھارے کیتے 283 ارب روپے دا قومی پروگرام تیار

اسلام آباد۔22 جون (اے پی پی) حکومت آوݨ آلے پنج سالاں اچ ہک محفوظ، خودمختار تے جدت تے مبنی مصنوعی ذہانت (اے آئی) دا ماحولیاتی نظام بݨاوݨ کیتے 283 ارب روپے دے پروگرام دا منصوبہ تیار کر ڳھدے۔ ویلتھ پاکستان کوں دستیاب سرکاری دستاویزات موجب نیشنل اے آئی ایکو سسٹم ڈویلپمنٹ پروگرام (NAIEDP) تے 2026 توں 2031 تئیں عملدرآمد کیتا ویسی۔ حکومت پروگرام تے کم دے آغاز کیتے مالی سال 27-2026 اچ 18 کروڑ 50 لکھ روپے دی ابتدائی رقم مختص کرݨ دی تجویز ݙتی اے۔ ایں اقدام توں توقع کیتی ویندی پئی اے جو اے پاکستان دے وسیع تر ڈیجیٹل تبدیلی دے ایجنڈے دا بنیادی ستون ثابت تھیسی تے ملک کوں تکھے ودھدی عالمی مصنوعی ذہانت دی معیشت توں فیدہ چاوݨ اچ مدد ݙیسی۔پروگرام دے اہم مقاصد اچ مختلف شعبیں اچ مصنوعی ذہانت دے استعمال دے ذریعے اقتصادی تبدیلی تے ترقی کوں ودھارا ݙیوݨ شامل اے۔ ایں توں علاوہ پروگرام دے تحت اے آئی سٹارٹ اپس تے اختراعی منصوبیں دی معاونت کیتی ویسی تاں جو مقامی ٹیکنالوجی دے ماحولیاتی نظام دی ترقی تے ابھردی ہوئی ٹیکنالوجیز اچ کاروباری سرگرمیاں کوں ودھارا مل سڳے۔ مصنوعی ذہانت دے ذریعے مختلف شعبیں کوں جدید بݨاوݨ وی ایں پروگرام دا ہک اہم حصہ اے، ایں اقدام نال سرکاری خدمات، صنعت تے ٻئے اقتصادی شعبیں اچ اے آئی دے استعمال کوں ودھارا ملسی جئیں نال کارکردگی تے پیداواری صلاحیت اچ بہتری متوقع اے۔دستاویزات اچ مصنوعی ذہانت دے ذمہ دارانہ استعمال کوں یقینی بݨاوݨ کیتے اے آئی گورننس تے اخلاقی فریم ورک دی تیاری تے وی زور ݙتا ڳئے۔ پروگرام دے تحت ہک سٹریٹجک فنڈنگ ونڈو قائم کرݨ دی تجویز ݙتی ڳئی اے تاں جو ابھردے ہوئے تکنیکی موقع تے چیلنجز دا وقتی جواب ݙتا ونڄ سڳے۔ 2031 تئیں 283 ارب روپے دے مجموعی تخمینے نال نیشنل اے آئی ایکو سسٹم ڈویلپمنٹ پروگرام کوں پاکستان دی تکنیکی مسابقت ودھاوݨ تے طویل المدتی ڈیجیٹل ترقی کوں تکڑا بݨاوݨ دے پاسے ہک اہم قدم قرار ݙتا ویندا پئے۔