جدید طریقہ کاشت دے ذریعے معیاری آلوں دے بج دی پیداوار پاکستان دی غذائی ضرورتاں پوریاں کرݨ اچ معاون ثابت تھیسی، وفاقی وزیر رانا تنویرحسین

اسلام آباد۔ 16 ستمبر(اے پی پی) وفاقی وزیرقومی غذائی تحفظ و تحقیق رانا تنویرحسین آکھیے جو پاکستان اچ بیماریاں توں پاک تے معیاری آلوں دے بج دی مقامی پیداوار ودھاوݨ کیتے اہم پیش رفت تھئی اے، جدید طریقہ کاشت دے ذریعے معیاری آلوں دے بج دی پیداوار پاکستان دی غذائی ضرورتاں پوریاں کرݨ اچ معاون ثابت تھیسی۔ اے ڳالھ انہاں اتھاں قومی زرعی تحقیق مرکز اسلام آباد اچ آلوں دے بج دی پیداوار دے پروگرام نال خطاب کریندے آکھی۔ وفاقی وزیرآکھیا جو پاکستان مہانگے درآمدی آلوں دے بج تے انحصار گھٹ کرݨ کیتے مقامی پیداوار کوں ودھارا ݙیندا پئے، پاکستان اچ سالانہ ھک لکھ 60 ہزار ٹن مصدقہ آلوں دے بج دی پیداوار دا ہدف مقرر کیتا ڳئے۔ انہاں آکھیا جو مقامی طور تے تیار تھیوݨ آلا مصدقہ آلوں دا بج ملک دی مجموعی ضرورت دا تقریباً ھک تہائی پورا کریسی، بیماریاں توں پاک معیاری بج دی دستیابی نال آلوں دی پیداوار اچ ودھارا تے کساناں دی آمدݨ اچ بہتری آسی۔ رانا تنویر حسین آکھیا جو جدید زرعی طریقیں کوں تحقیقی مرکز توں کساناں تے نجی شعبے تئیں منتقل کیتا ویسے۔ انہاں آکھیا جو پاکستان تے جنوبی کوریا دے تعاون نال آلوں دے معیاری بج دی پیداوار اچ نمایاں پیشرفت تھئی اے، جنوبی کوریا دی طرفوں زرعی تحقیق تے جدید طریقیں اچ تعاون قابلِ تحسین اے۔ رانا تنویر حسین آکھیا جو پاکستان تے جنوبی کوریا آلوں دے علاوہ مویشیاں دی بہتری، گھاء دی پیداوار تے دیہی بج دے کاروبار اچ وی تعاون کریندے پئن، پاکستان تے جنوبی کوریا سمارٹ زراعت، باغبانی تے زرعی مشینی کاری دے شعبیں اچ مزید تعاون ودھیسن۔ انہاں آکھیا جو جدید بج نظام تے افزائشِ نسل دے شعبیں اچ تعاون پاکستان دی زرعی پیداوار ودھاوݨ اچ معاون ثابت تھیسی، قومی زرعی تحقیق مرکز اچ جاری جدید زرعی منصوبے پاکستان تے جنوبی کوریا دے تعاون دا نواں مرحلہ ہن۔ انہاں آکھیا جو بیماریاں توں پاک تے معیاری بج دی مقامی پیداوار غذائی تحفظ بہتر بݨاوݨ تے درآمدی خرچے گھٹ کرݨ دے پاسےاہم قدم اے۔