سوئٹزرلینڈ اچ اہم بریک تھرو نال عالمی امن تھیسی، ملک دی حقیقی ترقی چارے صوبیں دی ھکو سویں ترقی نال مشروط اے، وزیراعظم شہباز شریف دی قومی اسمبلی اچ ڳالھ مہاڑ

اسلام آباد۔23 جون (اے پی پی) وزیرِاعظم محمد شہباز شریف ایران تے امریکا وچال جنگ بندی دے معاہدے اچ پاکستان دے ثالثی کردار کوں تاریخی کامیابی قرار ݙیندے آکھیے جو سوئٹزرلینڈ اچ تھیوݨ آلے ایں اہم بریک تھرو نال عالمی امن قائم تھیسی، ملک دی حقیقی ترقی چارے صوبیں دی ھکو سویں ترقی نال مشروط اے او قومی اسمبلی اچ ڳالھ کریندے پئے ہن۔وزیرِاعظم شہباز شریف آکھیا جو میں اپوزیشن لیڈر دے سامݨے کجھ معروضات پیش کرݨ چاہندا ہاں پر او ایں ویلھےایوان اچ کائنی۔ انھاں آکھیا جو اڄ ول ہک تاریخ ساز ݙینھ اے، ڄݙاں پرسوں برگن سٹاک (سوئٹزرلینڈ) اچ ایران تے امریکا وچال کجھ ݙینھ پہلے طے پاوݨ آلے ایم او یو دے سلسلے اچ ݙوہیں ملکاں دی قیادت اتھاں تشریف گھن آئی جئیں تے پاکستان وی بطورِ ثالث دستخط کیتن۔ الحمدللہ پاکستان اتھاں وݙے خلوص تے عرق ریزی دے نال ݙوہیں ملکاں وچال فاصلیں کوں گھٹ کرݨ کیتے اپݨی بھرپور کوششاں کیتیاں جئیں دے نتیجے اچ ݙینھ رات ڳالھ مہاڑدا سلسلہ چلدا رہیا۔ آخر کار سویل دے تقریباً ڈھائی وڄے ہک سانجھا اعلامیہ تیار کیتا ڳیا جئیں دی سارے فریقین توثیق کیتی۔انھاں آکھیا جو اڄ الحمدللہ اللہ تعالیٰ دے فضل و کرم نال امریکا تے ایران وچال نہ صرف جنگ بندی تھی چکی اے بلکہ اڳلے 60 ݙینھاں اچ ٹیکنیکل مذاکرات تھیسن جنھاں اچ اہم معاملات تے ڳالھ تھیسی، اساکوں پوری امید اے جو ان شاء اللہ اے ایم او یو 60 ݙینھاں دے اندر ہک پائیدار معاہدے اچ تبدیل تھی ویسی جئیں نال دنیا اچ امن قائم تھیسی۔وزیرِاعظم شہباز شریف سپیکر قومی اسمبلی سردار ایاز صادق کوں مخاطب کریندے آکھیا جو میں اڄ تہاکوں، قائدِ حزبِ اختلاف کوں، ایں ایوان اچ موجود سارے معزز ارکان کوں تے پاکستان دے 24 کروڑ عوام کوں دلوں مبارکباد پیش کرینداں، کیوں جو ایں جنگ بندی دے عمل اچ پاکستان جیڑھا کلیدی کردار ادا کیتے، او نہ صرف تاریخ ساز اے بلکہ دنیا دے ممتاز اخبارات، بھاویں او واشنگٹن پوسٹ ہووے، فنانشل ٹائمز ہووے یا نیویارک ٹائمز، ساریں آپݨے فرنٹ پیج تے پاکستان دے ایں کردار کوں نمایاں کیتے۔ اتھاں موجود معزز ارکان ایں ڳالھ دی توثیق کریسن جو پاکستان دے حوالے نال اے جیڑھا مثبت بیانیہ تے عزت سامݨے آئی اے، جے اساں ارباں روپے وی خرچ کریندے ول وی اے حاصل نہ کرسڳدے۔ میں چاہندا ہامی جو قائدِ حزبِ اختلاف دے سامݨے اے ڳالھیں کراں تاں جومیں اڳوں وددھداں۔ میکوں ٻہوں خوشی نال اے ݙسݨا اے جو اڄ الحمدللہ ایران دے صدر تے میݙے ٻہوں پیارے بھرا ڈاکٹر مسعود پزیشکیان پاکستان تشریف گھن آندے پئن۔وزیرِاعظم شہباز شریف آکھیا جو اپوزیشن لیڈر آکھیا ’’شہباز شریف اوں ݙینھ جیڑھی تقریر کیتی، ایں اچ مزہ نئی آیا‘‘ تے انھاں اتھاں اپݨے ڈیسک کوں وڄاوݨ تے وی ڳالھ کیتی۔ میں جے ڈیسک وڄایا تاں انھاں صادق جذبیں دے نال وڄایا جو اڄ پاکستان اچ یکجہتی تے صوبیں وچال ہم آہنگی پیدا تھیندی پئی اے تے پاکستان کوں جیڑھی عزت ملی اے او اللہ تعالیٰ دا ٻہوں فضل و کرم اے جئیں دا جتنا وی شکر ادا کیتا ونڄے گھٹ اے۔ میں ایں ہی جذباتی انداز اچ ایں حوالے نال ڳالھ کیتی ہوسی، جتھاں تئیں بلوچستان تے وسائل خرچ کرݨ دا تعلق اے تاں تساں میݙی تقریر دا ریکارڈ نکلوا تے ݙیکھ گھنو، میں آکھیا ہئی جو چارے صوبیں این ایف سی ایوارڈ اچ رضاکارانہ طور تےبلوچستان دے وسائل دے حصے کوں 100 فیصد ودھایا۔ چارے صوبیں خوشی دے نال اے فیصلہ کیتا تے اساکوں وݙی خوشی اے، میݙے الفاظ اے ہن جو پنجاب باقی صوبیں دے نال رل تے سالانہ 11 ارب روپے ایں مقصد کیتے حصہ پیندا پئے۔وزیرِاعظم شہباز شریف آکھیا جو اپوزیشن لیڈراڄ جیڑھی ڳالھ کیتی او حقائق دے منافی اے۔ میں ہمیشہ اے آکھیے جے صرف پنجاب ترقی کریندے تاں او پاکستان دی ترقی کائنی، جے صرف صوبہ سندھ ترقی کریندے تاں او وی پاکستان دی ترقی کائنی۔ ڄݙاں تئیں چارے صوبے ترقی دی ایں بھڄ دھرک اچ برابر دے شریک نہ ہوسن، او پاکستان دی ترقی نئی سݙوا سڳدی۔ میں ول اے ڳالھ آکھی اے، تے اڄ انھاں ایں کوں مختلف رنگ ݙتے جئیں دا میکوں افسوس اے۔ بہرحال اے انھاں دی اپݨی ذہنی اختراع اے۔وزیرِاعظم شہباز شریف آکھیا جو تساں 2018ء دے الیکشن دی تحقیقات کرگھنو، کیا ایں الیکشن اچ بھرپور جادوگری نہ تھئی ہئی؟ کیا بیلٹ باکس نی بھرئے ڳئے؟ کیا لوکاں کوں پٹے پوا تے اسلام آباد نئی گھن آیا ڳیا تے تڑیاں نی ݙتیاں ڳیاں؟ تُساں 2018ء دا الیکشن چاتے ݙیکھ گھنو،جےاو قانونی تے آئینی حکومت ہئی تاں ول اے وی ہک جائز تے قانونی حکومت اے، جے انھاں کوں تحقیقات دا ٻہوں شوق اے تاں شروعات 2018ء توں کریندوں، ایں دے بعد اساں 2024ء دے الیکشن دی تحقیقات تے وی آ ویندوں ۔ ڳالھ نکلی تاں ول ٻہوں پرے تئیں ویسی ، میں ایں تے ہی اپݨی ڳالھ مکینداں۔ آؤ اڄ ایران دے صدر دا بھرپور تے والہانہ استقبال کرݨ کیتے اساکوں تیاری کرݨی چاہیدی اے، نہ جو اساں اڄ دے ݙینھ انھاں جھیڑے اچ رہوں۔