مولانا فضل الرحمن نال پراݨے تعلقات تے احترام دا رشتہ اے، وزیرِ اعظم شہباز شریف

اسلام آباد۔24 جون (اے پی پی) وزیرِاعظم محمد شہباز شریف آکھیے جو مولانا فضل الرحمن نال انھاں دے پراݨے تعلقات تے احترام دا رشتہ اے، انھاں دے تے مولانا دے وچال تخلیہ اچ جو ڳالھیں تھئیاں ہن او ہمیشہ راز رہسن۔ قومی اسمبلی دے اجلاس اچ مولانا فضل الرحمن دی ایوان اچ تقریر دے حوالے نال اظہارِ خیال کریندے وزیرِاعظم آکھیا جو مولانا فضل الرحمن نال انھاں دے پراݨے تعلقات ہن، انھاں دے تے مولانا وچال تخلیہ اچ جیڑھیاں ڳالھیں تھئیاں ہن او قیامت تئیں راز رہسن تے میݙے نال قبراچ ویسن۔ ایں توں پہلے وزیراعظم ایوان اچ پڄے تاں ارکان ڈیسک وڄا تے انھاں دا استقبال کیتا، وزیرِاعظم سدھے اپوزیشن دیاں نشستاں تے ڳئے تے اپوزیشن لیڈر محمود خان اچکزئی، گوہر علی خان، مولانا فضل الرحمن، لطیف کھوسہ، حمید حسین سودھے پہلی صف اچ ٻٹھے اپوزیشن اراکین نال مصافحہ کیتا۔ انھاں مولانا فضل الرحمن نال کجھ دیر ڳالھ وی کیتی۔بعد اچ انھاں ایوان اچ مولانا فضل الرحمن دی طرفوں چاتے ڳئے کجھ نکات دے جواب اچ آکھیا جو مولانا فضل الرحمن نال انھاں دے بہترین تعلقات ہن تے انھاں نال احترام دا رشتہ اے۔ انھاں دی تقریر میں سݨی اے۔ میݙی اکثر مولانا فضل الرحمن نال ملاقات رہندی اے۔ انھاں دے تے میݙے وچال تخلیہ اچ جیڑھیاں ڳالھیں تھئن او قیامت تئیں راز ہن تے قبر اچ میݙے نال ویسن۔ بعد اچ مولانا فضل الرحمن کھلدے ہوئیں آکھیا جو وزیرِاعظم جئیں محبت دا اظہار کیتے میں ایں دا خیر مقدم کرینداں، جے او کلھیں تھیوݨ آلیاں ڳالھیں کوں پبلک کر ݙیون تاں او ناراض نہ تھیسن جئیں تے وزیرِ اعظم آکھیا جو او مولانا فضل الرحمن دی پیشکش کوں انھاں دی فراخ دلی دی بنیاد تے قبول نہ کریسن کیوں جو ایں نال معاملات پرے تئیں چلئے ویسن۔ بلاول بھٹو زرداری وی وزیرِ اعظم نال انھاں دی نشست تے ونڄ تے ہتھ ملایا۔