بے نظیر انکم سپورٹ پروگرام شہید محترمہ بے نظیر بھٹو دے وژن دی پائیدارعکاسی اے، خاتونِ اول بی بی آصفہ بھٹو زرداری

اسلام آباد۔22 جون (اے پی پی) خاتونِ اول بی بی آصفہ بھٹو زرداری آکھیے جو بے نظیر انکم سپورٹ پروگرام شہید محترمہ بے نظیر بھٹو دے اوں وژن دی ہک پائیدار عکاسی اے جئیں دا مقصد معاشرے دے کمزور تے مستحق طبقات کوں سہارا تے موقع ݙیوݨ ہئی۔ انھاں شفافیت، مالی شمولیت تے خدمات ݙیوݨ کوں بہتر بݨاوݨ کیتے جاری اصلاحاتی اقدامات دی تعریف کریندے آکھیے جو مؤثر سماجی تحفظ دے پروگرام مستحق خانداناں دی معاونت تے خواتین کوں معاشی و سماجی زندگی اچ زیادہ فعال کردار ادا کرݨ دے قابل بݨاوݨ اچ اہم کردار ادا کریندن۔ ایوانِ صدر دے پریس ونگ توں جاری بیان موجب خاتونِ اول بی بی آصفہ بھٹو زرداری پارلیمنٹ ہاؤس اچ بے نظیر انکم سپورٹ پروگرام (بی آئی ایس پی) دی چیئرپرسن سینیٹر روبینہ خالد تے سیکریٹری بی آئی ایس پی عامر علی احمد دی طرفوں ݙتی ونڄݨ آلی بریفنگ اچ شرکت کیتی جتھاں انھاں کوں پروگرام دی پیش رفت، جاری اصلاحات تے ملک دے مستحق خانداناں تے ایں دے اثرات دے بارے اچ تفصیلی آگاہی ݙتی ڳئی۔خاتونِ اول کوں ݙسایا ڳیا جو مالی سال 26-2025 دے دوران بی آئی ایس پی کیتے 716 ارب روپے مختص کیتے ڳئن ڄݙاں جو مالی سال 27-2026 کیتے 844 ارب روپے دا بجٹ تجویز کیتا ڳئے۔ انھاں کوں ݙسایا ڳیا جو بے نظیر کفالت پروگرام دے تحت ایں ویلھے 1 کروڑ 20 لکھ گھرݨے کوں سہ ماہی بنیاداں تے 14,500 روپے نقد امداد ݙتی ویندی پئی اے ڄݙاں جو جنوری 2027ء توں ایں وظیفے کوں ودھا تے 18,000 روپے کرݨ دا منصوبہ اے۔بریفنگ اچ ݙسایا ڳیا جو بے نظیر تعلیمی وظائف پروگرام دے تحت 1 کروڑ 24 لکھ ٻالاں کوں تعلیمی معاونت ݙتی ویندی پئی اے جئیں کیتے گھٹ توں گھٹ 70 فیصد سکول حاضری دی شرط رکھی ڳئی اے۔ ایں طرح بے نظیر نشوونما پروگرام دے ذریعے تقریباً 20 لکھ حاملہ تے کھیر پلاوݨ آلیاں تریمتاں تے ݙو سال توں گھٹ عمر دے ٻالاں دی معاونت کیتی ویندی پئی اے ڄݙاں جو پائلٹ مرحلے دے تحت 52 ہزار نینگر چھوریں کوں وی پروگرام اچ شامل کیتا ڳئے۔خاتونِ اول کوں ݙسایا ڳیا جو صدر آصف علی زرداری تے بی بی آصفہ بھٹو زرداری دی طرفوں شروع کیتا ڳیا بے نظیر ہنرمند پروگرام مستحق لوکاں کوں مفت فنی تربیت ݙیندا پئے جئیں اچ ہݨ تئیں 7 ہزار توں ودھ لوک داخلہ گھن چکئن۔ ڈیجیٹل شعبے اچ وزیراعظم دے “کیش لیس اکانومی” اقدام دے تحت ہک کروڑ توں ودھ مستحقین کوں ڈیجیٹل سوشل پروٹیکشن والٹس دے ذریعے باضابطہ مالیاتی نظام نال منسلک کیتا ویندا پئے۔ ایں سلسلے اچ 85 لکھ توں ودھ مفت سماں ونڈیاں تے والٹس نال منسلک کیتیاں ونڄ چکئن ڄݙاں جو 4 لکھ 10 ہزار توں ودھ مستحقین کوں ڈیجیٹل تے مالیاتی خواندگی دی تربیت وی ݙتی ڳئی اے۔مزید ݙسایا ڳیا جو قومی سماجی و معاشی رجسٹری اچ 3 کروڑ 87 لکھ گھراݨے دا ڈیٹا موجود اے ڄݙاں جو 2 کروڑ 30 لکھ گھراݨے ڈائنامک رجسٹری دے تحت اپݨی معلومات اپ ڈیٹ کر چکن۔ اڄوکے تصدیقی عمل دے نتیجے اچ 35 لکھ توں ودھ نویں ممکنہ طور تے اہل خانداناں دی نشاندہی کیتی ڳئی اے۔ خاتونِ اول کوں عالمی بینک دی ہک تحقیق دے بارے اچ وی ݙسایا ڳیا جئیں موجب بی آئی ایس پی 1 کروڑ 3 لکھ توں ودھ خانداناں دی معاونت کریندا پئے جیڑھے پاکستان دے تقریباً 24 فیصد گھراݨے دا احاطہ کریندن۔ تحقیق دے مطابق پروگرام دے تحت تقسیم کیتے ونڄݨ آلے ہر ہک روپے دے بدلے مقامی معیشت اچ 2.34 روپے دی حقیقی آمدݨ پیدا تھیندی اے۔ مزید اے جو کل آمدݨی اچ ودھارے دا 68 فیصد حصہ معاشرے دے غریب ترین 40 فیصد گھراݨے کوں حاصل تھیندے ڄݙاں جو اے پروگرام 16 لکھ 60 ہزار کل وقتی مساوی روزگار دے موقع دی حمایت کریندے۔ بریفنگ اچ ݙسایا ڳیا جو بی آئی ایس پی دے ذریعے پیدا تھیوݨ آلی معاشی سرگرمی قومی خزانے کوں سالانہ تقریباً 174 ارب روپے واپس ݙیندی اے۔ایں موقع ڳالھ کریندے بی بی آصفہ بھٹو زرداری آکھیا جو بے نظیر انکم سپورٹ پروگرام شہید محترمہ بے نظیر بھٹو دے اوں وژن دی ہک پائیدار عکاسی اے جئیں دا مقصد معاشرے دے کمزور تے مستحق طبقے کوں سہارا تے موقع ݙیوݨا ہئی۔ انھاں شفافیت، مالی شمولیت تے خدمات ݙیوݨ کوں بہتر بݨاوݨ کیتے جاری اصلاحاتی اقدامات دی تعریف کریندے آکھیا جو مؤثر سماجی تحفظ دے پروگرام مستحق خانداناں دی معاونت تے تریمتاں کوں معاشی و سماجی زندگی اچ زیادہ فعال کردار ادا کرݨ دے قابل بݨاوݨ اچ اہم کردار ادا کریندن۔ایں توں پہلے اپݨے استقبالیہ کلمات اچ چیئرپرسن بی آئی ایس پی سینیٹر روبینہ خالد آکھیا جو اے پروگرام 2008ء اچ صدر آصف علی زرداری شہید محترمہ بے نظیر بھٹو دے وژن موجب شروع کیتا ہئی تے اے معاشرے دے کمزور طبقات کیتے باوقار سماجی تحفظ ݙیوݨ دے عزم دا عملی اظہار اے۔ انھاں آکھیا جو بی آئی ایس پی ہݨ صرف نقد امداد تئیں محدود کائنی بلکہ ہک جامع، ڈیجیٹل تے بااختیار بݨاوݨ آلے سماجی تحفظ دے نظام دی طرف ودھدا پئے۔ایں موقع تے قومی اسمبلی دے ڈپٹی سپیکر سید غلام مصطفیٰ شاہ، رکن قومی اسمبلی شازیہ مری، رکن قومی اسمبلی میر غلام علی تالپور تے قومی اسمبلی دی قائمہ کمیٹی غربت دے خاتمے تے سماجی تحفظ دے چیئرمین وی موجود ہن۔