وفاقی وزیر بحری امور تے گورنر سندھ دی ملاقات، سمندری آلودگی مکاوݨ تے تعاون ودھاوݨ تے اتفاق

اسلام آباد۔23 جون (اے پی پی) وفاقی وزیربحری امور محمد جنید انوار چوہدری تے گورنر سندھ سید محمد نہال ہاشمی سمندری آلودگی کوں مکاوݨ تے ساحلی ماحولیاتی نظام دے تحفظ کیتے وفاقی و صوبائی سطح تے تعاون کوں مزید تکڑابݨاوݨ تے زورݙتے۔ اے ڳالھ انہاں قومی اسمبلی اچ وزیرِ بحری امور دے چیمبر اچ تھیوݨ آلی ملاقات اچ آکھی، جئیں اچ ݙوہیں رہنماواں ماحولیاتی نظم و نسق تے بحری پائیداری کیتے ادارہ جاتی ہم آہنگی ودھاوݨ تے اتفاق کیتے۔وفاقی وزیر آکھیا جو او کراچی دے آوݨ آلے دورے دے دوران میرین پولیوشن کنٹرول بورڈ دا اجلاس سݙیسن، جئیں اچ جاری اقدامات دا جائزہ ڳھدا ویسی تے ساحلی آلودگی و ماحولیاتی انحطاط متعلق انھاں کوں بریفنگ ݙتی ویسی۔ گورنر سندھ سید محمد نہال ہاشمی وفاق تے صوبیں وچال بہتر رابطہ کاری دی لوڑھ تے زور ݙیندے آکھیا جو کچرے دے مؤثر انتظام، سمندری وسائل دے تحفظ تے پائیدار معاشی سرگرمیاں کوں ودھارا ݙیوݨ ساحلی علاقیں دی ماحولیاتی و معاشی بہتری کیتے ناگزیر اے۔محمد جنید انوار چوہدری آکھیا جو صحت مند سمندر موسمیاتی نظام دے توازن، حیاتیاتی تنوع دے تحفظ تے ساحلی آبادیاں دے روزگار کیتے ٻہوں اہم ہن، جنھاں اچ مینگرووز تے ماہی گیری دے شعبے شامل ہن۔ انھاں ݙسائے جو کراچی پورٹ ٹرسٹ دی طرفوں بندرگاہی پاݨیاں تے ایں دے آسے پاسے اچ معمول دے مطابق صفائی آپریشن جاری ہن، جیڑھے جو ماحولیاتی انتظامی اقدامات دا حصہ ہن۔ وفاقی وزیر اقوامِ متحدہ دے ماحولیاتی پروگرام دا حوالہ ݙیندے آکھیا جو دنیا اچ ہر سال تقریباً 19 توں 23 ملین ٹن پلاسٹک کچرا آبی ماحول اچ شامل تھی ویندے، جیڑھا جو سمندری آلودگی دے سنگین عالمی چیلنج دی نشاندہی کریندے۔ انھاں مزید آکھیا جو عالمی ادارہ ترقی (ورلڈ بینک) سودھے مختلف مطالعیں دے مطابق سمندری کچرے اچ پلاسٹک دا حصہ کئی علاقیں اچ 50 فیصد توں وی ودھ ہوندے، اے تناسب خطے تے طریقہ کار دے لحاظ توں مختلف تھی سڳدے۔محمد جنید انوار چوہدری آکھیا جو سمندری کچرا ماحولیاتی نظام، ماہی گیری تے ساحلی آبادیاں کیتے سنگین خطرہ اے، ایں کیتے کچرے دے انتظام دے نظام کوں بہتر بݨاوݨ تے آلودگی کوں منبع تے گھٹ کرݨ کیتے مربوط اقدامات ناگزیر ہن۔ انھاں سرکلر اکانومی دی طرف منتقلی دے معاشی امکانات دا وی ذکر کیتا تے آکھیا جو بہتر ری سائیکلنگ تے وسائل دی بحالی نہ صرف ماحول تے دٻاؤ گھٹ کر سڳدی اے بلکہ روزگار دے نویں موقع وی پیدا کر سڳدی اے۔ ملاقات اچ ایں ڳالھ تے اتفاق کیتا ڳیا جو ادارہ جاتی رابطہ کاری کوں مزید تکڑا بݨا تے ویسٹ مینجمنٹ، سمندری وسائل دے تحفظ تے پائیدار بحری ترقی دے اہداف حاصل کیتے ویسن۔