پاکستان تے ایران مشترکہ ترقی تے مستقبل کیتے رل تے اڳوں ودھسن، مختلف شعبیں اچ تعاون کوں مزید مستحکم کریسن، ایران ترقی دیاں نویاں منزلاں طے کریسی، وزیرِ اعظم محمد شہباز شریف

اسلام آباد۔23 جون (اے پی پی) وزیرِاعظم محمد شہباز شریف امریکہ تے ایران دے وچال ثالثی کیتے ایران دے اعتماد دا شکریہ ادا کریندے آکھیے جو پاکستان امن تے خوشحالی کیتے اپݨا اہم کردار جاری رکھیسی، ایران ترقی دیاں نویں منزلاں طے کریسی، مشترکہ ترقی تے مستقبل کیتے رل تے اڳوں ودھسوں، مختلف شعبیں اچ ݙوطرفہ تعاون کوں مزید مستحکم کریسوں، اساݙیاں خوشیاں تے ݙکھ سانجھے ہن، مفاہمتی یادداشت اچ بیلسٹک میزائل پروگرام متعلق کوئی ڳالھ کائنی، ݙوہرا معیار نئی ہووݨا چاہیدا۔انھاں اے ڳالھ ایران دے صدر ڈاکٹر مسعود پزشکیان دے نال وفد دی سطح تے ملاقات دے دوران ابتدائی کلمات اچ آکھی ۔ ملاقات اچ نائب وزیرِ اعظم و وزیرِ خارجہ سینیٹر محمد اسحاق ڈار تے فیلڈ مارشل سیّد عاصم منیر وی شریک ہن۔ وزیرِاعظم آکھیا جو او اپݨے بھرا مسعود پزشکیان کوں دورہِ پاکستان تے ہک وار ول خوش آمدید اکھیندن، اڄ ایران دے صدر تے انھاں دے وفد دا اتھاں استقبال کرݨا میں کیتے اعزاز اے۔ انھاں دورہِ پاکستان کیتے دعوت قبول کرݨ تے ایرانی صدر دا شکریہ ادا کیتا تے آکھیا جو اسلام آباد مفاہمتی یادداشت تے دستخط دے بعد ایں دورے تے بے حد خوشی اے۔وزیرِاعظم ایران دے سپریم لیڈر مجتبیٰ خامنہ ای کیتے نیک تمناواں دا اظہار کریندے آکھیا جو انھاں دی ویژنری قیادت اچ اسلام آباد مفاہمتی یادداشت تے جنگ بندی کیتے ایران وقار تے عزت دے نال دستخط کیتے۔ انھاں نشوم جاناں دے ضیان تے ایرانی قیادت نال تعزیت دا اظہار کریندے آکھیا جو ایرانی قوم جرات تے بہادری نال صورتحال دا سامݨا کیتا۔ وزیرِ اعظم پاکستان دی ثالثی تے اعتماد کرݨ تے وی ایران دی قیادت دا شکریہ ادا کیتا تے آکھیا جو حقیقی اخوت کوں کݙاہیں وی جوابدہ نئی ہووݨا پوندا، اساں ایران کوں کݙاہیں مایوس نہ تھیوݨ ݙیسوں۔ وزیرِ اعظم آکھیا جو اڄ اساں اتھاں روشن مستقبل کیتے اکٹھے تھیوں۔ انھاں پائیدار امن کیتے پاکستان دے کردار دا ذکر کریندے آکھیا جو مفاہمتی یادداشت تے عزت و وقار دے نال دستخط تھئے۔ ݙوہیں ملکاں دے تعلقات نیڑے بھرپی دی عمدہ مثال ہن۔ انھاں یقین ݙوایا جو پاکستان امن تے خوشحالی کیتے اہم کردار جاری رکھیسی۔ وزیرِ اعظم ایران دی قیادت تے عوام دی دلیری، جذبے، عزم تے ہمت دی تعریف کیتی ۔انھاں امن مذاکرات کیتے فیلڈ مارشل سیّد عاصم منیر دے انتھک کردار دی تعریف کریندے آکھیے جو اللہ دا فضل تھیا تے ثالثی دیاں کوششاں کوں کامیابی ملی، مشترکہ کوششاں تے عزم نال ایں مرحلے تے پڄݨ اچ کامیاب تھیوں۔ وزیرِ اعظم آکھیا جو برگن سٹاک اچ تکنیکی سطح دے مذاکرات وی اہمیت دے حامل رہیے، نائب وزیرِ اعظم و وزیرِ خارجہ سینیٹر محمد اسحاق ڈار تے ایرانی وزیرِ خارجہ عباس عراقچی، وزیرِ داخلہ محسن نقوی دا کردار وی لائقِ تحسین اے۔ انھاں امن کیتے کوششاں اچ تعاون تے دوست ملکاں بالخصوص قطر، سعودی عرب، ترکیہ تے مصر دی قیادت کوں وی خراجِ تحسین پیش کیتا۔ وزیرِ اعظم آکھیا جو اساں رل تے مختلف شعبیں اچ ݙوطرفہ تعاون کوں مزید مستحکم کریسوں۔ اقتصادی تعاون، تجارت، سرمایہ کاری، تعمیرِ نو سودھے سارے شعبیں اچ تعلقات کوں وسعت ݙیوݨ کیتے پرعزم ہیسے۔ انھاں ایں یقین دا اظہار کیتا جو صدر مسعود پزشکیان دی قیادت اچ ایران ترقی دیاں نویں منزلاں طے کریسی، مشترکہ ترقی تے مستقبل کیتے رل تے اڳوں ودھسوں۔ وزیرِ اعظم آکھیا جو ایران تے پاکستان ہمیشہ کیتے دوست تے بھرا ہن، اساݙیاں خوشیاں تے ݙکھ سانجھے ہن۔وزیرِ اعظم مشرقِ وسطیٰ، خلیج تے خطے اچ امن و ترقی کیتے رل تے کم کرݨ دے عزم دا اظہار کریندے واضح کیتا جو اسلام آباد مفاہمتی یادداشت اچ بیلسٹک میزائل پروگرام متعلق کوئی ڳالھ کائنی، اے ڳالھ ایجنڈے تے ہے تے نہ ہی ایں حوالے نال کوئی ڳالھ مہاڑ تھئی اے۔انھاں آکھیا جو شرپسند عناصر جنگ دے شعلیں کوں ٻجھݨ نئی ݙیوݨ چاہندے، او امن دے عمل کوں نقصان پڄاوݨ چاہندن، بیلسٹک میزائل دے حوالے نال ݙوہرا معیار نئی ہووݨا چاہیدا، ایجھا نی تھی سڳدا جو ٻئے ملکاں کنے بیلسٹک میزائل ہوون تے ایران کنے نہ ہوون، ایں نکتہ تے کہیں قسم دا ابہام نئی ہووݨا چاہیدا۔