نیدرلینڈزاچ پاکستان رائس فیسٹیول، یورپی کاروباری رہنماواں دی وݙی شرکت، جام کمال دی کوششاں دی تعریف

اسلام آباد۔24 جون (اے پی پی) وفاقی وزیرِ تجارت جام کمال خان نیدرلینڈزاچ منعقدہ پاکستان رائس فیسٹیول 2026 دے کامیاب انعقاد دی تعریف کریندے آکھیے جو ایجھے بین الاقوامی تجارتی ایونٹس پاکستانی برآمدات دے ودھارے، نویں منڈیاں تئیں رسائی تے پاکستان دے مثبت تشخص کوں اجاگر کرݨ اچ اہم کردار ادا کریندن۔ ترجمان وزارتِ تجارت موجب وزیرِتجارت نیدرلینڈز اچ پاکستانی سفیر سید حیدر شاہ، ٹریڈ تے انویسٹمنٹ قونصلر شفیق حیدر ورک تے ٹریڈ ڈویلپمنٹ اتھارٹی آف پاکستان دی کوششاں کوں خراجِ تحسین پیش کریندے آکھیا جو پاکستانی باسمتی چاول دنیا اچ پاکستان دی سنڄاݨ بݨ چکن تے ایں دی ودھدی عالمی طلب ملکی زرعی شعبے تے برآمد کنندگان کیتے حوصلہ افزا اے۔جام کمال خان یورپ توں 100 توں ودھ درآمد کنندگان، ریٹیلرز، فوڈ انڈسٹری دے ماہرین، معروف شیفس، سفارتی نمائندگان تے کاروباری رہنماواں دی شرکت کوں پاکستان تے ودھدے عالمی اعتماد دا مظہر قرار ݙتا۔ انھاں آکھیا جو حکومتِ پاکستان زرعی و غذائی برآمدات اچ ودھارے، سرمایہ کاری دے ودھارے تے عالمی تجارتی رابطے کوں مزید مستحکم بݨاوݨ کیتے پرعزم اے۔ تقریب ’’پاکستان دے کھیتاں توں یورپ دے دسترخوان تئیں‘‘ دے عنوان نال منعقد کیتی ڳئی، جئیں دا مقصد پاکستانی باسمتی چاول کوں یورپی منڈی اچ مزید متعارف کراوݨا، تجارتی رابطے ودھاوݨ تے زرعی و غذائی شعبے اچ سرمایہ کاری دے نویں موقع پیدا کرݨا ہئی۔ایں موقع تے نیدرلینڈز اچ پاکستان دے سفیر سید حیدر شاہ آکھیا جو پاکستانی باسمتی چاول دنیا دے 100 توں ودھ ملکاں کوں برآمد کیتے ویندے پئن تے اپݨی منفرد خوشبو، لمبے داݨے تے شاندار پکاوݨ دی خصوصیات پاروں عالمی صارفین، ریٹیلرز تے ماہرینِ طعام اچ مسلسل مقبولیت حاصل کریندے پئن۔تقریب دے دوران شرکاء کوں اعلیٰ معیار دے پاکستانی باسمتی چاول دی مختلف قسماں، بالخصوص سپر کرنل باسمتی، چکھݨ دا موقع ݙتا ڳیا ڄݙاں جو پاکستانی باسمتی چاول توں تیار کیتے ڳئے روایتی تے جدید پکوان وی پیش کیتے ڳئن۔ شرکاء کوں باسمتی چاول دی جغرافیائی سنڄاݨ (GI)، معیار دی یقین دہانی، ٹریس ایبلٹی نظام تے یورپی مارکیٹ دے تقاضیں نال مطابقت دے حوالے نال تفصیلی بریفنگ وی ݙتی ڳئی۔ تقریب اچ پاکستان تے نیدرلینڈز وچال زرعی و غذائی تعاون دے امکانات تے ڳالھ کیتی ڳئی۔ واضح رہے جو نیدرلینڈز یورپی یونین اچ پاکستان دی اہم ترین برآمدی منڈیاں اچ شامل اے تے ݙوہیں ملکاں وچال تجارت دا حجم تقریباً 1.94 ارب امریکی ڈالر تئیں پُج چکے، ڄݙاں جو 50 توں ودھ ڈچ کمپنیاں پاکستان اچ مختلف شعبیں اچ کاروباری سرگرمیاں اچ مصروف ہن۔