عہدے ساری زندگی نئی رہندے پرعزت تے احترام دے رشتے قائم رہݨے چاہیندن، سپیکر قومی اسمبلی سردار ایاز صادق

اسلام آباد۔24 جون (اے پی پی) سپیکر قومی اسمبلی سردار ایاز صادق آکھیے جو عہدے تاحیات نئی رہندے پرعزت تے احترام دے رشتے قائم رہݨے چاہیندن۔ قومی اسمبلی دے اجلاس اچ قائدِ حزبِ اختلاف دی تقریر دے بعد سپیکر قومی اسمبلی آکھیا جو او خود درویش صفت انسان ہن، میں 1998 اچ پاکستان تحریکِ انصاف توں استعفیٰ ݙتا ہئی تے ہک خط وی لکھیا ہئی جیڑھا اڄ وی میݙے کنے موجود اے، ایں خط اچ پارٹی چھوڑݨ دیاں ساریاں وجوہات ݙسیاں ہن۔ سپیکر قومی اسمبلی آکھیا جو انھاں یکم فروری 2001 کوں ایں ویلھے پاکستان مسلم لیگ (ن) اچ شمولیت اختیار کیتی ڄݙاں پارٹی اپوزیشن اچ ہئی۔سپیکر قومی اسمبلی آکھیا جو کل قائدِ حزبِ اختلاف اپݨی تقریر اچ میکوں حوالدار آکھیا تاں میں ازراہِ تفنن ݙسایا جو میں ݙو طرح دے حوالداراں کوں جاݨداں، ہک حوالدار او جیڑھا سرحداں تے فرائض سرانجام ݙیندے تے ݙوجھا حوالدار جرائم پیشہ لوکاں دے خلاف کارروائی کریندے، انھاں اچوں میں کیڑھا حوالدار ہاں۔ سپیکر قومی اسمبلی آکھیا جو قانون آہدے جو تُساں سپیکر دے خلاف ڳالھ نئی کرسڳدے، قائدِ حزبِ اختلاف میں تے آئین دی خلاف ورزی دا الزام لاتے، میکوں ݙسایا ونڄے جو میں کیویں آئین دی خلاف ورزی کیتی اے۔انھاں آکھیا جو عہدہ یا ایم این اے شپ تاحیات نئی ہوندی، عزت دے رشتے رہݨے چاہیندن کیوں جواساݙی ذاتی لڑائی کائنی، میں کݙاہیں وی دل آزاری دی ڳالھ نئی کیتی، گناہ گار ہاں تے غلطیاں کرینداں پر کوشش کرینداں جو اپوزیشن دے لوکاں کوں موقع ݙیواں تے انھاں کوں زیادہ ویلھا ݙتا ونڄے۔ کٹوتی دیاں تحریکاں تے اپوزیشن دے 25، 25 لوکاں کوں موقع ݙتا ڳیا پر ٻاہر ونڄ تے او ݙسیندے پئن جو سپیکر اساکوں ٻولݨ دا موقع نئی ݙیندا پیا۔