روایتی تے غیرروایتی ݙوہیں قسم دے خطرات نال نبٹݨ کیتے لچکدار تے مؤثر حکمتِ عملی اپناوݨ ضروری اے، ایڈمرل نوید اشرف

راولپنڈی۔24 جون(اے پی پی) پاک بحریہ دے سربراہ ایڈمرل نوید اشرف جدید جنگاں دی بدلدی ہوئی نوعیت تے ابھردے ہوئے بحری سکیورٹی چیلنجز تے روشنی سٹیندے ہوئیں ایں ڳالھ تے زور ݙتے جو روایتی تے غیر روایتی ݙوہیں قسم دے خطرات نال نمٹݨ کیتے لچکدار تے مؤثر حکمتِ عملی اپناوݨ ضروری اے۔ پاک فوج دے شعبہ تعلقاتِ عامہ آئی ایس پی آر توں جاری بیان موجب پاک بحریہ دے سربراہ ایڈمرل نوید اشرف پاکستان نیوی وار کالج لاہور دا دورہ کیتا تے 55ویں پاکستان نیوی اسٹاف کورس دے شرکاء نال خطاب کیتا۔ نیول چیف اپݨے خطاب اچ آکھیا جو مستقبل دی جنگاں دے تقاضے روایتی جنگی حکمتِ عملیاں تے نویں سروں غور کرݨ تے جدید ٹیکنالوجی نال آراستہ، فکری طور تے مضبوط افرادی قوت تیار کرݨ دا مطالبہ کریندن۔ انھاں جدید جنگاں دی بدلدی ہوئی نوعیت تے ابھردے ہوئے بحری سکیورٹی چیلنجز تے روشنی سٹیندے ہوئیں ایں ڳالھ تے زور ݙتا جو روایتی تے غیر روایتی ݙوہیں قسم دے خطرات نال نبٹݨ کیتے لچکدار تے مؤثر حکمتِ عملی اپناوݨ ضروری اے۔ایڈمرل نوید اشرف پاکستان نیوی دی جدید کاری، مقامی سطح تے تیاری تے مشترکہ آپریشنز دے عزم دا اعادہ کیتا تے شرکاء تے زور ݙتا جو او اپݨی اسٹریٹجک سوچ، پیشہ ورانہ مہارت تے آپریشنل بصیرت کوں مزید بہتر بݨاون۔ بحری چیلنجز تے ڳالھ کریندے نیول چیف آکھیا جو بحیرۂ ہند دا خطہ تکھے بدلدی ہوئی جغرافیائی سیاسی صورتحال تے وݙیاں طاقتاں دی رقابتاں دے پاروں ہک حساس تے متنازع خطہ بݨا ہوی اے، جئیں دے اثرات علاقائی سلامتی دے ماحول تے پوندے پئن۔ اپݨے اختتامی کلمات اچ نیول چیف 55ویں پاکستان نیوی اسٹاف کورس دے شرکاء کوں کورس دی کامیاب تکمیل تے مبارخ ݙتی تے انھاں کوں ہدایت کیتی جو او مستقبل دی ذمہ واریاں اچ پیشہ ورانہ مہارت، تجزیاتی صلاحیت تے جدت پسندی کوں اپݨا شعار بݨاون۔