وفاقی بجٹ تے مالیاتی ٻل 2027 تے قومی اسمبلی دی قائمہ کمیٹی خزانہ و محصولات دیاں سفارشات تے تجویزاں تے مبنی رپورٹ ایوان اچ پیش

اسلام آباد۔22 جون (اے پی پی)آندے مالی سال دے وفاقی بجٹ تے مالیاتی ٻل 2027ء تے قومی اسمبلی دی قائمہ کمیٹی خزانہ و محصولات دیاں سفارشات تے تجویزاں تے مبنی رپورٹ ایوان اچ پیش کر ݙتی ڳئی اے۔ قومی اسمبلی دے اجلاس اچ کمیٹی دے چیئرمین سید نوید قمر کمیٹی دی رپورٹ ایوان اچ پیش کرݨ دی اجازت منڳی، اجازت ملݨ تے انھاں رپورٹ ایوان اچ پیش کر ݙتی۔سید نوید قمر آکھیا جو کمیٹی طویل مشاورت، تفصیلی غور کرݨ تے مختلف متعلقہ فریقاں نال مشاورت دے بعد فنانس ٻل متعلق اپݨی سفارشات کوں حتمی شکل ݙتی اے۔ انھاں یقین ݙیوائے جو اختلافی نوٹ جمع کراوݨ آلے ارکان دے چاوݨ آلے نکات تے بجٹ دی منظوری دے بعد وی غور جاری رکھیا ویسی۔ انھاں حکومتی تعاون تے شکریہ ادا کریندے آکھیا جو مختلف صلاح رکھݨ آلے ارکان دے اختلافی نوٹس رپورٹ دا حصہ بݨا ݙتے ڳئن تاں جو آندی قانون سازی دے دوران سارے نقطہ ہائے نظر کوں سامݨے رکھیا ونڄ سڳے۔ سید نوید قمر اپوزیشن ارکان دی کمیٹی اجلاساں اچ عدم شرکت تے افسوس دا اظہار کریندے آکھیا جے او شریک تھیندے تاں رپورٹ مزید جامع تے مضبوط بݨ سڳدی ہئی۔ انھاں امید ظاہر کیتی جو مستقبل اچ اہم معاشی قانون سازی تے تھیوݨ آلے اجلاساں اچ ساریاں سیاسی جماعتاں بھرپور شرکت کریسن تاں جو مختلف صلاحیں پالیسی سازی اچ مناسب جاہ مل سڳے۔انھاں ݙسایا جو تقریباً 17 توں 18 صفحات تے مشتمل کمیٹی دی رپورٹ اچ آٹو موبائل، موبائل فون تے ٻئی صنعتاں متعلق ٻہوں ساری سفارشات شامل ہن، جنھاں حکومت دی مجوزہ ٹیکس تے ڈیجیٹلائزیشن پالیسیاں تے تحفظات دا اظہار کیتا ہئی۔ فیس لیس کسٹمز اسیسمنٹ تے ٻئے خود کار نظام شفافیت تے کارکردگی بہتر بݨاوݨ کیتے ضروری ہن تاں جو پاکستان کوں پائیدار مالیاتی نظام کیتے اپݨے ٹیکس ٹو جی ڈی پی تناسب اچ نمایاں ودھارا کرݨا پوسی تاں جو قرضیں تے بجٹ خسارے تے انحصار گھٹ کیتا ونڄ سڳے۔ انھاں آکھیا جو حکومت مستقل طور تے قرضیں تے خساروں دے سہارے نئی چل سڳدی۔ ریاستی خرچے دا ودھ توں ودھ انحصار منصفانہ تے موثر طریقے نال وصول کیتے ونڄݨ آلے ٹیکساں تے ہووݨا چاہیدے۔چیئرمین کمیٹی ایں ڳالھ تے زور ݙتا جو ٹیکس اصلاحات دے نال ایجھے حفاظتی اقدامات وی ضروری ہن جیڑھے ٹیکس حکام دی طرفوں اختیارات دے ممکنہ غلط استعمال کوں روک سڳن، جاری اصلاحات دا بنیادی مقصد صوابدیدی اختیارات اچ کمی، شفافیت اچ ودھارا تے ٹیکس نظام کوں زیادہ جامع بݨاوݨ اے۔ انھاں ایف بی آر کوں ٹیکس دہندگان دے بینک اکاؤنٹاں تئیں براہِ راست رسائی ݙیوݨ دی مجوزہ شق دا حوالہ ݙیندے ݙسایا جو کمیٹی ایں کوں ایں دی اصل شکل اچ مسترد کر ݙتے۔ ایں دے بجائے سفارش کیتی ڳئی اے جے کہیں معاملے اچ بینکنگ معلومات درکار ہوون تاں انھاں تئیں رسائی سٹیٹ بینک آف پاکستان دے ذریعے تے صرف کیس ٹو کیس دی بنیاد تے، مناسب جواز دی موجودگی اچ حاصل کیتی ونڄے۔ انھاں آکھیا جو کمیٹی ٹیکس وصولی تے تعمیل کوں بہتر بݨاوݨ دے اقدامات دے نال نال شہریاں دے بنیادی حقوق دے تحفظ کوں وی برابر اہمیت ݙیندی اے۔سید نوید قمر مزید آکھیا جو ویلھا آ ڳئے جو ودہولڈنگ تے ایڈوانس ٹیکساں تے لوڑھ توں ودھ انحصار بتدریج گھٹ کیتا ونڄے کیوں جو ٹیکس دا ٻوجھ صرف انھاں لوکاں تے ہووݨا چاہیدے جیڑھے واقعی ٹیکس ادا کرݨ دے پابند ہن، نہ جو وسیع پیمانے تے کٹوتیاں دے ذریعے عام شہریاں تے کاروباری سرگرمیاں کوں متاثر کیتا ونڄے۔ انھاں آکھیا جو کمیٹی اڳوں وی وزارتِ خزانہ دے نال رل تے ٹیکس نظام اچ بہتری تے بجٹ متعلق پارلیمانی نگرانی کوں مزید مؤثر بݨاوݨ کیتے کم جاری رکھیسی۔ سید نوید قمر ایں اعتماد دا اظہار کیتا جو قائمہ کمیٹی پاکستان دے مالیاتی نظام کوں بہتر بݨاوݨ اچ مؤثر کردار ادا کیتے تے ایں عزم دا اعادہ کیتا جو بجٹ سازی دے عمل اچ عوامی آرا تے مفادات کوں شامل کرݨ دی کوششاں اڳوں وی جاری رکھیاں ویسن۔