اسلام آباد مفاہمتی یادداشت معاہدے دی شکل اختیار کریسی تے ترقی دے نویں رستے کھلسن، وزیرِاعظم شہباز شریف۔۔۔ امن، ترقی تے خوشحالی کیتے پاکستان دے اہم کردار دے معترف ہیسے، ڈاکٹر مسعود پزشکیان

اسلام آباد۔23 جون (اے پی پی) وزیرِ اعظم محمد شہباز شریف ایں توقع دا اظہار کیتے جو اسلام آباد مفاہمتی یادداشت معاہدے دی شکل اختیار کریسی تے ترقی دے نویں رستے کھلسن ڄݙاں جو ایران دے صدر ڈاکٹر مسعود پزشکیان مذاکراتی عمل اچ پاکستان دے بہترین کرداردی تعریف کریندے آکھیے جو امن، ترقی تے خوشحالی کیتے پاکستان دے اہم کردار دے معترف ہیسے۔ اسلام آباد مفاہمتی یادداشت تے دستخط پاکستان تے اعتماد پاروں ممکن تھئن، چیلنجز تے قابو پیندے خوشحال مشترکہ مستقبل کیتے اڳوں ودھݨا اے، خطے اچ امن و سلامتی تے پائیدار ترقی علاقائی رابطے دے ودھارے تے تعمیری ڳالھ مہاڑ نال ہی ممکن اے۔منگل کوں اتھاں ایران دے صدر ڈاکٹر مسعود پزشکیان دے دورہِ پاکستان دے دوران وزیرِاعظم محمد شہباز شریف تے ایران دے صدر ڈاکٹر مسعود پزشکیان ݙوطرفہ تے وفد دی سطح تے ملاقات دے بعد سانجھی نیوز کانفرنس نال خطاب کیتا۔ وزیرِاعظم فارسی شعر دے ذریعے ایران دے نال نیڑے تعلقات دے عزم دا اعادہ کریندے آکھیا جو دوست اوہو ہوندے جیڑھا اوکھے ویلھے اچ ہتھ وٹھے۔ صدر مسعود پزشکیان تے انھاں دے وفد دے دورہِ پاکستان تے ٻہوں خوشی تھئی، صدر مسعود پزشکیان عظیم ملک دے عظیم رہنما ہن، بطور ڈاکٹر وی ایرانی صدر دی انسانیت کیتے ٻہوں خدمات ہن۔وزیرِ اعظم ایران تے امریکہ وچال جنگ مکاوݨ تے خوشی دا اظہار کریندے آکھیا جو بطورِ ثالث پاکستان امن عمل کیتے خلوصِ نیت نال کوششاں کیتیاں۔ برگن سٹاک اچ تھیوݨ آلے تکنیکی مذاکرات وی ٻہوں اہمیت دے حامل رہیے۔ انھاں ایں توقع دا اظہار کیتا جو اسلام آباد مفاہمتی یادداشت معاہدے دی شکل اختیار کریسی تے ترقی دے نویں رستے کھلسن۔ وزیرِ اعظم سپریم لیڈر آیت اللہ مجتبیٰ خامنہ ای دی دور اندیش قیادت دی تعریف کریندے آکھیا جو بحران دے دوران ایران دے عوام مثالی جرات تے اتحاد دا مظاہرہ کیتا۔ انھاں جنگ اچ ہزاراں قیمتی جاناں دے ضیان تے تعزیت دا اظہار کیتا تے آکھیا جو سپریم لیڈر آیت اللہ علی خامنہ ای دی شہادت وی ٻہوں وݙا نقصان اے۔ انھاں اوکھے ویلھے اچ ایران دی حکومت تے عوام دے نال یکجہتی دا اظہار کریندے آکھیا جو پاکستان تے ایران ہمسائے ہی نی ہزاراں سال دی تہذیب نال وی جڑئے ہوئن، ایران دی کامیابی کوں اپݨی کامیابی تے ضیان کوں اپݨا ضیان سمجھدوں.وزیرِاعظم ثالثی عمل اچ پاکستان تے اعتماد دے اظہار تے ایرانی قیادت دا شکریہ ادا کریندے آکھیا جو امن عمل اچ امیرِ قطر، سعودی ولی عہد، ترکیہ تے مصر دے صدور دی حمایت تے وی مشکور ہیسے۔ وزیرِ اعظم مذاکراتی عمل اچ فیلڈ مارشل سیّد عاصم منیر دی انتھک محنت تے لگن دی تعریف کریندے آکھیے جو نائب وزیرِ اعظم سینیٹر محمد اسحاق ڈار تے وزیرِ داخلہ محسن نقوی وی شاندار خدمات انجام ݙتیاں۔ وزیرِاعظم اپݨی ڳالھ مہاڑ دا اختتام “پاکستان-ایران دوستی زندہ باد” تے کیتا۔ایران دے صدر ڈاکٹر مسعود پزشکیان ایں موقع تے اپݨی ڳالھ مہاڑ دا آغاز مفکرِ پاکستان علامہ محمد اقبال دے شعر توں کیتا۔ انھاں آکھیا جو پاکستان تے ایران وچال نیڑے تعلقات منفرد نوعیت دے حامل ہن، پاکستان تے ایران یک جان ݙو قالب ہن، ݙوہیں ملک مشترکہ مستقبل تے منزل دے شراکت دار ہن۔ انھاں آکھیا جو پاکستان صرف اساݙا ہمسایہ ہی نئی، اساݙا بھرا تے عزیز دوست اے، اسلام آباد تے تہران دے وچال تعلقات نیڑے اعتماد تے سانجھے احترام تے مبنی ہن۔ وزیرِ اعظم آکھیا جو ماضیِ قریب اچ تھیوݨ آلے واقعات ݙوہیں ملکاں دے نیڑے رشتے کوں نویں جہت ݙتی۔ مذاکراتی عمل اچ پاکستان بہترین کردار ادا کیتا، امن، ترقی تے خوشحالی کیتے پاکستان دے اہم کردار دے معترف ہیسےانھاں آکھیا جو اسلام آباد مفاہمتی یادداشت تے دستخط پاکستان تے اعتماد دی بدولت ممکن تھئے۔ انھاں شاندار استقبال تے بھرپور میزبانی تے پاکستانی حکومت تے عوام دا شکریہ ادا کریندے آکھیا جو او دورہِ پاکستان کیتے دعوت ݙیوݨ تے اپݨے بھرا شہباز شریف دے مشکور ہن۔ انھاں آکھیا جو دورے دے دوران صدرِ مملکت، وزیرِ اعظم تے فیلڈ مارشل نال تعمیری ملاقاتاں تھئیاں جنھاں اچ ݙوطرفہ تعلقات تے خطے دی صورتحال تے ڳالھ مہاڑ تھئی ۔ چیلنجز تے قابو پیندے خوشحال مشترکہ مستقبل کیتے اڳوں ودھݨا اے، خطے اچ امن و سلامتی تے پائیدار ترقی علاقائی رابطے دے ودھارے تے تعمیری ڳالھ مہاڑ نال ہی ممکن اے۔ امن عمل کیتے قطر، ترکیہ، سعودی عرب، مصر دی قیادت تے دوست ملکاں دے شکر گزار ہیسے۔ وزیرِاعظم شہباز شریف تے فیلڈ مارشل سیّد عاصم منیر ثالثی عمل اچ اہم کردار ادا کیتا۔ انھاں آکھیا جو جنگ دے آغاز توں مفاہمتی یادداشت تئیں ہر مرحلے اچ پاکستان انتھک مخلصانہ کوششاں کیتیاں۔